EL MAZARIOL
(adatt. W.Basso, Le pì belle fiabe venete, Editoriale Programma 2019)
Ve raconto la storia del foleto più famoso de tutto il Vèneto.
Sto foleto viveva un poco dapartutto, a seconda della zona el gaveva nomi differenti: noi lo chiameremo el Mazariòl.
El viveva in mèzzo ai boschi più intrigai e nele campagne in mèzzo ai sbari pì fissi e le jera un ometo picenin, alto appena do spane, tuto vestìo de rosso co un capelin sempre rosso a ponta come le scarpete, el portava i caveji longhi e rissi, infin gaveva na barbassa longa longa.
De solito no’l jera cativo ma sustoso, nervoso e dispetoso come e anca pèzo de na sìmia.
Pensè che na matina me nono Bebi Barbon ze andà in stala a mònzare le vache e ga catà tuti e do cavali chel gaveva col morbin e co le criniere fate sù a trecine che i pareva do cavali da circo.
Beh, me nono davanti a sto fenòmano jera là co la boca verta, gratandose la testa quando el ga sentio na risada:
-Ehhhhhhhh ahhhhhhh ahhhhhhhh ahhhhh…
E cossa gàlo visto? El ga visto na robeta rossa chel jera el Marzariol che scanpava fora dala porta e spariva in mèzo ai campi.
Quando se passava nei posti dove lui viveva bisognava stare senpre atenti a no incrosarlo, ma soratuto no caminare metendo i pìè sora le so pèche, overo dove gaveva pestà lu.
Se sto sucedeva, al poro can jera costreto a caminare fin dove gaveva caminà el Marzariol e cussì l’omo, andando in giro de baucon sensa savere ben dove, el se perdeva e tornava casa dopo do tre dì, insultando el Mazariol che invesse, in giro parel bosco se la rideva de gusto.
Se invesse vissin a casa sua, par sbalio, andava qualche tosata che portava a pascolare le oche, lu de colpo se faseva vedare prima tirando i caveji ale tosate e po’ fasendo scanpare le bestie.
Se caminè nei nostri boschi bisogna che stè atenti a no farlo sule pèche del signor Mazariol: pèrdarve ze un atimo!