பல கல்வியாளர்களின் ஆய்வுகளுக்கு வழிகாட்டியாக இருந்ததோடு, அவர்களின் படைப்புக்களையும் சீர்தூக்கி முன்னுரைக்கும் கல்விமானாகவும் பணியாற்றினார். அவர் எழுதிய புத்தகங்கள்,  ஆய்வுக் கட்டுரைகள், முன்னுரைகள் என பல எழுத்து வடிவங்கள், தமிழ் மொழிக்கு டாக்டர் அ. வீரமணி ஆற்றிய பங்கை விவரிக்கும்.  ஆங்கிலத்திலும் உலக ஆய்வாளர்கள் போற்றும் வகையில், தென்கிழக்காசிய இந்தியர்களைப் பற்றிய ஆங்கில நூல்களையும், ஆய்வுக் கட்டுரைகளையும் பிரசுரித்து உள்ளார்.

சிங்கப்பூரில் மட்டும் அல்லாது, கிழக்கு ஆசியா, தென் கிழக்காசிய நாடுகளிலும் வாழும் தமிழர்கள் பற்றியும் ஆராய்ந்து அவர்களின் வரலாற்றையும், கலாச்சார முன்னேற்றங்களையும் தொடர்ந்து ஆய்வு செய்து வருகிறார். வட சுமத்திராவில் தமிழர்கள் என தொடங்கி, ஜாக்கார்த்தா, தாய்லாந்து புருணை,  இந்தோனீசியா, மியன்மார் போன்ற நாடுகளில் வாழ்ந்து வரும் தமிழர்களையும், அவர்கள் கடைபிடிக்கும் கலாச்சார பண்பாடுகள், கட்டிய கோவில்கள், வெற்றிகரமாக நடத்தி வரும் வணிகம் என அனைத்தையும் ஆராய்ந்து கட்டுரைகளாகவும் ஆய்வுப் புத்தகங்களாகவும் வெளியிட்டுள்ளார்.

சிங்கப்பூரில் நடைபெறும் புத்தக வெளியீட்டு நிகழ்ச்சிகளில், நூல் குறித்து மதிப்பீடு, கருத்துகள், சிறப்பு உரைகள் என பல வழிகளிலும் இவர் பங்காற்றியுள்ளார். ஜப்பான்,  புருணை போன்ற நாடுகளில் பேராசிரியராக பணியாற்றி வந்தபோதும் சமூக நிகழ்ச்சிகளுக்கு இவர் சிறப்பு விருந்தினராக அழைக்கப்பட்டுள்ளார். இருபது ஆண்டுகளுக்கு மேல் வெளிநாடுகளில் பணிபுரிந்த போதும், சிங்கப்பூரில் இவரது தமிழ்மொழி- தமிழர் நலச்சேவை இன்று வரை தொடர்கிறது.  

அண்மையில், சிங்கப்பூர் இந்திய மரபுடைமை சங்கம் வெளியிட்ட  Singapore Indian Heritage நூலையும் இவர் எழுதியுள்ளார்.  

அன்றைய வானொலி படைப்பாளராகத் தொடங்கி, தமிழ் முரசு நாளிதழ் ஆசிரியர், சிங்கப்பூர் பல்கலைக்கழக விரிவுரையாளர்,  தமிழர் பேரவை இளையர் மன்றம்,  சிங்கப்பூர்த் தமிழ் இளையர் மன்றம் என இவரதுபணி இன்றும் தொடர்கிறது. அதனுடன் சிங்கப்பூரில் தமிழ்-தமிழர் வரலாற்றைப் பற்றிய புதிய ஆய்வு நூற்களையும் தொடர்ந்து எழுதி வெளியிட்டு வருகிறார்.