O 25-N é o día no que reflexionamos sobre a eliminación da violencia contra as mulleres. Desde o equipo da EOI de Santiago, este ano queremos mirar máis alá do evidente e centrarnos nunha realidade complexa: as violencias interseccionais e o seu impacto en contextos de conflito.

Cando falamos de interseccionalidade, falamos de como se cruzan diferentes formas de discriminación –como o xénero, a orixe, a idade, a orientación, a identidade de xénero, a clase ou a discapacidade– e como esa combinación pode intensificar a violencia ou facer máis difícil o acceso á axuda. Non todas as mulleres viven a violencia do mesmo xeito, e non todas estamos afectadas polas mesmas desigualdades.

Neste sentido, a interseccionalidade chama a comprender os sistemas de opresión como forzas interconectadas que poden actuar en conxunto. Así, as mulleres atravesadas por estes distintos sistemas de opresión, poden ter aínda mais dificultades á hora de acceder a servizos de axuda, a información, a recursos…

En zonas de guerra ou emerxencia, esta desigualdade vese multiplicada: a violencia de xénero utilízase como arma de guerra, as mulleres en situación de extrema vulnerabilidade sofren riscos acrescidos, e o abandono institucional ou a fraxilidade dos sistemas de protección agravan a situación. Así, os conflitos implican un aumento significativo da violencia sexual e de xénero. 

Recoñecer estas realidades non nos divide: fainos máis conscientes e crea sociedades máis xustas. A igualdade real chegará cando todas as mulleres poidan vivir libres de violencia independentemente das súas circunstancias. A eliminación da violencia contra as mulleres pasa por mirar para dentro e construír desde fora.

Referencias e ligazóns de interese:

• Xunta de Galicia. Guía de recursos fronte á violencia de xénero en Galicia. En liña.

• Canadian Research Institute for the Advancement of Women. A Guide to Building Feminist Intersectional Solidarity. En liña.

• CIG-Ensino. Propostas didácticas para traballar nas aulas de secundaria o 25N. En liña.

• International Organization for Migration (IOM). Intersectional Gender Analysis Toolkit. En liña.

• European Institute for Gender Equality (EIGE). Gender-based violence and crises. En liña.

• Office of the United Nations High Commissioner for Human Rights (OHCHR). Women’s human rights and gender-related concerns in situations of conflict and instability. En liña.

• OVS. Interseccionalidad y violencia sexual. En liña.

• STEG. Ser muller, dobre tortura. Propostas didácticas para o 25N. En liña. 

• UN Women. Intersectionality Resource Guide & Toolkit. En liña.

• United Nations Children’s Fund (UNICEF). Gender-based violence in emergencies. En liña.