Agorwyd Ysgol Santes Dwynwen Pasg 2019. Mae'r ysgol wedi cymryd lle pedair ysgol yn Bodorgan, Dwyran, Llangaffo a Niwbwrch. Mae Ysgol Santes Dwynwen yn Ysgol dan Reolaeth Wirfoddol yr Eglwys yng Nghymru ar gyfer 180 o ddisgyblion a bydd hefyd yn cynnig 25 o lefydd meithrin.

Mae’r dyluniad yn gysylltiedig â safle hanesyddol Llys Rhosyr ar gyrion pentref Niwbwrch, sef Llys Brenhinol Tywysogion Gwynedd a ddefnyddiwyd yn ystod y 13eg ganrif. Mae olion hen neuaddau Llys Rhosyr wedi defnyddio fel elfen dylunio allweddol o fewn cynllun pensaernïol yr ysgol newydd. 

Mae'r ysgol newydd yn gynaliadwy dros ben ac wedi ei adeiladu gyda Phaneli SIPS. Cawsant eu creu oddi ar y safle, a oedd yn golygu gwaith adeiladu heb wastraff a defnydd isel o ynni. Golygai hyn llai o gostau ac amser ar y safle.

Dywedodd y deilydd portffolio Addysg, y Cynghorydd Meirion Jones, “Drwy weithio mewn partneriaeth gyda Llywodraeth Cymru, rydym yn buddsoddi yn nyfodol ein plant - gan ddarparu’r addysg gorau posib iddynt a sicrhau eu bod yn cael eu dysgu mewn ysgolion sy'n cwrdd â safonau a disgwyliadau’r 21ain ganrif. Mae'r ysgolion yma’n addas at y diben, yn y llefydd iawn, ac yn cwrdd ag anghenion disgyblion a staff.”