Sa tuluyan at mabilisang pag-usbong ng teknolohiya at midya, ang radio broadcasting ay tumatayo bilang mabisang plataporma upang maiparating ang boses ng kabataang Pilipino lalo’t higit sa konsepto ng pampaaralang pamamahayag. Itinuturing ito bilang boses na kumakawala upang maipabatid ang mga makatotohanang bagay na nagmumulat sa bawat indibidwal upang lubos niyang maunawaan ang mundong kanyang ginagalawan. Sa ilalim ng Campus Journalism Act of 1991, o mas kilala bilang Republic Act No. 7079, binigyang diin ang pagtataguyod at pangangalaga ng malayang pamamahayag sa mga paaralan sa Pilipinas na naglalayong hubugin ang etikal na pagpapahalaga, pagkamapanuri at pagkamalikhain ng mga kabataang Pilipino.

Tatlong Pangunahing Tungkuling ng Radio Broadcaster

Pangangalap ng Balita - to ang proseso ng pagkuha ng impormasyon mula sa iba’t ibang pinagmulan tulad ng panayam, obserbasyon, dokumento, at iba pa. Layunin nitong makakalap ng tama, sapat, at napapanahong datos para sa balita.
Pagsulat ng Iskrip - Ito ang paggawa ng organisado at malinaw na teksto o balangkas ng balita o programa. Dito inaayos kung paano ilalahad ang impormasyon upang maging madaling maunawaan ng tagapakinig
Pagbabalita- Ito ang paraan ng pagsasalita o pagbibigay ng balita sa radyo. Mahalaga rito ang malinaw na boses, tamang diin, wastong pagbigkas, at kumpiyansa upang epektibong maiparating ang mensahe.

Kasapi ng Isang Radio Broadcasting Team

Anchor – Ang anchor ang nangunguna sa programa at siyang nag-uugnay ng mga bahagi ng broadcast upang maging maayos ang daloy nito.
News Presenter – Ang news presenter ang nagbabasa at naghahatid ng balita nang malinaw, tama, at obhetibo sa mga tagapakinig.
Scriptwriter – Ang scriptwriter ang nagsusulat ng iskrip ng programa at tinitiyak na organisado, malinaw, at angkop ang nilalaman nito sa radyo.
Technical – Ang nagsisiguradong maayos na tunog ng broadcast at nagbibigay buhay rito sa pamamagitan ng paggamit ng mga tunog teknikal.
Infomercialist – Ang infomercialist ang gumagawa at naglalahad ng patalastas na nagbibigay-impormasyon gamit ang malinaw at makahikayat na pananalita.

Microphone, Speaker ,Mixer ,Recorder, Timer ,Downloaded Application for Music , Laptops , printer, bondpaper and stapler

Siguraduhing malinaw, maikli, at direkta ang headline upang agad maunawaan ang paksa ng balita. Sa lead in, ilahad ang pinakamahalagang impormasyon upang makuha ang atensyon ng tagapakinig. Samantala, sa katawan ng balita ay ayusin ang detalye mula sa pinakamahalaga hanggang sa pantulong na impormasyon habang pinananatili ang katumpakan, kalinawan, at wastong paggamit ng wika.

Paalala sa paggamit ng musika, siguraduhing bago sa pandinig, malinis, at akma ang musika sa tema ng balita at sa boses ng tagapagbalita. Iwasan ang musikang masyadong malakas o nakaaagaw ng atensyon upang manatiling malinaw at propesyonal ang paghahatid ng balita.