Cwestiynau cyffredin  

Ble mae Canolfan Iaith Conwy? 

• Mae Canolfan Iaith Conwy wedi'i lleoli ar safle Ysgol Dyffryn yr Enfys, Dolgarrog. 

• Bydd y disgyblion yn rhannu cyfleusterau'r ysgol yn unig, mae'r Ganolfan yn hollol annibynnol.

Sut mae'n gweithio?

• Gall disgyblion rhwng 7 -11 oed fynychu’r ganolfan am dymor.

• Mae disgyblion yn dilyn cwrs wedi’i strwythuro’n ofalus â’r mwyafrif yn dod yn rhugl ar lafar yn ogystal â meithrin sgiliau darllen ac ysgrifennu.

Beth yw'r manteision?

• Dengys ymchwil a phrofiad athrawon mewn nifer o wledydd fod trochiad ieithyddol yn yr ail iaith yn ddull effeithiol iawn o ddysgu iaith.

• Mae’r gymhareb staffio yn hael 1 athrawes a chymhorthydd i 12 o ddisgyblion. 

• Golyga adnoddau da ynghyd â’r awyrgylch gartrefol yn y ganolfan, fod y profiad sydd i’w gael, yn un arbennig. 

•  Mae staff y ganolfan yn brofiadol ac yn  arbenigwyr cydnabyddedig yn eu maes. 

Pa mor hir fyddant yn y Ganolfan?

• Gwneir cais am le gan y fam ysgol ac mae'r mynediad ar sail tymor llawn.

Sut ydych yn delio â'r cwricwlwm yn ei gyfanrwydd?

• Mae'r pwyslais ar ddysgu siarad, darllen ac ysgrifennu yn Gymraeg. Fodd bynnag, addysgir Rhifedd yn ddyddiol yn unol â lefelau'r  Cwricwlwm. Mae'r disgyblion hefyd yn profi  agweddau eraill ar y Cwricwlwm trwy wyddoniaeth,  technoleg ac astudiaethau amgylcheddol.  

Pa lefel hyfedredd y byddech chi'n disgwyl i blentyn ei chyflawni mewn un tymor?

• Gydag agwedd gadarnhaol o fewn amgylchedd hapus, bydd gan bob plentyn ddigon o feistrolaeth ar yr iaith i'w galluogi i integreiddio'n llawn i waith a bywyd yr ysgol a'r gymuned.  

Sut fydd fy mhlentyn yn teithio i'r Ganolfan?

• Darperir cludiant yn rhad ac am ddim gan Gyngor Sir Conwy, o’r cartref i'r Ganolfan gan ddefnyddio contractwyr cludiant ysgol. 

• Bydd y cwmni tacsis yn cysylltu â chi yn uniongyrchol gyda'r trefniadau. 

• Bydd ein staff yn cyfarch y disgyblion wrth gyrraedd ac yn sicrhau eu bod  yn y tacsi yn ddiogel ar ddiwedd y dydd. 

A yw'r digyblion yn cael cinio ysgol?

Mae croeso i ddisgyblion gael cinio ysgol neu ddod â phecyn bwyd.

Sut alla i helpu fy mhlentyn?

• bod yn gadarnhaol ac yn gefnogol  

• anogwch eich plentyn i siarad Cymraeg â  chymdogion a ffrindiau  

• cadwch mewn cysylltiad â'r athrawon yn y ganolfan 

Beth mae'r plant yn ei ddweud ...  

•  “Byddaf yn gallu siarad â fy ffrindiau yn yr ysgol yn Gymraeg.”  

•  “Byddaf yn gallu deall beth sy'n digwydd.” 

•  “Gallaf siarad yn Gymraeg â phobl yn y pentref ac maen nhw'n synnu fy mod i'n  

   gallu.”  

•  “Gallaf ddarllen llyfrau Cymraeg, a mwynhau’r stori.”  

•  “Gallaf ysgrifennu straeon yn Gymraeg.” 

•  “Fe wnes i fwynhau actio’r cymeriadau ym mhentref Llanfairgogogoch.”  

•  “Rydw i wedi mwynhau gwylio fideos Cymraeg.” 

Beth mae'r rhieni yn ei ddweud...

"Maen nhw wedi bod wrth eu bodd. Dw i mor falch ein bod ni wedi gwneud y penderfyniad i'w hanfon."

"Mae ein plant wedi cael profiad anhygoel yn y ganolfan iaith. Dechreuon nhw eu taith i ddysgu Cymraeg gan wybod fawr ddim, ac ar ôl 10 wythnos o’r dysgu trochi, maen nhw wedi datblygu tu hwnt i'n disgwyliadau. Mae’r athrawon wedi bod yn gefnogol iawn, a byddwn i gyd yn gweld eisiau’r ganolfan yn fawr iawn. "

"Roedd fy mhlentyn yn bryderus ar y dechrau ond ar ôl ychydig ddyddiau roedd methu disgwyl iwe led ei ffrindiau newydd ac i chwarae gemau yn Gymraeg."