၂၇၀။ စမ္ပေယျက္ခန္ဓက ဗွဲခမ္ဍန်
တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်စမ္ပာရ၊ ဝတ္ထုတုန် ခမဳဂဇအ်ဘာ ပ္ဍဲကွာန်ဝါသဘဂှ် မၞုံပၟိက်ကဵုပွမဒှ်တသိုခ် ခမဳကၟုဲဂမၠိုၚ်ဒှ်တုဲ သ္ပလွဳပရာရ။
တီကေတ် ရဴဝွံမ္ဂး တီဂၠံၚ်တရဴဂ္ၚေၚ်ပိဏ္ဍပါတ်အိုတ်ရတုဲ ဟွံလွဳပရာရ၊ ပ္ဍဲအခိၚ်ဂှ် ဟွံသ္ပလွဳရသွံ ရဴဝွံ ဗက်ပတိတ်ထောံရ၊ ခမဳဂှ် အာဇရေၚ်ကျာ်တြဲရ။
ကမ်ဒှ်ဂကောံပါ်ဒကး နဟွံဗဗွဲဓရ်ကီု၊ ကမ်မညဳသာသၟဟ်သၟန် နဟွံဗဗွဲဓရ်ကီု၊ ကမ်မဒှ်ဂကောံပါ်ဒကး နဗဗွဲဓရ်ကီု၊ ကမ်မဒှ်ဂကောံပါ်ဒကး နဓရ်ပတောံရီု။
ကမ်မညဳသာသၟဟ်သၟန် နဓရ်ပတောံကီု သ္ပအိုတ်ရ၊ မွဲဇကုဂှ် ဗက်ပတိတ်ထောံမွဲဇကုရ၊ မွဲဇကုဂှ်လေဝ် မွဲဒမြိပ်ဓဝ် ဗက်ပတိတ်ထောံ ၜါဇကုဂမၠိုၚ်ကီု ခမဳဂမၠိုၚ်မဂၠိုၚ်ကီုရ။
ၜါဇကုဂမၠိုၚ်ကီု ခမဳဂမၠိုၚ်မဂၠိုၚ်ကီု သၚ်ကီု ဗက်ပတိတ်ထောံ သၚ်ကီုရ၊ ကျာ်တြဲမိၚ်တုဲ “အဓမ္မကမ်ရ” ရဴဝွံ ပါဲကၠေံရ။
ယြဴကမ်မွဲ ဟွံစွံဉတ် ဍိုက်ပေၚ်တဴကဵုကမ္မဝါစ်ဟေၚ်ရ၊ ယြဴကမ်မွဲ ဟွံဗှ်ဖ္ဍောတ်ကမ္မဝါစ် ဍိုက်ပေၚ်တဴကဵုဉတ်ဟေၚ်ရ။
ယြဴကမ်မွဲ ဒေက်အာ နူဉတ်ကမ္မဝါစ်ရ၊ တေၚ်ကၠေံသဘဴမဍာံစၟတ်တုဲ ဂပ်ဝ်သ္ပရ၊ ယြဴကမ်မွဲ ဝေၚ်ကၠေံ ပွမဍိုက်ပေၚ်တဴကဵုဉတ် ပွမဍိုက်ပေၚ်တဴကဵုကမ္မဝါစ် မဒှ်သာသနာကျာ်တြဲ ဂပ်ဝ်သ္ပရ၊ ကမ်ဂှ် ကျာ်တြဲ က္ဍုဟ်မၠေံရ၊ ကမ်ဂှ် လီုလာ်ရ၊ ဟွံထေက်ကြိုက်ကုဟိုတ်ရ။
ကမ်မဒှ်ဂကောံပါ်ဒကး နဟွံဗဗွဲဓရ်ကီု၊ ကမ်မညဳသာသၟဟ်သၟန် နဟွံဗဗွဲဓရ်ကီု၊ ကမ်မဒှ်ဂကောံပါ်ဒကးဂမၠိုၚ်ၜါ မဒှ်ဓရ်ပတောံကီု၊ ကမ်မညဳသာသၟဟ်သၟန်ဂမၠိုၚ်ကီု ပါဲကၠေံရ၊ ကမ်မညဳသာသၟဟ်သၟန် ဗွဲသဘဴဓရ်ဂှ် ကျာ်တြဲ ကဵုအခေါၚ်ရ။
