ກົມຄົ້ນຄ້ວາວິທະຍາສາດ ແລະ ປະຫວັດສາດ ປ້ອງກັນຄວາມສະຫງົບ ອວຍພອນຫໍສະໝຸດກອງທັບ. 

     ໃນເວລາ 9:00 ຂອງວັນທີ 19 ມັງກອນ 2024, ທີ່ຫ້ອງຮັບຮອງຊັ້ນ II ຫໍສະໝຸດກອງທັບໄດ້ມີພິທີຕ້ອນຮັບການມາອວຍພອນຂອງ ກົມຄົ້ນຄ້ວາວິທະຍາສາດ ແລະ ປະຫວັດສາດ ປ້ອງກັນຄວາມສະຫງົບ ເຊິ່ງນຳໂດຍ ສະຫາຍ ພັນເອກ ທົງສະຫວັດ ຫຼວງຈັນດາວົງສ໌  ຄະນະພັກ-ຄະນະບັນຊາ ກົມຄົ້ນຄ້ວາວິທະຍາສາດ ແລະ ປະຫວັດສາດ ພ້ອມດ້ວຍ ພະນັກງານ-ນັກຮົບ ພະແນກ ຫໍພິພິທະພັນ ປ້ອງກັນຄວາມສະຫງົບ ແລະ ຫ້ອງສະໝຸດຈຳນວນໜຶ່ງ, ໄດ້ນໍາເອົາກະຕ່າຂອງຂວັນອວຍພອນຫໍສະໝຸດກອງທັບ, ໃນໂອກາດຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ໃຫ້້ກຽດຕ້ອນຮັບໂດຍ ສະຫາຍ ພັນໂທ ນ. ຄູນທອງ ທຳມະວົງ ຮອງອຳນວຍການຫໍສະໝຸດກອງທັບ ພ້ອມດ້ວຍ ພະນັກງານ-ນັກຮົບຈຳນວນໜຶ່ງ. ເບື້ອງຕົ້ນ ສະຫາຍ ພັນເອກ ທົງສະຫວັດ ຫຼວງຈັນດາວົງສ໌  ຕາງໜ້າຄະນະໄດ້ກ່າວຄຳອວຍພອນ ແລະ ມອບກະຕ່າຂອງຂັວນ, ຈາກນັ້ນ ສະຫາຍ ພັນໂທ ນ. ຄູນທອງ ທຳມະວົງ ກໍ່ໄດ້ຕາງໜ້າຄະນະກ່າວສະແດງຄວາມຕ້ອນຮັບ ແລະ ຂອບໃຈນຳບັນດາທ່ານແຂກທີ່ມາຮ່ວມ. ການມາອວຍພອນໃນຄັ້ງນີ້ສຸດທີ່ມີຄວາມໝາຍສຳຄັນເປັນການຜູກແໜ້ນຄວາມສາມັກຄີລະຫວ່າງກະຊວງ, ໂດຍສະເພາະກໍ່ແມ່ນສອງກົມກອງໃຫ້ມີຄວາມແໜ້ນແຟ້ນຂຶ້ນກວ່າເກົ່າ ແລະ ເປັນການອວຍພອນວັນສ້າງຕັ້ງກອງທັບຄົບຮອບ 75 ປີ ຢ່າງມີເນື້ອໃນເລິກເຊິ່ງເພື່ອເປັນການເສີ່ມສ້າງຄວາມສາມັກຄີໃຫ້ຍືນຍົງຕະຫຼອດໄປ. ພິທີອວຍພອນໄດ້ດຳເນີນໄປດ້ວຍບັນຍາກາດແຫ່່ງມິດໄມຕີ ແລະ ມີຄວາມເບີກບານມ່ວນຊື່ນ ຈົນເຖິງເວລາອັນສົມຄວນຈຶ່ງເລີກລາກັນໄປ.