多語文競賽資料

閩語朗讀05 無聲的鼓勵 薛玉麗

聽阿母講，我拄學會曉講話，就足愛唱歌。小學三年 的時陣，學校的合唱團咧選團員。我知影了後，隨共老師 報名。轉到厝，袂輸考著第一名咧，誠歡喜就共阿母講這 个消息。阿母看我講甲喙角全波，笑笑講：「干焦報名爾， 你就歡喜甲按呢，真正有影愛唱歌。」 一禮拜後公佈名單，我煞無入選。我足失望嘛足艱苦， 老師安慰我講：「明年猶閣有機會，老師才閣共你報名。」 就按呢上音樂課的時，我攏會斟酌聽，向望有入選的條件。 到四年仔，仝款無法度入去合唱團，我是有氣無地敨， 干焦會當吼，逐工攏足鬱卒。若到散學，我會坐佇阮兜邊 仔的社區公園，心內想講：「我哪會遮頇顢，唱歌敢有遐困 難，我毋相信練袂會。」我就佇公園一擺閣一擺、一直練 一直練，等到我忝矣，才看著坐佇邊仔彼个老阿伯，伊敢 若聽甲誠歡喜閣共我比「讚」，我是歹勢甲走若飛咧！ 逐工學校若放學，我就會來這个公園，共音樂老師教 的一直餾。邊仔彼个阿伯，逐擺攏會頕頭，對我笑咧笑咧， 仝款共我比「讚」，有時閣會拍噗仔呢！有彼个阿伯的鼓勵， 我更加有勇氣，繼續練落去。俗語講：「有心拍石石成穿， 有心開山山成園。」這馬我已經五年仔，嘛達成願望入去 合唱團，真正是俗語講的：「戲棚跤徛久就是你的。」 有一工雄雄想著公園的老阿伯，我就去揣伊，欲共報 告這个好消息，毋過幾若工攏揣無。我無放棄，照常仝款 彼个時間去公園等。有一工我佇遠遠的所在，看著一个足 熟似的形影。我三步做兩步走過去，真正是彼个阿伯，我 共伊講：「我已經入去合唱團矣，誠多謝你的鼓勵。」伊頭 頕咧頕咧，笑甲誠歡喜，仝款共我比「讚」。這个時陣，拄 好公園管理員阿叔行過來，看比手畫刀，我是看甲霧嗄 嗄，毋知咧講啥。落尾才知影，這个阿伯是聽有，毋過 袂講話。「Ha̋nn！阿伯是啞口喔！」我感動甲流目屎，共 阿伯講：「你無聲的鼓勵，我會永遠記佇心肝底。