ESKUTITZA
MIREN OLASOLO
Familia maitea:
Kaixo! Ni naiz, zuen txikitxoa. Buruan ditudan oso, oso garrantzitsuak diren gauza batzuk kontatzeko idazten dizuet.
Goizeetan elkar ikusten dugunean, gustatuko litzaidake superheroi baten indarra emango didan besarkada bat ematea egun osorako. Eta eskolara bila etortzen zaretenean... ikusten nauzuenean, gustatuko litzaidake mugikorra poltsikoan gordetzea. Horrela, ni naiz zuen altxorra eta ez pantaila.
Gustatuko litzaidake afarian pantailarik ez egotea. Batzuetan, denok batera afaltzen dugunean, telebista piztuta edo mugikorrekin, sentitzen dut ez dugula hitz egiten nola joan den eguna. Eta nire burua... nire burua asko nekatzen da hainbeste pantailarekin. Gustatuko litzaidake indartsu egotea milaka abenturatan pentsatzeko.
Gainera, pentsatu dut izugarria izango litzatekeela, lotara joan aurretik, ipuin bat irakurtzea. Eta, batzuetan, kontatzea zuen ipuin gogokoena txikiak zinetenean. Izan ere, niretzat, une horiek edozein jostailu baino hobeak direlako.
Eta apur bat nagusiagoa izan nahi dut. Gustatuko litzaidake zuek uztea neuri zapatak jartzen edo tortilletarako arrautzak irabiatzen laguntzen. Badakit denbora asko behar dudala eta batzuetan gaizki egiten ditudala, baina ikasi nahi dut. Eta nire jostailuak jasotzeko esaten didazuenean, gustatuko litzaidake azkenean zuek ez jasotzea nire ordez. Denbora pixka bat ematen badidazue, nik neuk egingo dut. Hori bai, batzuetan zuek ondoan egotea beharko dut.
Eta azken gauza bat... Batzuetan, arauak jartzen dizkidazuenean edo "ez" esaten didazuenean, haserretu egiten naiz, baina barrutik badakit ni zaintzeko egiten duzuela. Ez izan beldurrik nirekin firme jartzeko, horrek seguruago sentitzen eta ume ausart bat izaten laguntzen didalako. Maitasunez egiten baduzue, badakit ondo hazteko egiten duzuela.
Badakit asko maite nauzuela eta dena niregatik egiten duzuela. Nik ere ilargiraino maite zaituztet.
Zuen pirata gogokoena.
