Lan honetan adierazpen dramatikoko proiektu bat aurkituko duzue, Haur Hezkuntzako laugarren mailako adierazpen eta dramatizazio minorreko zazpi ikaslek sortua.

Modulu lanaren helburua minorrean dauden ikasgai guztiak elkartuz eta ikasgai bakoitzaren edukiak harremanetan jarriz dramatizazio proiektu bat diseinatzea, planifikatzea eta antzeztea izango da, Haur Hezkuntzako 1. eta 2. zikloko haurrei zuzendua.

Proiektu hau bere osotasunean azaltzeko, beharrezkoa izan dugu atal ezberdinetan banatzea. Era berean, proiektu honekin guk ikasle moduan lortu nahi ditugun ikaskuntza helburuei dagokionez, esan beharra dago ez dela bakarrik istorio bat sortzea izango, baizik eta jolasaren eta esperimentazioaren bidez proiektu bat eratzea, prozesuan zehar sortu diren arazo, zalantza edo desadostasunak modu batean edo bestean konpontzen saiatuz.

Hasieran aipatu bezala, dramatizazio proiektua sortzeko Haur Hezkuntzako graduko 4. mailako irakasgaiek berebiziko garrantzia izan dute. Alde batetik, gorputz hizkuntza daukagu. Horri esker, gorputzak adierazteko ematen dizkigun aukerez ohartu gara.

Gero, adierazpen eta komunikazio trebetasuna ikasgaian gure jarreraren espresioak, ahotsa, bolumena, indarra eta publikoari gure egoera transmititzeko teknika desberdinak jaso ditugu.

Ildo beretik, musika hizkuntzan Haur Hezkuntzako haurrentzat musika egokia zein den eta hori nola landu ikusi dugu, baliagarria izan dena gure dramatizazio proiektuan zer musika erabili aukeratzeko.

Horietaz gain, hizkuntza plastikoa eta ikusizkoa daukagu, horretan konpainia desberdinak aztertu ditugu; gure inspiraziorako ideiak bilatu; gure obrarekin erlazio zuzena duten hainbat ikus erreferente identifikatu eta egindako esperimentazioei esker gure antzerkiaren atrezzoa, hondoak eta bestelako elementuak irudikatzen ikasi dugu. Gainera, estereotipoak identifikatzen eta horietatik aldentzen saiatu gara.

Bukatzeko, dramatizazio adierazpenerako IKT-ak ikasgaia izan dugu. Horretan gure proiektua antolatzeko erabilgarriak izan diren baliabide teknologiko desberdinak erabili ditugu eta hauek eskaintzen dituzten aukera desberdinak aztertu. Gainera, talde dinamika eta esperimentazio desberdinak egin ditugu kooperazio eta talde lana sustatzeko.

Horretaz aparte, ikasgai guztien edukiak eta helburuak aztertu eta gero, konturatu gara ikasgai bakoitza hizkuntza mota bat dela, eta guztiak batuz gero hizkuntza berri eta adierazgarri bat sortzeko aukera daukagula. Proiektu honetan guztiak era zuzen batean batu egin ditugu hizkuntza adierazgarri eta berri bat sortzeko.