報紙訪問内容：

【娛樂人物】叱咤賽果唔覺輸畀姜濤仲舒口氣 林家謙聲線被笑似公仔聲有治癒

林家謙的四首MV中，包括《一人之境》及新歌《時光倒流一句話》，在YouTube有逾100萬點擊。上月他拒絕接受《蘋果》專訪，表示叱咤頒獎禮舉行在即，不想別人以為他造勢，結果訪問延遲一個月，最終他奪男歌手銅獎及作曲人大獎，我最喜愛的男歌手及歌曲獎則由姜濤奪得。輸給姜濤，他反而舒一口氣︰「如果我攞係壞多於好。」

相關新聞：感恩林一峰真心相待

撰文：余燕儀

訪問當天，29歲獨立歌手林家謙單拖現身，沒有經理人和助手陪同，頭髮及化妝自己搞掂。談到敗給姜濤（姜B），他說：「我又唔係好覺得係輸，姜濤係得人鍾意，我自己都投佢男歌手，講真嗰晚聽到係姜B，我係舒一口氣，好驚係自己，如果攞咗對我係壞多於好，你鍾意我啲歌已經好開心，反而你投我個人，我好驚真係攞咗，好大壓力，下年點做呢，好驚做得衰。」有否聽姜濤的歌？他說︰「有，叱咤嗰晚佢唱live唔錯，姜B把聲有辨式度，我扮唔到佢，佢亦扮唔到我。」

攞獎「係咪值」

不過林家謙曾經對自己聲線沒信心，轉聲時更甚︰「覺得把聲唔屬於自己，難控制。」他於2014年開始寫歌，成名作有陳奕迅（Eason）《是但求其愛》及王灝兒（JW）《矛盾一生》，四年後他才轉做唱作歌手出單曲︰「攞獎後有開心亦有擔心，開心係有樂迷鍾意我唱歌，但擔心攞呢個獎係咪大家覺得值。」談到網民關心其身高，林家謙自揭：「171cm，同Eason一樣。」

樂迷讚林家謙有治癒系聲線，他認為要夾耳緣︰「陳奕迅話塞車會𤷪，聽完我嘅歌佢會舒服咗，係耳仔緣份。」Eason讚他聲音好得意：「係呀，佢成日笑我吸咗氫氣（其實係氦氣）好似公仔聲，我嘅聲質係有少少奇怪。」但他卻堅持自己風格︰「過份調整咗就唔係我。」

內向的林家謙當初轉做唱作人，曾經有過一番掙扎，他用手指樣、指身材後說：「𠵱家安慰自己係另一種靚仔。」雖然內向，幸好他有金魚個性︰「同一大班唔熟嘅人一齊會有壓力，好想匿埋返自己嘅世界，但全自閉作歌亦唔得，要平衡。慶幸自己有金魚性格，好快唔記得唔開心嘅嘢。」

未走出情傷

林家謙出身小康之家，有四兄弟，哥哥是八級鋼琴高手，他只是五級，他稱沒有大志買樓，物質追求也不多，因慳所以儲到錢。問到慳家怎樣追女仔？他說兩者並非掛鈎，又指找到陪食便利店的女孩都不錯，因自己喜歡在便利店叮嘢食，他稱現在單身︰「foucs音樂，佛系啲，緣份到就自然嚟，幾耐冇拍？唔記得三、四年。」問到是否未走出情傷？他唱了句《下一位前度》歌詞：「上一位不釋懷……可能係啦，問下夕爺。」

Youtube訪問片段内容：

林家謙佛系人生夾耳緣 時光倒流給自己一句話：你都幾好彩

林家謙，在google搜尋打上他的名字，排第一位的keyword是「身高」，跟着依次是「哥哥」、「女朋友」，hit歌《一人之境》排第四；不過，他的4首MV包括《一人之境》和新歌《時光倒流一句話》，在YouTube各有逾100萬點擊。

去年12月，《蘋果》約林家謙做專訪，他說頒獎禮舉行在即，不想別人以為他在造勢，結果訪問延遲一個月，結果他在叱咤獲男歌手銅獎和作曲人大獎，結果我最喜愛的男歌手及歌曲獎由姜濤奪得。

林家謙自揭身高171cm

訪問當天，獨立歌手林家謙單拖現身，沒有經理人和助手跟班，頭髮和化妝都是自己搞掂。網民最關心他的身高，林家謙親自揭盅：「171cm，同Eason（陳奕迅）一樣。」Eason《是但求其愛》和《致明日的舞》是林家謙作曲，2014年開始寫歌的他，成名作有JW《矛盾一生》、容祖兒《心之科學》，4年後轉做唱作歌手，《下一位前度》和《一人之境》都大hit，樂迷讚他有治療系聲線。

不過，林家謙曾經對自己把聲冇信心，對唱歌有懷疑，「因為讀中學或大學，一直冇對自己唱歌好proud感覺，可能嗰時轉聲，覺得把聲唔屬於自己，有啲難控制，你一直唔同把聲相處，覺得越嚟越陌生，去到作歌時，否定自己唱歌，就算歌手朋友畀好多鼓勵信心，我都唔係即刻同把聲connect。」

