इउ. एन. एकाडेमि

            जानुवारि, 2002 माइथायाव फसं जानाय क’क्राझारनि इउ. एन. एकाडेमिया देग्लाय आबुं नैजिथाम बोसोर जाफैबाय । बे एकाडेमिया बर’ बिजोंनि सोलोंथाइ आरो फरायसाफोरखौ गुनगोनाङै जौगाहोनो जेरैबो नाजाबोदों । बर’ बिजोंनि सोलोंथाइ फोथाराव गोबां बर’ फरायसाफोरनि सांग्रांथि गैयै जालांनाय, बर’ बिजोंनि सोलोंथाइ फोथाराव जौगाखांनो हायै थासारि, बर’ राव आरो बिजोंखौ एंगारनानै गुबुन बिजोंजों फरायनाय बाइदि थासारिफोरखौ फोसाबनायनि थांखिजों बे एकाडेमिनि जोनोम ।

 झारबारि, इउ. एन. एकाडेमि:

         झारबारि दखरा दुलारय बर’ फरायसा आफादा झारबारि ओनसोलनि सोलोंथाइनि थासारिखौ नोजोर होनानै दखरानि सिङाव गुन गोनां सोलोंथाइ फसंथान गायसन नांगौनि गोनांथिखौ मोन्दाङो आरो जौगा थाखोनि गुनगोनां सोलोंथाइ फसंथाननि गेजेरजोंसो ओनसोलनि सोलोंथायारि बिथिंखौ जौगाहोनो हागोनखौ नुहरो । बेनिखायनो दखरा आफादा गंसे गुन गोनां फरायसालि हिसाबै झारबारियाव एउ. एन. एकाडेमि फरायसालि गायसन नांगौनि गोनांथिखौ लानानै ओनसोलनि मेलेमजिबि-दैदेनगिरिफोरजों झारबारि दखरानि मावख’आव 31 आगस्त, 2014 खालारखालि बेंखन सावरायलायो आरो गोबां सावरायनायनि गेजेरजों बयबो इउ. एन. एकाडेमि बादि सोरखारि नङै गुनगोनां फरायसालि गायसननायनि गोनांथिनि फार्से सुबुरुन होयो आरो बेखौ मोग्थां महर होनो थाखाय दखरा आफादखौ मावफुंनो गनायथि होनाय जायो । बे गनायथि मोननाय बादियै झारबारि दखरा दुलाराय बर’ फरायसा आफादा झारबारि दखरानि सिङाव इउ. एन. एकाडेमिनि फरायसालि गायसननो थाखाय गिबियै 3 सेफ्तेम्बर, 2014 खालाराव इउ. एन. एकाडेमिनि बिथोनगिरि मानगोनां कृष्ण गपाल बसुमथारिजों सावरायो आरो बिथांनि सुबुरुन  लानानै झारबारियाव  इउ. एन. एकाडेमि गायसननो थाखाय दखरा आफादा  बिथोनगिरि  बर्ड  दानानै लानाय जायो । बे बर्डआ फरायसालिखौ मोग्थां महर होनो थाखाय गामिनि रायजो-राजा बयनावबो इसे एनै हेफाजाब आरो अनथोब मोनगोननि मिजिं लानानै आवगायनाय जायो ।

         बा बोसोरनि गेजेराव बे गोदानै गायसननो गोनां फरायसालिखौ माबोरै जौगाहोलांगोन बेनि मोनसे मावथांखि रायफोरथि गथायनानै बर्डआ मिरु इउ. एन. एकाडेमिनिफ्राय गनायथि  (affiliation) मोन्नो हायो आरो एकाडेमिनि फराफारि आरो खान्थिफोरखौ नोजोर होनानै फरायसालिखौ जौगा होलांबाय थानो थांखि लायो । थांनाय 2015 माइथायनि जानुवारि दाननिफ्रायनो फरायसालिखौ बेखेवनानै सोलोंफारिखौ जागायनानै सामब्लायबोबाय थादों ।

आथिखालनि मुगाया खाबु होयो जायफोरा गावनि गुन गोनां सोलोंथाइनि गोहोजों बादायनानै सौसि लांनो हायो आरो गावखौनो खाब जानाय (fit) महरै गायसननो हायो । बै बादि फरायसा दानानै इयुन जोलैनो नंगुबै लामा दिन्थिनो  थाखाय झारबारि इउ. एन. एकाडेमि बर्डआ ओनसोलनि साफ्रोम बिमा-बिफाजों लोगोसे फरायसाफोरखौ लानानै आगान सुरबोनाय जादों ।