ໃນຕອນເຊົ້າຂອງວັນທີ 11 ສິງຫາ​ 2023​ ນີ້, ກົມກົດໝາຍກະຊວງປ້ອງກັນປະເທດ ໄດ້ຈັດກິດຈະກໍາຍ່າງເພື່ອສຸຂະພາບ, ເພື່ອເປັນການສ້າງຂະບວນການຂ່ຳນັບຮັບຕ້ອນວັນລັດຖະທຳມະນູນແຫ່ງຊາດຄົບຮອບ​ 32​ ປີ (15 ​ສິງຫາ​ 1991 - 15 ສິງຫາ 2023).​

          ໃຫ້ກຽດເປັນປະທານໂດຍ ພົນຈັດຕະວາ ກັນທອງ​ ສຸກເລືອງຄຳ​ ຫົວໜ້າກົມກົດໝາຍກະຊວງປ້ອງກັນປະເທດ, ຕາງໜ້າກົມກອງທີ່ຂື້ນກັບກົມໃຫຍ່ການເມືອງກອງທັບ,​ ຫ້ອງການບໍລິຫານຫ້ອງວ່າການກະຊວງປ້ອງກັນປະເທດ ແລະ​ ຫ້ອງການເມືອງຫ້ອງວ່າການກະຊວງປ້ອງກັນປະເທດ ເຂົ້າຮ່ວມ.

          ໂອກາດດັ່ງກ່າວສະຫາຍ ພົນຈັດຕະວາ​ ກັນທອງ​ ສຸກເລືອງຄຳ​​ ໄດ້ສະແດງຄວາມເຫັນວ່າ: ການຈັດກິດຈະກໍາຍ່າງເພື່ອສຸຂະພາບ ເພື່ອເປັນການສ້າງຂະບວນການຕ້ອນຮັບວັນລັດຖະທຳມະນູນແຫ່ງຊາດຄົບຮອບ​ 32​ ປີ ໃຫ້ມີຄວາມໝາຍຄວາມສຳຄັນອັນເລິກເຊິ່ງ​ ແລະ ເປັນຂະບວນທີ່ຟົດຟື້ນໃຫ້​ ຊາວໜຸ່ມ-ແມ່ຍິງ​ ທົ່ວອົງການ,​ ກົມກອງ,​ ກົມໃຫຍ່ການເມືອງກອງທັບ​ ມີຄວາມສາມັກຄີສະໜິດແໜ້ນ​ ແລະ​ ຍັງເປັນການສ້າງຂະບວນການໃຫ້ມີບັນຍາກາດເບີກບານມ່ວນຊື່ມ, ສ້າງໃຫ້ພະນັກງານ-ນັກຮົບ ມີສຸຂະພາບແຂງແຮງ ແລະ ຄວາມສາມັກຄີຮັກແພງເຊິ່ງກັນ ແລະ ກັນອີກດ້ວຍ.