BIDIDU  TEAM  LËTZEBUERG

Dëst Joer hëlleft BIDIDU beim Télévie!! 

22/04/23 zu Béiwen/Atert am Centre Lëtschert

Dir wëllt dësen Dag eppes Guddes maachen, an zwar am duebele Sënn? Sport maachen, an dobäi Sue sammelen fir den Télévie!!

Mir organiséieren eng 6 Stonnen Vëlo-Course, hei steht de Spaass am Virdergronn.

Pro gefuere Ronn, fëllt sech den Télévie Konto duerch eis verschidde Sponsoren, déi mir mat u Bord geholl hunn...... 

Et kann een als Eenzelfuerer, wéi och als Team vun 2-8 Biker fueren.

D'Streck geet iwwert eng Längt vun 2,2 Km iwwert Bëschweeër ( Mix Singletrails/breed Weeër ) an ass fir all Biker vun 10-99 Joer fuerbar.

Et ass Iech fräi iwwerlooss, mat wat fir engem Vëlo dir fuere wëllt: ob Eerad, Citybike, Laafrad, Crosser, Mountainbike,  Fatbike, Coursevëlo, Klapprad oder Trottinette..... jo mir drécken souguer bei Pedelecs an E-Bikes en An zou!

De Start ass um 10:00 virum Pompjeesbau zu Béiwen.

Ab elo sinn 6 Stonne Spaass ugesoot, et gëtt gestrampelt an esou vill Ronne wéi méiglech gesammelt.

Mir wieren awer nët BIDIDU, wa mer Iech einfach sou géngen d'Ronnen dréine loossen. 

Ënnerwee kann et mol sinn, datt der verschidden Aufgabe léise musst, sou kënnt der Iech Bonusronnen erspillen.

D'Gewënner an all Categorie gewannen natierlech eppes!! Mee mir kréinen awer och dee flottsde Vëlo an déi schéinste Verkleedung.

Mir froë kee Startgeld, mir wieren awer frou, wann der beim Start eppes an eis Spendekëscht fir Télévie geheit.

Umeldungen online iwwert dëse Formular: 

Fir Kuerzentschlossener, kënnt der Iech awer och den Dag selwer nach virun 10:00 bei eis umellen.

Kontakt: bididuteam@hotmail.com

BIDIDU TRAIL 18/05/2023

Den 18. Mee ass rem éise BIDIDU TRAIL mat 4 Strecken, dir kënnt déi schéi Natur elo op 20Km, 30Km, 46Km oder 60Km geneissen, 

mat flotten Ravisplazen, natierlech mam gewinnte Luxus, frësch Pangescht an Espresso um Ravi "beim Preiss"

Eis Zebras si schon aus dem Stall a "brauen" fläisseg d'Drëppen a sammelen Gummibärchen fir iech

De Start ass vun 08:00 - 10:00 zu Bruch/Miersch um Foussballsterrain.

Startgeld sinn 8€/Streck, Umeldungen sinn den Dag selwer bei der Aschreiwung.

Bezuelen kënnt der Cash, per Bancomatskaart oder Digicash

Nom Tour kënnt der Duschen, de Mountainbike wäschen an eppes däfteges vum Grill ( och Vegetaresch ) iessen.

Infos zu de Strecken:

20Km mat 470Hm an 1 Ravi

30Km mat 630Hm an 1 Ravi

46Km mat 960Hm an 2 Ravien

60Km mat 1520Hm an 3 Ravien