ກອງປະຊຸມສະຫຼຸບວຽກງານຮອບດ້ານປະຈຳໄຕມາດ III, ວາງທິດທາງແຜ່ນການປະຈຳໄຕມາດ IV ແລະ ເປີດຂະບວນການແຂ່ງຂັນ’’ຮັກຊາດ ແລະ ພັດທະນາ’’ ຫໍສະໝຸດກອງທັບ.

     ໃນເວລາ 8:30 ຂອງວັນທີ 01 ຕຸລາ 2025 ນີ້. ທີ່ຫ້ອງປະຊຸມຫໍສະໝຸດກອງທັບໄດ້ເປີດກອງປະຊຸມສະຫຼຸບວຽກງານຮອບດ້ານປະຈຳໄຕມາດ III, ວາງແຜ່ນການໄຕມາດ IV/2025 ແລະ ເປີດຂະບວນການແຂ່ງຂັນ “ຮັກຊາດ - ພັດທະນາ” ໂດຍການເປັນປະທານຂອງ ທ່ານ ພັ.ອ ໄຊຊະນະ ສະເຫຼີມສັກ ຮອງຫົວໜ້າກົມໂຄສະນາອົບຮົມກົມໃຫຍ່ການເມືອງກອງທັບພ້ອມດ້ວຍ ຄະນະອຳນວຍການ ແລະ ພະນັກງານ-ນັກຮົບຫໍສະໝຸດກອງທັບເຂົ້າຮ່ວມຢ່າງພ້ອມພຽງ.

ສະຫາຍ ພັທ ນ ເຕືອນໃຈ ນວນທະລາວົງ ຫົວໜ້າພະແນກບໍລິຫານສັງລວມໄດ້ຂື້ນຜ່ານບົດສະຫຼຸບໄຕມາດ III ແລະ ວາງທິດທາງແຜ່ນການປະຈຳໄຕມາດ IV ປີ 2025 ຂອງຫໍສະໝຸດກອງທັບ, ສະຫາຍ ພັທ ນ ຄູນທອງ ທຳມະວົງ ຮັກສາການອຳນວຍການຫໍສະໝຸດກອງທັບ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານຂະບວນການແຂ່ງຂັນພາຍໃຕ້ຄຳຂວັນ “ຮັກຊາດ-ພັດທະນາ” ປະຈຳປີ 2025ແລະ ວາງທິດທາງແຜ່ນການປີ 2026 ຜ່ານມາໄດ້ເອົາໃຈໃສ່ປັບປຸງກົມກອງຂອງຕົນເອງໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຂັ້ມແຂງດ້ານການຈັດຕັ້ງເອົາໃຈໃສ່ຊີ້ນຳປັບປຸງດ້ານທັດສະນະແນວຄິດຂອງພະນັກງານນັກຮົບປັບປຸງດ້ານແບບແຜນວິທີເຮັດວຽກແຕ່ລະຂັ້ນ, ຈາກນັ້ນ ສະຫາຍ ພັທ ສະຫວຽງ ຈັນທະວົງ ຫົວໜ້າພະແນກສື່ສານບັນນານຸກົມ ໄດ້ຂື້ນຕາງໜ້າພະນັກງານ-ນັກຮົບ ຂື້ນຮັບເອົາຂໍ້ແຂ່ງຂັນພາຍໃຕ້ຄຳຂວັນ “ຮັກຊາດ-ພັດທະນາ”.

ສະຫາຍ ທ່ານ ພັອ ໄຊຊະນະ ສະເຫຼີມສັກ ຮອງຫົວໜ້າກົມໂຄສະນາອົບຮົມກົມໃຫຍ່ການເມືອງກອງທັບ ກໍ່ໄດ້ມີຄຳເຫັນໂອລົມເຊີ່ງສະຫາຍໄດ້ຍ້ອງຍໍຊົມເຊີຍຜົນງານທີ່ກົມກອງຍາດມາໄດ້ໃນໄລຍະຜ່ານມາພ້ອມທັງເນັ້ນໜັກໃຫ້ພະນັງານ-ນັກຮົບເອົາໃຈໃສ່ເຝືກຝົນຫຼໍ່ຫຼອມຕົນເອງໃຫ້ກາຍເປັນພະນັກງານທີດີເດັ່ນ, ໜັກແໜ້ນດ້ານການເມືອງແນວຄິດ ແລະ ຮັກສາມູນເຊື້ອອັນດີງາມຂອງກົມກອງ.

ກອງປະຊຸມໄດ້ປິດລົງດ້ວຍຜົນສຳເລັດອັນຈົບງາມໃນເວລາ 11:00 ຂອງວັນດຽວກັນ.