ໃນວັນທີ 12 ທັນວາ 2023​ທີ່ຜ່ານມາ, ກອງໂທລະພາບກອງທັບ ໄດ້ເປີດການແຂ່ງຂັນເວທີ ແລກປ່ຽນ - ຄວາມຮູ້ ລາຍການ ຟັງຂ້ອຍເວົ້າຊີຊັ່ນ II ຂອງກອງໂທລະພາບກອງທັບ ຂຶ້ນທີ່ໂຮງລະຄອນກອງສີລະປະກອນກອງທັບ, ໂດຍການເປັນປະທານຂອງ ສະຫາຍ ພົນຈັດຕະວາ ແປ້ນຄຳ ບຸດຈັນແພງ ກຳມະການຄະນະພັກກົມໃຫຍ່ການເມືອງກອງທັບ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ, ຕາງໜ້າອົງການ, ວິທະຍາຄານ, ກົມກອງ, ຫ້ອງການ, ໂຮງຮຽນ, ໂຮງໝໍ ພ້ອມດ້ວຍນັກແຂ່ງຂັນເຂົ້າຮ່ວມ.

  ໂອກາດນີ້, ສະຫາຍ ພັນເອກ ຈະເລີນສຸກ ວັງເວີນໂຂງ ຫົວໜ້າການທະຫານ ກອງໂທລະພາບກອງທັບ ໄດ້ມີຄຳເຫັນກ່າວເປີດພິທີວ່າ: ໂທລະພາບກອງທັບປະຊາຊົນລາວ ແລະ ສູນຝືກທັກສະ ໄດ້ຮ່ວມມືກັນຈັດກິດຈະກຳລາຍການຟັງຂ້ອຍເວົ້າ ເພື່ອເປັນສ່ວນໜຶ່ງຊ່ວຍຍົກລະດັບຄວາມສາມາດໃຫ້ແກ່ພະນັກງານ - ນັກຮົບ ເພື່ອສຶກສາອົບຮົມການເມືອງ - ແນວຄິດ, ນຳເອົາແນວທາງນະໂຍບາຍຂອງພັກ, ກົດໝາຍຂອງລັດ ເຂົ້າສູ່ຊີວິດຕົວຈິງຂອງພະນັກງານ - ນັກຮົບກໍຄື ປວງຊົນລາວບັນດາເຜົ່າ ໂດຍບັນດານັກແຂ່ງຂັນທີ່ໄດ້ນຳເອົາຂໍ້ມູນ - ຫຼັກຖານ ຈາກແຫຼ່ງຕ່າງໆ ບໍ່ວ່າຈະເປັນວຽກງານທາງດ້ານການເມືອງ, ການທະຫານ, ເສດຖະກິດ, ວັດທະນະທຳ - ສັງຄົມ ນຳມາສະເໜີແລກປ່ຽນຄວາມຮູ້ຕໍ່ກັນດ້ວຍວາທະສິນຂອງຕົນເອງ ຢ່າງມີຫຼັກການ, ຖືກຕ້ອງ ແລະ ມີຊີວິດຊີວາ, ເຊິ່ງຜ່ານການເຄື່ອນໄຫວໃນເວທີແລກປ່ຽນຄວາມຮູ້ ລາຍການຟັງຂ້ອຍເວົ້າ ຜ່ານຂະບວນການຝືກອົບຮົມແມ່ນຈະເຮັດໃຫ້ກາຍເປັນຜູ້ທີ່ມີຄວາມກ້າຫານ ເວົ້າຕໍ່ໜ້າມວນຊົນກໍຄືເວທີຕ່າງໆ ຢ່າງມີສີລະປະ ແລະ ມີທັກສະທີ່ຄ່ອງແຄ້ວ, ການແຂ່ງຂັນໃນຄັ້ງນີ້ປະກອບມີ 3 ການແຂ່ງຂັນຄື: ການໂຕ້ວາທີດ່ຽວ, ການເລົ່າເລື່ອງ ແລະ ການນຳສະເໜີບົດຄວາມ, ເຊິ່ງການແຂ່ງຂັນເວທີ ແລກປ່ຽນຄວາມຮູ້ ລາຍການ ຟັງຂ້ອຍເວົ້າ ຈະດຳເນີນໄປເປັນ 3 ໄລຍະຄື: ໄລຍະທີ I ເລີ່ມແຕ່ວັນ 12-14 ທັນວາ 2023,​ ໄລຍະທີ II ແມ່ນເລີ່ມແຕ່ວັນທີ 25-27 ທັນວາ 2023​ ແລະ​ ໃນໄລຍະ​ທີ​ III​ ແມ່ນຄາດວ່າກາງເດືອນມັງກອນ 2024 ຈຶ່ງຈະສຳເລັດ.