သၚ်စတုဝဂ်ကီု သၚ်ပဥ္စဝဝ်ကီု သၚ်ဒသဝဂ်ကီု သၚ်ဝဳသတိဝဂ်ကီု သၚ်မလောန်လတူ ဝဳသတိဝဂ်ကီု ရဴဝွံ သၚ်မၞုံတၟေၚ်ပကာရမသုန်ပြကာရ။
ပါဲကၠေံ ဥပသမ္ပဒကမ် ပဝါရဏာကမ် မွဲဟာန်ကေုာံအဗ္ဘာနကမ်တုဲ သၚ်စတုဝဂ်ဂမၠိုၚ် ဗဗွဲတဴကုကမ်အိုတ်ရ။
ပါဲကၠေံ ဥပသမ္ပဒကမ် ပ္ဍဲမဇ္ၛိမဒေသ အဗ္ဘာနကမ်ဂမၠိုၚ်တုဲ သၚ်ပဥ္စဝဂ် ဗဗွဲတဴကုကမ် ပ္ဍဲကမ်ဂမၠိုၚ်အိုတ်သီုရ။
ခမဳဂမၠိုၚ်မၞုံဂကောံစှ်ဇကု ပါဲကၠေံ အဗ္ဘာနကမ်တုဲ ဂပ်ဝ်သ္ပကမ်ဂမၠိုၚ်အိုတ်သီုရ၊ ဝဳသတိဝဂ်သၚ်ဂှ် ဗဗွဲတဴပ္ဍဲကမ်ဂမၠိုၚ်အိုတ်သီုရ။
ခမဳဗြဴကီု သိက္ခမာန်ကီု သာမဏဳတြုံကီု သာမဏဳဗြဴကီု ညးဖျေံကၠေံသိက္ခာကီု ညးအာစိုပ်အာပတ်ပါရာဇ်ကီု ခမဳမဒးဗက်ပတိတ်ထောံဂမၠိုၚ်ပိဇကု ဟိုတ်နူဟွံမၠာဲသ္ၚေဝ်အာပတ်ကီု ဟိုတ်နူဟွံဇအုဲဇဗဗလးအာပတ်ကီု ဟိုတ်နူဟွံသၠးကၠေံကွေတ်ကီု ခမၞုဲကီု ခမဳကၠတ်ပံၚ်ဖက်ကီု တီ ရတိရစ္ဆာန် ညးဂစိုတ်မိ ညးဂစိုတ်မ ညးဂစိုတ်တၠအရှန် ညးပလီုပလာ်ခမဳဗြဴ ညးပါ်ဒကးသၚ် ညးသ္ပဇကုကျာ်ညံၚ်ဆီဂွံပ္ဍူအာ ဥဘတောဗျဉ် ညးမၞုံကဵုပွမပံၚ်ဖက်တၞဟ်တၞဟ် ညးတန်တဴ ပ္ဍဲသိမ်တၞဟ်တၞဟ် ညးတန်တဴပ္ဍဲအကးနကဵုဣဒ္ဓိ။
ယြဴကုခမဳမွဲ သၚ်သ္ပကမ် မပ္တံတဇ္ဇနဳယကမ်ရ၊ ပူဂိုလ်ဂမၠိုၚ်ၜါစှော်ပန်ဂှ် ကျာ်တြဲဂပ်ဝ်ပါဲကၠေံအိုတ်ရ၊ ပူဂိုလ်ဂမၠိုၚ်ဂှ် အယာံမာတ်ဗဗေၚ်ဂိုဏ်လေဝ် ဒှ်ဟွံမာန်အိုတ်ရ။
သၚ်မဒှ်မရနုက်ကဵုပန်ဇကုမ္ဂး ခမဳပဒတဴပြဝးဂှ် ယဝ်ကဵုပြဝးမ္ဂး၊ တံၚ်ဓဇက် တမ်မ္ဂး၊ ကဵုမာနတ်မ္ဂး၊ ကော်ပၠုပ်အဗ္ဘာန်မ္ဂး၊ ဟွံဒှ်ကမ်ရ၊ သ္ပလေဝ် ဟွံထေက်ကဵုသ္ပရ။
