阿公：

「欲看我上大學！」這是你捌共我講過的一句話。我知影彼是你對我的向望，希望我有美好的將來。細漢的時陣，上愛共你又閣大又閣圓的腹肚攬牢牢，不時扭一下尻川，跳一下舞，攏會當共你弄甲笑咍咍!我知影，因為阿公少年時，生活艱苦，面上的笑容無蓋濟，我希望有我佇咧的所在，你是歡喜快樂的。

毋過這擺你煞騙我，講好的約束你無做甲到。你猶原是遐爾仔安靜，連一句惜別的話攏無講，恬恬離開。我捌怨嘆過你的無老實，其實彼是我對我家己的怨恨，氣家己的無要緊。「欲看我上大學！」藏佇彼句話內底的愛，我有收著，你敢有看著？

佳宜 2019.10.16

阿舅：

八冬矣，毋知汝佇遐過了好無?敢有綴王爺公好好仔修行?會記得細漢時，阿母若看著汝買𨑨迌物仔予阮，伊攏會罵汝咧無彩工，我捌怨嘆過汝為啥物遮爾少年著來轉，害阿公阿媽為汝來艱苦?尾仔想想咧，無定汝只是用另外一種方式來照顧阮。我上後悔兮，就是汝猶佇病院時無去看汝。有一工，我相信汝會轉來，陪阮，我佮小弟仔，閣耍一擺 khe-tsu-pang。

侄仔 家豪

予家己：

自細漢出世佇這個家庭，成長佇這個以台語為主的環境，生活樸實、古意，對我也無啥物特別的要求。唯一佇遮會當感謝的，就是予我一個講台語的環境。我一直到國小猶擱ㄢㄤ無分(雖然到這馬猶是)，毋過我也袂感覺見笑。因為比起仝沿，我講的台語輪轉濟矣！

讀大學後，講華語佔較濟時間，雖然我真憨慢講話，但是我做人真實在。台語愛一直講落去，袂當凊彩放袂記！

梁竣雅 2019.10.16

To 阿嬤

雖然我無定定轉去大溪揣恁，但我會記得進前每一擺轉去，恁攏會去家己的菜園仔挽菜予阮𤆬轉台中食。恁種的逐項菜攏足好食，有番薯葉、紅菜、韭菜、菜瓜、有時koh4有金瓜thang1好食，彼時我感覺去菜園仔捉thang5的經驗嘛是足tshu3-bi7。Tsit4-ma2因為恁 kha1-thau5-hu1無好，加上年歲大的關係，所以無方便去菜園仔做sit4 ah0，我嘛因為佇高雄讀大學，無法度定定轉去，但是食恁的菜大漢的我，無袂記佮恁作伙抬槓作伴的時間。

恁上細漢的孫 呂沛慈

阿母

汝一直攏是阮上好的朋友、老師，甚至是明燈。親像大海，包容一切。親像日頭，照光逐个。雖然阮定定佮汝冤家，共汝揣麻煩，害汝氣甲腦充血。毋過汝猶原是阮心頭肉上軟的彼塊。

讀大學了後，較少見面，電話煞毋捌減講過。阮攏講袂想汝，無牽掛，彼攏是騙人的。阮足想汝。身體愛家己顧予好，等阮返去，擱佮汝去散步、開講。

愛汝的亮霆

TO 阿嬤

這幾冬，攏無看到你的形影，毋知影你最近過了好無? 阮不時攏會想起你舊底佇阮細漢時替阮炕(khong3)的紅菜頭排骨湯，內底摻了滿滿的芫荽(ian5-sui1)，滿滿的營養和骨頭中央的骨髓，一湯匙仔按呢共阮飼，彼个味阮永遠袂放未記。

大漢成人以後，報告和考試時常硩甲阮袂喘氣，定定懷念囝仔時住在頭橋的情景，阿嬤是阮的靠山，舊厝是阮的避風港，原本以為這个情形會當到阮出社會趁錢以後，好好仔報答你對阮的養育之恩，想袂到遐緊你就離開阮的身軀邊，留下停止的回憶在2016年，阮生日彼幾工。阮想欲對你講:「阿嬤，阮足想你兮」。希望你會當過了好勢好勢，後世人擱做你的孫，阮永遠愛你。

天鈞