每年3月23日就是媽祖生；tī府城有一間大媽祖廟，是祀大媽參二媽。後來有分二媽ê神像去北港奉事，號做北港媽；幾若年以來，有風聲伊ê名興到南北二路，四圍ê男女不止熱心服事，有ê去北港燒金，有ê來府城，無定著。北港ê二媽有時三月面著來府城，探大媽。

今年3月14日，有入府內；未到城門ê時，城內外ê廟有十外頂大輦出城去等接--伊。Teh-beh相近ê時，大家相爭愛先接--著，搶頭香較有名聲，走到冤家，三老爺宮較處頭鏢，大旗舉無抵好，hō͘普濟殿境ê人lì-lì破，tuì hit-tia̍p就拾恨。抵抵入城ê時大家就相扑--lah，chham賣物ê擔續lòng-lòng--倒，以及賣粉粿ê甌仔也續提--起來準石頭相擲，舉人ê店窗枋做器械來摃--lo͘h！參toè teh隨香查甫查某也著傷不止濟人；佛轎有ê也續扑歹，兩爿有ê著傷真傷重，致到著扛去hō͘縣主驗，也續掠4個人送落縣。

三老爺宮真m̄願倒轉去叫人來截tī半路beh扑--伊，抵抵普濟殿ê佛轎過，beh倚兩間厝遠，就hō͘伊圍--teh。M̄-kú普濟殿強koh chhoàⁿ，tó͘-ngē犁--過去，tī-hia又koh怨家，佛轎扛走到小媽祖，hia ê人就來kā in做公親。佛轎hō͘小媽祖留隔一暝，才hō͘伊扛倒--去。三老爺宮ê人著傷不止濟，普濟殿也無少。

像hit 日下太子佮南廠也扑到不止傷重，是因為頂pang去送南鯤身王爺就有積怨。

到16日北港媽beh倒--去，縣主就照次序排列hō͘ in送出城，武營也派兵去持防，是驚了hiah-ê佛轎koh冤家。送出城ê佛轎佮人已經倒轉--來，北港媽就行，beh近洲仔尾社，hia ê人也來接--伊，續送過in ê社，嶄然有hiah遠；hit 時in ê厝就hō͘火燒真濟間，續無人thang扑火，到in倒轉來火已經hoa--lah！可見敬佛會害人真慘--lah！

台灣民間宗教ê傳說(2)

因為以上有講大道公kap媽祖婆 ê戀愛史,所以這時beh將媽祖婆 kap大道公ê傳說分別來講。

關係媽祖ê傳說真濟款，其中有真濟差不多boē相信得ê傳說也boē少。總是小弟chia-nih事先來講出伊真實ê歷史，以後chiah來講伊ê傳說。

咱頂面已經有淡薄講過媽祖是出世tī 宋太祖建隆（建隆）元年，就是A. D. 959 î, 到現在tú-好是1006年前，伊出世ê所在是福建省興化莆田縣湄洲島（福建省興化莆田縣湄洲島），伊ê老父是名林Î-khak（林惟？），teh做督巡官.媽祖是伊ê 第 6 ê 查某囝,因為出世以後經過成月日攏無哮，in老父就kā 伊號名做林默（林默），後來人稱伊做默娘, tī 8 歲 ê時就入私學仔讀冊，聽講自細漢就不止聰明，koh真好記持,若過目過就攏無boē記得，又擱真gâu幫贊老母ê工作，所以一家ê人攏真疼伊。

有一擺,伊ê老父kap伊ê兄哥坐船出外，真不幸，tī beh 轉來ê時遇著風颱péng船,只有伊ê兄哥得著救倒轉來，老父soah失蹤，伊聽著這個事真大傷心。到伊 13 歲 ê時，就決意學習中醫, tuì伊ê聰明kap認真，就伊ê 醫道不止高明起來，當時一般-tek無有衛生常識kap醫學知識。所以有真濟貧民, tú-著破病來死。默娘真同情in,盡力來幫贊醫治in,所以受著一般人所o-ló kap尊敬。

總是tuì伊ê老父死了後，伊ê老母也為著煩惱起破病，雖然受著兒女ê奉待也無彩工,就離開世間lah. Hit霎以後，默娘時常目屎流滿面，不時to teh想伊ê父母，甚至tī眠夢ê中間也teh哮伊ê父母。

Tú-tú 默娘 27 歲 hit年ê 重陽節, 逐個人to去peh山, 默娘也kap人去peh. 當伊peh 到高山ê時，看到南海ê風湧，就koh想到in老父不幸ê時，向南方大哭，哭到 自制不住,就向南海ê大湧中跳落去，tuì án-ni結束了伊 27年ê人生，hit年tú是雍熙丁亥年（雍熙丁亥年）。因為伊平常時hō͘人疼惜尊敬，人就講伊是tī 重陽hit日上天去。關係伊ê歷史是真--ê,是後來ê人出tī尊敬ê心來造--ê.

