St. Pius X Parish - St. Pius X

PAMIBI KI SAN PIO X

Mamurawayon na Santo Papa kan Eucharistia, San Pio X, ika nangapudan na itugdas an gabos ki Cristo. Itao mo samuya an tunay na pagkamoot ki Jesus tanganing kami mabuhay para sa saiya sana. Tabangi kami na magkaigwa nin maogmang pagkabuhay tanganing pabanalon an biyaya nin buhay na itinao samuya, asin makamtan an kayamanan kan Banal na Eucharistia.

Sa saimong pagkamoot ki Maria, Ina asin Reina kan gabos, palaada an samuyang mga puso na may pagsarig bilang saiyang mga deboto.

Ika bilang modelo kan mga kapadian, itao mo samuya an banal na bokasyon nin pagpadi asin buhay relihiyoso; likayan sa kapurisawan asin kaangotan an samong mga puso asin tawe nin katoninongan asin pagkamoot tanganing mangyari an Saiyang kabotan. Huli ki Cristo na samong Kagurangnan. Amen.

San Pio X, ipamibi mo kami.

BUHAY NI SAN PIO X

“Ipinangaki akong dukha, nabuhay akong dukha, magagadan akong dukha” - San Pio X

Ipinangaki si Giuseppe Melchiorre Sarto kan taon 1835 sa sarong dukhang familia sa Riese, probinsya kan Treviso, Italya, sarong lugar na harani sa Venice. Siya an panduwa sa sampulong aki nina Giovanni asin Margherita Sarto. Inapod siya kan Dios sa pagpapadi asin naordenan kan taon 1858. Nagin siyang Obispo kan Mantua kan taon 1884, asin cardinal asin patriarca kan Venice kan taon 1893.

Kan taon 1903, napili siya bilang ika-257 na Santo Papa kan Simbahan. Bilang Santo Papa, ipinagboot niyang ibaba an pag ako kan Banal na Komunyon sa edad na 7, asin an pirming pag ako kan Eucharistia kan gabos. Nangapudan siya sa mga layko na pag adalan asin kamotan an Banal na Kasuratan. Rineforma niya an Liturhiya sa paagi kan pagbalik sa paggamit kan Canto Gregoriano sa Santa Misa. Pinunan niya an pagpalimbag kan Codex Iuris Canonici, asin pagbabago sa Romana Curia.

Nagadan siya kan taon 1914 na may kamundoan huli kan pagpoon kan enot na Giyerang Pangkinaban. Idineklara siyang Santo ni Papa Pio XII kan taon 1954. Sa saiyang lulubngan sa Basilica ni San Pedro sa Roma, nakasurat an sumario kan saiyang pagkabuhay:

“Ipinangaking dukha asin may mapakumbabang puso,

Maigot na parasurog kan Catolicong Pagtubod,

Masuripot sa pagtugdas kan gabos ki Cristo,

Kinoronahan kan Banal na pagkabuhay asin pagkagadan.”

Si San Pio X an santo patron kan mga enot na maako kan Banal na Komunyon, Katekista, Peregrino, asin kan Parokya sa North Villazar na namukna kan taon 1956.

Page updated

Google Sites

Report abuse