НҮБ-ын Боловсрол, шинжлэх ухаан, соёлын байгууллага болох ЮНЕСКО-оос жил бүр 11 дүгээр сарын 3 дахь долоо хоногийн Пүрэв гарагт Дэлхийн философийн өдрийг тэмдэглэдэг уламжлалтай. Энэ удаагийн Дэлхийн философийн өдөр болон Монгол Улсын Их Сургуульд Философийн салбарын  60 жилийн ойг тохиолдуулан МУИС-ийн Философи шашин судлалын тэнхим, ШУА-ийн Философийн хүрээлэн, МУИС-ийн Философийн салбарыг төгсөгчдийн холбоотой хамтран “Философи, институт, нийгэм: Шүүмжлэлт сэтгэлгээг эрхэмлэхүй” сэдэвт эрдэм шинжилгээний хурлыг зохион байгуулах гэж байна. 

Өнөөгийн ертөнц бидэнд байнга суралцах, гаргасан шийдвэрээ дахин нухацтай бодож үзэх, ажил амьдралынхаа хэв маяг, үнэт зүйлээ тасралтгүй эргэцүүлэн үнэлэх шаардлагыг тавьж байна. Ялангуяа хиймэл оюун ухаан, цахим хэрэглээний эрин үед шүүмжлэлт, нухацтай сэтгэлгээг эрхэмлэх нь улам бүр чухал болжээ. Түүнчлэн боловсрол, тэр дундаа дээд боловсролын үүрэг, хариуцлага, статусын асуудлыг хөндсөн эргэцүүлэл, судалгаа, яриа хэлэлцүүлэг ч ихээр өрнөх болов. Их сургууль, институт нь зөвхөн мэдлэг бүтээх, олгох төдийгүй бие даан сэтгэх, асуух, үндэслэл гаргах, дүгнэх чадвартай, нийгмийн хариуцлагатай иргэдийг төлөвшүүлэх үүрэгтэй билээ. Энэ хүрээнд философийн гүйцэтгэх үүрэг, эзлэх байр суурь, нөлөөллийн талаар салбар дундын шинжтэй, бүтээлч, шүүмжлэлт хэлэлцүүлэг өрнөх бололцоог харгалзан “Философи ба нийгмийн өөрчлөлт”, “Хүмүүнлэгийн боловсрол ба эрхэм чанар”, “Олон ургалч үзэл ба рационал дискурс” гэсэн дэд сэдвүүдийг санал болгож байна. 

Энэхүү хурал нь боловсрол, нийгэм, улс төр, шүүмжлэлт сэтгэлгээнд хамааралтай философи асуудлаар судалгаа хийдэг эрдэмтэн, судлаач, мэргэжилтнүүдийн хамтын ажиллагааг өргөжүүлэх, холбогдох онол арга зүйн шинэ чиг хандлага, тулгарч буй сорилт, дэвшүүлж буй үндэслэлийн талаар хэлэлцэх, мэдлэг туршлага солилцох зорилготой юм.

Эрдэмтэн судлаач, багш та бүхнийг энэхүү эрдэм шинжилгээний хуралд сүүлийн үеийн судалгаа, бүтээлч санаагаа хуваалцан оролцохыг урьж байна.

Философи ба нийгмийн өөрчлөлт:

• Монголын философийн 60 жилийн замнал: түүх, өнөө, ирээдүй

• Их сургууль, академик эрх чөлөө ба нийгмийн хариуцлага

• Байгаль орчин, тогтвортой хөгжил ба философи

• Үндэсний болон дэлхийн иргэн гэж хэн бэ?

Хуралд оролцогчдын мэдүүлэг, хураангуйн хүснэгт: