中山大學文學院開設的課程「台灣閩南語音字書寫與閱讀」,佇咧十一月六號邀請少年的作家洪明道,分享伊的台語文創作之路佮(kah4)文學生活。中文系杜佳倫副教授特別共(ka7)洪明道的小說《等路》當做上課的教材,予(hoo7)學生事先(tai7 sing1)討論洪明道的台語文作品,會當閣(koh4)較親近這場難得的分享會。
「我寫台語文是為著欲閣較接近家己的故鄉,會使了解父母較早佇咧台灣社會的生活。開始書寫了後,作品毋但(m7 na7)愛對家己有意義;對社會嘛是。」洪明道表示伊開始寫台語文的動機佮伊自細漢的家庭佮學習背景有關係。伊講佇伊猶閣咧讀冊的時陣,雖然伊的母語是台灣閩南語;但學校攏是以華文的學習為主,予伊對本土語言感覺著真可惜。毋過洪明道嘛佮眾人分享佇伊學生時期,只要心情失落抑是失戀,攏會聽台語歌來「療傷」,算是一種無自覺的衝動。
紲(sua3)落來,洪明道嘛佮逐个分享台語佇伊的生活有啥物影響。佇伊細漢時的演藝界,大部分攏是香港來的明星。猶毋過真趣味的是,彼時陣的歌星,親像劉德華,佇伊的專輯內面,攏會收錄一條台語歌曲。可見佇彼陣,歌星欲(beh4)紅,嘛著愛靠著一屑仔(tsit8 sut4 a2)台語文的力量。
就是因為自細漢家庭佮當時文化背景的影響,予洪明道開始了「台語文寫作」這條路。對洪明道本身來講,寫作台語文有三个自我的見解。
第一,「毋但是文學的創作爾爾(nia7 nia7),閣較濟(tse7)的是愛保有家己的聲音。」洪明道認為,佇文學作品內底,若是無家己的靈魂,著干焦(kan1 na1)是為著創作去創作。伊嘛講笑詼(tshio3 khue1)表示:真濟文學獎作品毋是作者家己的老爸破病、倒佇病床;著是家己自細漢佇咧漁村大漢,是一個海上男兒。猶毋過,這攏是作者家己想的,只是為著欲增加作品的文學性佮故事的精彩,想欲得著頭獎而已。
第二,「作品愛有共鳴,予讀者看有。」對一個文學作者來講,上大的受眾著是讀者,作品若是無法度予讀者看有,只不過是作者家己寫了歡喜爾爾。
因為讀者的關係,上重要的著是洪明道台語文創作的主要理念:「內容愛較生活化。」洪明道講到遮,若(na2)笑若(na2)表示:因為對大部分的人來講,台語文已經是較困難的理解方式,為著欲解決這个問題,佇伊的創作理解內底,作品應該愛較生活化,除了會使倚(ua2)近讀者的生活以外;嘛會使用較簡單的生活故事去創作,予讀者讀作品的時陣,較袂(be7)離了傷(siunn1)遠,抑是因為文體是台語文著(tioh8)感覺驚惶(kiann1 hiann5)。
洪明道雖然佇文學界算是真少年的後輩,不過對伊的文學作品佮創作理念來看,是真材實料的文學家。伊嘛鼓勵想欲創作、行創作路的後輩,「用家己的方式,寫一个家己的故事」。中文系大學四年仔學生吳佳薌表示:「聽了洪明道的分享,毋但會使了解伊台語文的創作心酸;嘛予我感覺著少年作家的有為。」杜佳倫老師希望洪明道的真心分享,會使引𤆬(in2 tshua7)較濟大學生願意對生活中摭(khioh4)起得欲消失的台灣語文,寫出誠實的心聲。
--中文系蔡宗豪撰稿