He kōrero, he whakataukī mō Matariki:
Ka tohua e te aonga ake o Matariki i te ata te tīmatanga o tāna e whāngai ai i te mata o te whenua kia riro ai ngā hua o te tau.
Matariki, te wā hei whakarite i ngā puke kūmara, arā ngā ahunga kūmara. Kia rite ai mō te wā hei whakatō i ngā kūmara. Ka whakahuihui a Matariki i te iwi hei tīmata ki te whakarite i te whenua hei whakarite mō te mahi whakatō.
He iti noa ngā kai o te wā o Matariki. Tiakina, me āta whakaaro mehemea kua rahi te kai hei manaaki hoki i ngā manuwhiri.
Ka tohu a Matariki i te wā ka kaha heke iho nei te ua. Ka puta ko ngā puna wai, arā ngā tāpuapua.
Mā Matariki e tohu me he tau pai rānei kei te heke mai, me he tau kino rānei mō te kai me te āhua o ngā rā. Mehemea e tiaho rawatia ngā whetū o te kāhui nei, he tohu pai. Mehemea e pātata atu ana ki te Marama, he tohu pai hoki tērā.
E mea ana tēnei kōrero, ko te tini ka riro, ehara i te mea he aha ki a Matariki i runga i te korenga o ōna herenga whanaungatanga ki te tangata.