25/05/2020

Ola a todos!

Xa está rematando maio e a primavera enche de cores a natureza!

A nosa terra é marabillosa. Temos que coidala para que no futuro poidamos seguir admirándoa.

Estamos ledos porque podemos saír das nosas casas, sentir a caloriña do sol e desfrutar ao aire libre. Pero debemos ser prudentes e seguir as instrucións sanitarias.

Desexamos que sexades moi felices e que nas vosas casas todo vaia ben.

Nós temos unha nova importante: a nosa querida profesora Rebeca, o luns 18 de maio, tivo que operarse de apendicite. Todos queremos que se recupere axiña e mandámoslle moitos bicos e apertas.

E vós que noticias tedes para contarnos? Esperamos as vosas novas.

Esta semana traemos varias propostas que agardamos vos gusten.

A máis importante é a de que lle fagades chegar a Rebeca mensaxes de ánimo. Pero farémolo de xeito moi especial: Con flores. O noso proxecto de plástica, galego e naturais será crear un xardín fantástico cheo de flores e bos desexos.

Vainos axudar o escritor Neira Vilas. Un dos últimos poemarios que vos dedicou, chámase “O xardín de Irene”. Lede os poemas e veredes cantas ideas nos van dar!

O voso xardín pode ser real ou imaxinario. Podedes facelo plantando, debuxando, pintando con pincel, construíndo unha maqueta, confeccionando as plantas e as flores con papel, cartón, plastilina, teas, fíos, sementes ou pauciños. Tamén podedes incluír animais. Deixade voar a vosa imaxinación. E non esquezades as mensaxes.

Sería marabilloso que vos animarades a escribir un poema!

Agardamos con impaciencia os vosos traballos!

Que teñades boa semana! Ata pronto! Biquiños!