所以有人講當伊ê老父kap兄哥遇著風颱péng船 ê時，默娘teh織布，即時伊ê 神魂去南海救伊ê兄哥，hit時講伊親像sîn--去，抑是親像睏--去，到醒來ê時人問伊，伊chiah講是去救伊ê兄哥。可惜救伊ê老父救無tio̍h,傳說中講伊常常親像án-ni去救péng船 ê人，後來chiah受稱做海神。Koh講有漁船tī出海中遇著風颱ê時，kiàn求媽祖保庇，就tī 船帆頂看見有火星phi̍h-phia̍k-叫，討魚人講：這就是媽祖來teh beh救in ê記號。Koh傳說講：tī 宋, 元, 明, 清等, 各朝ê 朝廷派使節去日本，抑是琉球ê時，in ê 船若遇著風颱，就有一對紅燈 tī 船前chhoā路，hō͘ in安然出險.

Koh有傳說講：當宋朝高宗 ê時，有金人來侵犯中原,講高宗對寧波落船beh閃避，總是金兵tuì後面直直追,講忽然間海中起一陣ê神風,將金船吹翻--過, 高宗ê 船 chiah安然出險,為著 án-ni, 宋朝高宗 chiah 封默娘做太后, koh 根據澎湖紀略（澎湖紀略）ê記載講：到每年ê 3月23日媽祖生 hit日，講大海洋ê大魚，小魚攏聚集到澎湖 ê媽祖廟前來朝拜媽祖，講連鯨魚也乘風作弄來拜媽祖。Koh傳說講：台北關渡ê 媽祖廟落成ê時，有成千,成萬 ê海魚tè 流到媽祖廟前，se̍h一lìn chiah koh tè 流泅出去，chiah ê攏是為著尊敬默娘生出來ê傳說

當雍熙丁亥年ê 重陽節, 默娘為著憂傷父母過頭，tuì山頂跳水自殺, in鄉里ê人就為伊起廟，稱伊做通賢聖女（通賢聖女）。消息傳教朝廷,皇帝就封伊做"妃"（妃）。到元朝就ka 封伊做"太妃"（天妃）。到明朝 ê時，就ka 封伊做「聖妃"（聖妃）。到清朝 ê時chiah 敕封伊做「天上聖母"（天上聖母）。

咱看tī台灣媽祖廟ê 明清有幾若款，親像有"天后宮,」"天妃廟，」也有「媽祖宮" 等.假使tī 相像一個地頭有兩間以上ê時，就名做"福安宮" 抑是"普濟殿,」抑是「廣濟宮"等,無相像ê廟名。

Tī台灣最早起ê媽祖廟，thang講是澎湖 ê "天后宮,」伊ê 建設時期大概tī 明神宗萬曆（明神宗萬曆）以前，原因是中國魚民來澎湖定居有khah早台灣50年ê緣故，除了澎湖 ê 天后宮以外，最早ê就是台南安平 ê "開台天后宮,」聽講這是鄭成功tī 永曆（永曆） 15年tuì河南奪回以後ê 永曆 22年，伊ê 船隊 tuì湄洲嶼（湄洲嶼）ê媽祖廟中toà--來，尚且講是起tī河南政府所起ê基督教禮拜堂ê jiah, (這間禮拜堂tī 鄭成功beh 上陸 ê時tio̍h 砲彈歹去)。Tuì 這霎以後，媽祖廟chiah 起 tī台灣ê 逐所在，親像 tī鳳山, 台南, 北港等, to是tuì 這間分開出去ê,這in叫-做"分靈"（分靈）。這種"分靈" ê方法，只有是the̍h寡舊廟ê 香灰, koh鑿一身新（新）ê像，án-ni就thang另外koh 設一間媽祖ê廟。尚且也講是kap 安平 ê 開台天后宮保持血統關係, koh 安平開台天后宮是tuì 湄洲（湄洲嶼）來ê, tuì án-ni,攏有血統關係，這種血統關係，也叫做派生關係（派生關係）。所以若遇著安平ê 開台天后宮teh 做醮ê時，就chiah ê派生關係ê媽祖廟tio̍h 扛 in ê偶像去安平匯集,這是in照常ê例。後來開台天后宮 ê媽祖去hō͘ 湄洲嶼討倒去，tuì án-ni, 台南關帝廟邊hit 間勅建天后宮（勅建天后宮）變做第一早ê. 這間勅建天后宮是施琅（施琅）平台以後，將台南舊寧靖王府（寧靖王府）改建做媽祖廟。所以稱做勅建天后宮,連台灣稱做最大ê 北港媽祖，經過幾年tio̍h一擺工來朝拜勅建天后宮ê媽祖。

以上大概是將媽祖ê真實歷史kap後代ê人所造 ê傳說，以及關係媽祖廟ê事簡單講了。（待續）