Mensahe mula sa Punong Guro

Sa bisa ng Proclamation No, 479 na nilagdaan ng Pangulong Fidel V. Ramos noong taong 1994, ipinagdiriwang tuwing buwan ng Nobyembre ang Filipino Values Month. At haligi ng pagdiriwang na ito ang Maka-Diyos, Makatao, Makakalikasan at Makabansa.

Ang Paaralang Elemenatarya ng Don Galo ay nakikiisa sa pambansang pagdiriwang na ito ngayong taon na may temang “Batang Pilipino: May Positibong Pagpapahalaga sa Gitna ng Kalamidad at Pandemya”.

Ang taong 2020 ay sumubok sa ating mga Pilipino dahil sa kabila kabilang pagsubok na ating naranasan. Ngayong taon mas lalo nating pagtibayin ang pagiging Maka-Diyos. Patuloy na manalangin at kumapit lamang sa ating Poong Maykapal.

Patuloy din tayong tumulong sa ating kapwa higit lalo na sa mga nangangailangan.

Bigyang halaga ang ating inang kalikasan. Sa simpleng paghihiwalay ng basura at pagtapon nito sa tamang lugar, pagpapanatili ng kalinisan sa loob ng tahanan at kapaligiran at pagtatanim ng mga halaman sa ating paligid ay malaking tulong upang mapanatili ninyong buhay at masigla ang kalikasan.

Manatiling tapat sa bayan, sumunod sa patakaran ng komunidad.

Ang mga ito ay ilan lamang sa mga Pagpapahalagang Pilipino na dapat tandaan ng mga mag-aaral na tulad ninyo.

Sa kabila ng ating sitwasyon ngayon, manatili kayong positibo na matatapos din ang lahat ng ito sa biyaya at awa ng ating Diyos.

Michelle D. Camposano

School Principal

Sa panahon ng pagsubok at pangangailangan lalong inaasahan ang pagtutulungan at pagkakaisa. At dahil walang edad na pinipili ang pagtulong at disiplina, ang mga mag-aaral ng Don Galo Elementary School ay nakiisa sa pagsulong ng mga ugali at asal na natatangi sa ating mga Pilipino.

"Ako po ay sumusunod sa aking mga magulang sa pamamagitan ng pakikinig sa kanilang mga turo, pagsasabuhay ng magandang asal at sa pagtulong sa mga gawaing bahay."

Shaunn Erl Raut-Raut

Kinder- Pink

"Sa nagdaan na kalamidad, aking nabatid ang kahalagahan ng ating kapaligiran. Bilang pagmamalasakit sa ating kapaligiran, aalagaan ko po ang aming halaman sa pamamagitan ng pagdidilig nito araw-araw."

Julien Angela Gumpal

Grade 1- Mangga

"Ang ilan sa ating mga kababayan ay lubos na naapektuhan ng nagdaan na kalamidad. Upang makatulong sa aking kapwa, ang aking mga damit na maayos pa ngunit hindi ko na nagagamit ay aking ibinigay sa mga nasalanta ng bagyo."

Jillian Kylee Howell

Grade 2- Rosal

"Ngayong nakakaranas tayo ng pandemya at kalamidad, ako at ang aking pamilya ay patuloy na nagdarasal para sa kalusugan at kaligtasan ng bawat mamayang Pilipino saan mang bahagi ng mundo."

Kaithlyne K. Brual

Grade 3-Agila

"Sa gitna ng pandemya at kalamidad, hindi natin maiiwasan ang matakot. Ngunit sa tulong ng aking pagdadasal, pananalig sa Diyos at sa mga payo ng aking mga magulang, naging positibo ang aking pananaw at naging matatag ang aking loob na malalampasan natin ang mga pagsubok na ito. Dumaan man ang matinding unos, sisikat din ang panibagong araw na magbibigay ng bagong simula at pag-asa."

Yassi Carolyne S. Rodriguez

Grade 4- Ruby

"Ngayong panahon ng pandemya mahalaga ang pagtutulungan upang mapagaan ang pang-araw araw, na gawain. Ang pagtulong sa ating kapwa ay dapat nating isapuso kahit sa ating mumunting pamamaraan , tulad ng pagtulong sa pagbubuhat ng pinamili ng aming kapitbahay na aking ginagawa."

Crayne Luis Peñalosa

Grade 5- Aguinaldo

"Ngayong pandemya ay nagagawa ko ang lahat ng gawaing-bahay na nakaatang sa akin pagkatapos ko mag-aral gamit ang module. Disiplina lang ang kailangan!"

Julia Lorin Gumpal

Grade 6- Neptune

Ang kaukulang permiso para sa mga larawan ng mga mag-aaral ay ipinagkaloob ng kanilang mga magulang.

Page updated

Report abuse