屏東縣的東港鎮是蜀个漁港，鎮內景點除了大鵬灣國家風景區，也是離小琉球上近的港口，來東港毋但是來食海產，嘛會當到小琉球行行踅踅。

東港遮的海產誠豐富，上出名的就是黑鮪魚（黑甕串），嘛是因為伊的重要性，所以每年差不多五月的時，攏會舉辦踩街佮活動。

東港閣有蜀个逐家攏知的民俗祭典，就是三年一科的「東港迎王平安祭典」，在地儂攏講「迎王」，這是東港上有名的民俗祭典，嘛是東港儂自細漢到大漢的記憶。迎王活動連紲蜀个禮拜，王船會佇鎮上踅，踅過每蜀个街仔佮巷仔口，是袂當錯過的活動。

東港鎮的大鵬灣跨海大橋嘛是蜀个袂䆀的所在，天氣好的時陣，會當對橋頂看到小琉球，景色蓋媠，足適合翕相矣。

東港鎮毋但是𨑨迌的好所在，嘛是飼我二十幾冬的故鄉。希望逐家今仔日聽了會當閣較了解東港，嘛歡迎恁來東港踅踅看看矣。

逐家好，我今仔日欲共恁介紹我的故鄉—澎湖。

澎湖是台灣海峽中央的群島，總共有九十个大大細細的島嶼，其中，有十九个島有蹛儂。阮本身是本島儂，蹛佇湖西鄉潭邊村。

我感覺講澎湖上媠、上特殊的，是阮的石滬。石滬，是一種佇海坪咧掠魚的陷阱，是百偌年前，阮的祖先用黑石佮白石疊出來的。滬岸會當有幾百公尺遐爾長，閣較大的，嘛有千偌公尺的。

澎湖有六百口滬，是全球數量上濟、密度上懸的所在。

可惜，頂世紀的中期開始，有モーター的漁船出現，新型的掠魚家私、技術嘛漸漸普遍，魚予儂掠了了；另外，海墘的造港、造橋、造魚塭……等等的開發，嘛破壞了阮的環境。無魚掠就無儂顧，滬崩、滬埋，甚至有濃去拆滬，傳統的石滬咧欲予子孫放袂記。目前，猶閣完整的滬只賰兩成（百偌个）。

欲改變這馬的狀況，「填滬」技術的傳承就是重點。

填滬是古早有滬的儂攏會曉的技術，但是這馬會曉的人一支手就會當算出來。

阮是一陣轉來故鄉拍拼的少年家，想欲為著保存石滬文化貢獻一份心力，舊年開始，阮佮洪林罩（紅羅村）的師傅合作，共潭邊村新滬的滬房造起來；今年，阮嘛完造好洪林罩外港口滬的滬房。趣味的是，兩擺攏仝款，滬房一填好，鱟隨入，親像咧共阮祝福。

今年熱天，阮有開放作散工，蹛免錢、oo-tóo-bái免錢的機會，歡迎逐家佮阮作伙來澎湖體驗上在地的石滬文化。