HWIANGERDDI A CHANEUON

CAM CYNNYDD 1

Mae clywed, gwrando ar a dysgu hwiangerddi, rhigymau a chaneuon yn cynnig cyfleoedd hwylus a hwyliog i’r disgyblion ifanc glywed ac ymgyfarwyddo â’r iaith Gymraeg. Wrth ymuno yn y dweud a’r canu byddant yn meithrin sgiliau siarad ac ynganu clir, yn dysgu geirfa, strwythur cymal, patrymau iaith ac yn magu clust i adnabod treigladau. Drwy ymarfer dyddiol, bydd y medrau yma yn sail gadarn i ddatblygu eu hyder ieithyddol ac i feistroli’r iaith mewn amgylchedd diogel.

CAM CYNNYDD 2

Dylid parhau â’r arfer dyddiol gwerthfawr o adrodd a chanu hwiangerddi, rhigymau a chaneuon yng Ngham Cynnydd 2. Mae hyn yn cynnig cyfleoedd i’r disgyblion ymarfer, adolygu ac atgyfnerthu eu dysgu blaenorol, yn ogystal a chynnig her briodol. Mae disgwyl bod y banc o hwiangerddi, rhigymau a chaneuon sy’n gyfarwydd i’r disgyblion yn tyfu ac yn gynyddol heriol.

CAM CYNNYDD 3

Wrth i’r disgyblion aeddfedu, a dod yn fwy ymwybodol o strwythur iaith a gramadeg, mae hwiangerddi, rhigymau, penillion a chaneuon yn rhoi cyd-destun a chyfleoedd i ddrilio patrymau iaith safonol. Bydd y rheolau / patrymau iaith cywir yn ymwreiddio ac yn dod yn rhan annatod o’u hiaith lafar ac ysgrifenedig, yn codi safon eu cyfathrebu, ac yn datblygu eu hyder ar draws y meysydd dysgu. Dylid parhau i ehangu ac amrywio’r profiadau drilio iaith cynnil yma.