ໃນເວລາ 8:30 ຂອງວັນທີ່ 9 ມັງກອນ 2025. ທີ່ຫ້ອງປະຊຸມຊັ້ນII ຫໍສະໝຸດກອງທັບ, ໄດ້ຈັດກອງປະຊຸມ ສະຫຼຸບການເຄື່ອນໄຫວວຽກງານຮອບດ້ານປະຈຳປີ 2024 ແລະ ວາງທິດທາງແຜນການປະຈຳປີ 2025. ໂດຍພາຍໃຕ້ການເປັນປະທານ ຂອງທ່ານ ພັທ ໄຊຊະນະ ສະເຫຼີມສັກ ຮອງຫົວໜ້າກົມໂຄສະນາ ຜູ້ຊີ້ນຳວິຊາສະເພາະ ກົມໃຫ່ຍການເມືອງກອງທັບ, ມີຄະນະພັກ-ຄະນະບັນຊາພ້ອມດ້ວຍຫົວໜ້າພະແນກ ຮອງພະແນກຕະຫຼອດຮອດພະນັກງານນັກ-ຮົບພາຍໃນກົມກອງເຂົ້າຮ່ວມຢ່າງພ້ອມພຽງ.

    ພາຍຫຼັງກອງປະຊຸມໄດ້ກ້າວເຂົ້າສູ່ຄວາມເປັນລະບຽບຮຽບຮ້ອຍແລ້ວ ສະຫາຍ ພັທ ນ. ເຕືອນໃຈ ນວນທະລາວົງ ຫົວໜ້າພະແນກ ບໍລິຫານ-ສັງລວມ ກໍ່ໄດ້ຂື້ນຜ່ານບົດສະຫຼຸບການເຄື່ອນໄຫວວຽກງານຮອບດ້ານປະຈຳປີ 2024 ແລະ ວາງທິດທາງແຜນການປີ 2025, ຈາກນັ້ນພະນັກງານຈຳນວນໜື່ງກໍ່ໄດ້ປະກອບຄຳເຫັນໃສ່ບົດສະຫຼຸບ ແລະ ແຜນການຢ່າງກົງໄປກົງມາ.

  ຕໍ່ມາສະຫາຍ ພັທ ໄຊຊະນະ ສະເຫຼີມສັກ ປະທານກອງປະຊຸມກໍ່ໄດ້ໃຫ້ກຽດມີຄໍາເຫັນໂອ້ລົມ ເບື້ອງຕົ້ນສະຫາຍໄດ້ຍົກໃຫ້ເຫັນ ສະພາບການເມືອງສາກົນ ແລະ ພາຍໃນ, ຈາກນັ້ນ ສະຫາຍກໍ່ໄດ້ສະແດງຄວາມຍ້ອງຍໍ້ຊົມເຊີຍຕໍ່ຜົນງານທີ່ຫໍສະໝຸດຍາດມາໄດ້ 1ປີຜ່ານມາຢ່າງມາກມາຍກາຍກອງ ທ່ານຍັງໄດ້ຍົກໃຫ້ເຫັນບົດບາດຄວາມສຳຄັນຂອງຫໍສະໝຸດກອງທັບ ເປັນສູນລວມແຫ່ງຄວາມຮູ້ດ້ານສະຕິປັນຍາ ຕ່າງໆຂອງມວນມະນຸດ ເປັນກົມກອງໜື່ງທີ່ເຮັດວຽກງານໂຄສະນາ ແນວທາງການເມືອງຂອງພັກ ລະບຽບວິໄນຂອງກອງທັບ. ເຊີ່ງມີບົດບາດທຽບເທົ່າກັບບັນດາກອງສື່ຕ່າງໆໃນກອງທັບ. ທ່ານໄດ້ຮຽກຮ້ອງໃຫ້ ພະນັກງານ ຫໍສະໝຸດກອງທັບ ຈົ່ງເພີ່ມທະວີນໍ້າໃຈຮັບຜິດຊອບຕໍ່ໜ້າທີ່ໃຫ້ສູງ, ເອົາໃຈໃສ່ຝຶກຝົນຫຼໍ່ຫຼອມຕົນເອງ ແລະ ພ້ອມກັນຮັກສາມູນເຊື້ອທີ່ດີຂອງກົມກອງ, ນອກນັ້ນກໍ່ໄດ້ເພີ່ມທະວີຄວາມສາມັກຄີເປັນປຶກແຜນ. ກອງປະຊຸມໄດ້ປິດລົງໃນເວລາ 11:00 ຂອງວັນດຽວກັນນີ້ດ້ວຍໝາກຜົນອັນຈົບງາມ.