足足等了兩、三年，他再認真考慮後，推出自己的單曲，「到今日攞歌唱領域嘅獎項，其實有擔心都有開心，擔心在於究竟我攞呢個獎，大家係咪覺得值呢？但開心係有樂迷真係鍾意我唱歌。」因為對自己有要求，林家謙很留意樂迷的評語，發現有位網民經常給負評，「『你tune得好難聽，又降key，捉唔到個key唔好唱啦！』可能佢對我把聲好抗拒，但前幾日見到呢個人留言：『真係好好聽，好期待你2021年作品。』嘩，我死喇！心入面有少少老懷安慰，終於被我嘅聲線或者音樂感動咗。」

我最喜愛的男歌手投姜濤

在叱咤頒獎禮上「我最喜愛」兩個獎都輸給姜濤，會否覺得自己是輸給偶像？「輸畀姜濤呀？我又唔係好覺得係輸，姜濤係得人鍾意，我自己都投佢男歌手。講真，嗰晚聽到係姜B，我係舒一口氣，我好驚係自己，我唔敢拉票，如果我攞咗，對我係唔好多於好，你鍾意我啲歌已經好開心，反而你投我個人，我好驚真係攞咗，好大壓力，下年點做呢？好驚做得衰。」有冇聽姜濤的歌？「我有聽呀，叱咤嗰晚唱live唔錯，姜B把聲係幾有辨識度，我扮唔到佢，佢亦扮唔到我。」

林家謙自細鍾意音樂，大學時卻揀了英文系，「純粹係A-Level成績最好呢科，唔記得B定C。讀大學時同英文系女同學一齊合唱贏咗冠軍，大專聯校又贏咗冠軍，因為喺呢啲歌唱比賽識咗林一峰，打開另一道門，唔係去唱歌，而係走去寫歌。」

林一峰親說「給家謙的話」

家謙獲作曲人大獎時，在台上多謝帶他出道的一峰，《蘋果》搵一峰錄段說話給家謙，一峰說：「從一開始，我都希望睇到家謙成功，成為一個更好嘅自己。而家家謙經歷嘅，同我一開始有9成相似，我會同佢分享我僅有嘅經驗，捉緊一啲必要嘅機會，避開一啲致命嘅錯誤，幫佢幫到底；音樂以外，一切都係雜音，我希望佢一路實現計劃時內心會感到寧靜，期待我哋將來合寫一首曠世之作。」家謙聽到一峰的話後說：「開心，我發覺未必係理所當然嘅事，可能有啲人會比較，你有我冇，但有啲朋友真心待你好，你要珍惜，喺呢個圈難得一遇。」

入行後，因為要求高，曾被人在背後嫌他麻煩，「唔算壞話嘅，一啲評語囉，『原來佢好麻煩喎』，可能有啲工作夥伴咁形容，我初初聽到有啲唔開心，我麻煩乜嘢呢？我都冇乜要求，除咗音樂上嘅要求，有時會多咗少少，嗰啲我真係唔好意思，我會多少少要求。」

家謙經常說「多謝哥哥」，原來他的哥哥是八級鋼琴高手，家謙只是五級，「由我寫歌開始，哥哥幫手畀意見，佢大我8年。」家謙屋企有4兄弟，出身小康之家，仍和家人同住，「冇乜大志買樓，我冇乜物質上追求，算係幾慳嘅人，所以就算唔係搵好多，都可以儲好多，可以半年甚至一年唔買衫，唔會每日粉墨登場。」

想搵肯去便利店叮嘢食女友

笑問他咁慳點追女仔？「唔關事㗎，唔係好掛鈎。」想搵陪食麥當勞的女仔？他笑說：「咁又唔拘呀，便利店得唔得？我好鍾意喺便利店叮嘢食。」問到現在有冇女友？「冇，focus音樂，佛系啲，緣份到就自然嚟，幾耐冇拍拖？唔記得，3、4年。」未走出情傷？他唱了句林夕填詞的《下一位前度》歌詞，「上一位不釋懷⋯⋯可能係啦，問吓夕爺。」

音樂人都易有情緒困擾，家謙亦不例外，「有時我摺埋就係，返幕後做製作，藉口係畀自己回氣，幕前會積壓，可能我見人會有少少抗拒，尤其一大班唔熟嘅人，唔知點同人相處，畀自己壓力唔開心，好想匿埋返自己嘅世界，《一人之境》都有呢個心態，講出內向人士感覺。畀時間唞下冇嘢，匿埋一陣，全自閉作歌亦唔得，要平衡。可能我望落去好憂鬱，但我唔係咁，慶幸自己有金魚性格，好快唔記得唔開心嘅嘢。」

所以，內向的家謙當初轉做唱作人，經過一番掙扎，「自己又唔係social嘅人，幕前條件又唔覺得係啱啦，（用手指樣指身材）而家安慰自己係另一種靚仔。」問他覺得香港樂壇仲有冇希望？「其實一直都有希望，只要做番到質素就有人聽，唔好夕陽工業心態，我哋想做番起件事『聽廣東歌係型』，因為鍾意幫襯，而唔係就執笠幫襯。」

最後，用「時光倒流一句話」總結29年人生，他思索，「要諗吓喎⋯⋯諗唔到，不如你講吖，你覺得呢？」結果，他想到一句對自己說的話：「你都幾好彩，林家謙！」

撰文：余燕儀

攝影：add攝影組

場地：谷Stage