Yn Ysgol Gymraeg Iolo Morganwg ein nod yw creu awyrgylch ddysgu garterfol, hapus, diogel a Chymraeg, lle mae pob disgybl yn cael cyfle cyfartal i gyflawni ac yn cael eu hysbrydoli i gyrraedd eu potensial llawn trwy ystod o brofiadau dysgu. Ein bwriad yw galluogi pob dysgwr i ddatblygu, hoelio a chymhwyso sgiliau a gwybodaeth allweddol er mwyn datblygu'n ddysgwyr annibynnol, brwd, gydag awch am ddysgu gydol oes.  Trwy waith caled, ymroddiad a chefnogaeth ein cymuned dysgu, ymdrechwn i sicrhau bod ein disgyblion yn tyfu'n unigolion caredig, cyfrifol, hyderus a llwydiannus a dymunwn "Hwyl iddynt oll wrth lwyddo."

Pedwar diben Cwricwlwlm i Gymru yw sail dibenion a dyhead ein cwricwlwm, a sefydlwn rhain yn gadarn ym mhob agwedd o fywyd ysgol drwy ein gwerthoedd.  Gwelir ein gwerthoedd fel sylfaen i bopeth a wnawn, fel disgyblion, oedolion a chymuned ehangach. 

Bwriad ein cwricwlwm yn Ysgol Iolo Morganwg yw darparu cwricwlwm eang, cyfredol a chyffrous sydd yn addas i ddysgwyr o wahanol oedrannau, galluoedd a doniau.  Bydd yn gwricwlwm sy’n cyfuno sgiliau, gwybodaeth a phrofiadau a fydd yn cynnig cyfleoedd i bob dysgwr wneud cynnydd priodol yn unol â’u gallu. 

Rhoir ystyriaeth lawn i bob un o’r chwe maes dysgu a phrofiad sydd i'w gweld isod ac i’r datganiadau o’r hyn sy’n bwysig o fewn rhain. 

Sicrhawn bod ein mapiau cwricwlaidd yn rhoi ystyriaeth lawn i elfennau mandadol y cwricwlwm, gan gynnwys:

• Crefydd, Gwerthoedd a Moeseg

• Addysg Cydberthnasedd a Rhywioldeb

• Cymraeg a Saesneg

• Fframweithiau Trawsgwricwlaidd - llythrennedd, rhifedd a chymhwysedd ddigidol

Rydym hefyd yn hyrwyddo elfennau statudol megis:

• Gyrfaoedd a byd gwaith

• Hawliau dynol

• Amrywiaeth

Rydym wedi datblygu ein themâu i sicrhau llinynnau dysgu clir a chydlynol ar draws yr ysgol. Trwy gynnal trosolwg cytbwys, gallwn weld yn union beth mae’r disgyblion wedi’i ddysgu o’r blaen ac adeiladu'n fwriadol ar y sylfeini hynny. Mae hyn yn galluogi pob plentyn i ddyfnhau ei ddealltwriaeth ac i wneud cysylltiadau ystyrlon rhwng themâu gwahanol.

Nid yw dau ddosbarth yn archwilio’r un thema ar yr un pryd, ond mae pob un yn canolbwyntio ar yr un cysyniad craidd drwy gyd-destunau sy’n ymgysylltu ac yn addas i’w hoedran. Mae’r dull hwn yn adlewyrchu egwyddorion y cwricwlwm troellog – dychwelyd at gysyniadau allweddol dro ar ôl tro, ar lefel fwy soffistigedig bob tro, er mwyn sicrhau dyfnhau parhaus o wybodaeth, sgiliau a dealltwriaeth. Mae cwricwlwm sy’n seiliedig ar gysyniadau felly’n hyrwyddo ailadrodd creadigol – ailadrodd sy’n arwain at gynnydd ac at ddyfnhau dysgu, nid at ailadrodd cynnwys.

Yn ogystal, mae’r dull hwn yn darparu darlun clir a chyson o’r hyn sy’n cael ei ddysgu ar draws yr ysgol gyfan. Trwy wneud hynny, gallwn sicrhau dilyniant effeithiol o flwyddyn i flwyddyn, gan greu taith ddysgu gydlynol, ystyrlon ac uchelgeisiol i’n disgyblion.

Yn Ysgol Gymraeg Iolo Morganwg byddwn yn defnyddio cyfleoedd asesu er mwyn cefnogi pob dysgwr unigol i wneud cynnydd ar hyd ein continwwm dysgu, gan sicrhau eu bod yn cael eu cefnogi a’u herio yn unol â hynny.  Byddwn yn defnyddio dulliau asesu sydd â ffocws barhaus ar gefnogi dysgwyr unigol, ystyried cynnydd dysgwyr unigol dros amser a deall cynnydd grwpiau o ddysgwyr.   Drwy hyn, gallwn sicrhau myfyrio parhaus i lywio darpariaeth y dyfodol a sicrhau cynllunio bwriadol.   

Wrth hunan arfarnu, gwrando ar lais y disgybl a pharhau i ddatblygu fel sefydliad sy'n dysgu,  byddwn yn gwerthuso ac yn addasu ein cwricwlwm yn gyson.  

Bydd datblygiadau cwricwlaidd yn cael eu rhannu'n gyson gyda rhanddeiliaid yr ysgol drwy wefan yr ysgol a thrwy gyfarfodydd hyrwyddo a rhannu gwybodaeth.