Haurra erdigunean jarri eta bere garatze eta ikaste-prozesuaren protagonista izatea, ziurtasun afektiboa bermatzea eta autonomia dira gure antolaketaren bitartez lortu nahi diren helburuak. Horretarako, berebiziko garrantzia eman behar diogu esplorazioari, manipulazioari eta jolasari. Zalantzarik gabe, espazioaren antolaketak eta, batez ere, haurrari eskainiko diogun begiradak baldintzatuko du.

Hezkuntza-konpetentzia orokorrak garatzeko, hau da, NORBERA IZATEN IKASI (autonomia lortzen joateko ), ELKARREKIN BIZITZEN IKASI ( talde bizitzan trebatzeko ), eta bide batez EGITEN ETA EKITEN IKASI konpetentzien garapenean aurrerapausoak emateko, aurtengo ikasturtean HHn gela-arteko “mugimendu autonomoan” hastekoak ginen baina, halabeharrez, egoerak eta Hezkuntza Sailak ezarritako arautegia jarraitzeko, aurrerago martxan jarriko dugun plangintza eraldatu beharra izan dugu. Espazioak antolatzerakoan, gela berean  GUNE edo ANBIENTE desberdinak sortzen saiatu gara, zeintzuk ahalbideratuko duten konpetentzien garapena, eta helburuen lorpena.

Gune edo anbiente desberdinetako materialen artean, material ez egituratua egongo da. Bakoitzak manipulatu dezala, sentitu, ondorioak atera, bere hipotesiak egin, materiala izan bedi berari esaten dion “hori”.

Ongizatea eta autonomia integrala bultzatzea da guneen helburu nagusia; horregatik, haurrak bere kasa aukeratu behar du parte hartu nahi duen gunea. Horrela, jarduera erabakitzen, antolatzen eta burutzen duena haurra bera izan dadin ahalbideratuko dugu.

Haur hezkuntzan eraldaketa prozesuan murgiltzen gaudenez, Lehen Hezkuntzako 1. zikloan (1. eta 2. mailan, batez ere, aldaketa batzuk proposatzen ari gara.

Hezkuntza prozesua jarraia izan dadin, Haur Hezkuntza eta Lehen Hezkuntzako lotura bermatu behar da; horretarako hhko eta hasiera zikloko irakasleen elkarlana sustatuko da.

Bizi dugun egoera nolakoa den ikusita eta aldaketak pausoz pauso egin behar direla sinestuta, aurten Txanela proiektuarekin jarraituko dugu hainbat esperientzia berri txertatuz. Ondorengo urteetan behar diren aldaketak egiten joango gara.

4., 5. eta 6. mailetan EKI proiektua jarraitzen dugu. Hezkuntzaren erdigunean dago ikaslea, beraz, bizitza osorako hezkuntzaren ikuspegitik pertsonaren garapen integrala ahalbideratzeko, Lehen Hezkuntzan ere, lehentasuna ematen diogu ikasle bakoitzari, segurtasun afektiboa bermatzen dion testuinguruan, bere auto-errealizaziorantz aurrera egiteko, bere ahalmenak ahalik eta gehien garatzeko laguntza eta aukerak emateari, bakoitza bere bizi proiektua oinarri sendoekin eraikitzen joan dadin.