ညးထေက်ကဵုတံၚ်ဓဇက်တမ် ညးတံၚ်ဓဇက်တမ်တုဲဒ္ဂေတ် ညးထေက်ကဵုမာနတ် ညးဒ္ဂေတ်မာနတ် ညးဂမၠိုၚ်မသုန်တၠဝွံ ဟွံထေက်ကဵုသ္ပကမ်အိုတ်ရ ရဴဝွံ ကျာ်တြဲ ဂပ်ဝ်ပါဲကၠေံအိုတ်ရ။
ခမဳဗြဴ သိက္ခမာန် သာမဏဳတြုံ သာမဏဳဗြဴ ညးဖျေံကၠေံသိက္ခာ ညးအာစိုပ်အာပတ်ပါရာဇ် ညးကြက်ဥမ္မတ် ညးစိုတ်ကလှ်လဖှ် ညးဝေဒနာပ္ဍဵုပ္ဍိုက် ခမဳမဒးဗက်ပတိတ်ထောံပိဇကု ဟိုတ်နူဟွံမၠာ်သ္ၚေဝ်အာပတ်ကီု ဟိုတ်နူဟွံဇအုဲဇဗဝဳဗလးအာပတ်ကီု ဟိုတ်နူဟွံသၠးကၠေံကွေတ်ကီု ခမၞုဲကီု ဥဘတောဗျဉ် ညးမၞုံကဵုပွမပံၚ်ဖက်တၞဟ်တၞဟ် ညးတန်တဴပ္ဍဲသိမ်တၞဟ်တၞဟ် ညးတန်တဴပ္ဍဲအကး နကဵုဣဒ္ဓိ ယြဴကုခမဳမွဲ သ္ပကမ် မပ္တံပဗ္ဗာဇနဳယကမ်ရ၊ ခမဳဒးဒုၚ်ဒဏ်သ္ပကမ်ဂှ် ပွမဆေဝ်ဒဝ်ဂမၠိုၚ်စှ်ဒ္စာံဝွံ ဟွံအာစိုပ်ရ၊ ပွမဆေဝ်ဒဝ် ခမဳပကတတ်တုန် အာစိုပ်ရ။
ညးဗက်ပတိတ် ညးသအးဇ္ၚးအာပတ်ဂှ် ပွမဗက်ပတိတ်ဟွံခိုဟ်မ္ဂးရ၊ ပွမဗက်ပတိတ် ညးဒိုဟ်ဓီုဂှ်ဟေၚ် ဒှ်ပွမဗက်ပတိတ်ခိုဟ်ရ၊ ခမၞုဲ ခမဳကၠတ်ပံၚ်ဖက် ညးပြံၚ်အာဗော်တဳ တိရစ္ဆာန် ညးဂစိုတ်မိ ညးဂစိုတ်မ ညးဂစိုတ်တၠအရှန် ညးပလီုပလာ်ခမဳဗြဴ ညးပါ်ဒကးသၚ် ညးသ္ပဇကုကျာ် ညံၚ်ဆီဂွံပ္ဍူအာ ဥဘတောဗျဉ် ညးဂမၠိုၚ်စှ်မွဲတၠဝွံ သ္ပပယျၚ်တုဲ ပွမကော်ပၠုပ်ဇရေၚ်သၚ်ဂှ် ဟွံဗဗွဲရ။
ညးတဲပိုတ် ညးဇိုၚ်ပိုတ် ညးပိုတ်သီုၜါဂှ် ညးကတောဝ်ပိုတ် ညးမုဟ်ပိုတ် ညးသီုကတောဝ် မုဟ်ပိုတ် ညးပိုတ်သီုၜါဂှ် ညးၝောံတဲဇိုၚ်ပိုတ် ညးလတေၚ်ဇၞော်ပိုတ် ညးလပုဟ်တဲဗာန်စပ် ညးကုန် ညးသဝ်ကွ ညးမၞုံကဵုယဲကအ်ဇၞော် ကအ်ဂုဟ် ညးတပ်ပ္ဍဵုလဝ်တဆိပ်ပသဲဂမ္တဴ ညးဒးဒုၚ်ကဵုဒဏ်လေံၜဝ် ညးဒးဒုၚ်လလောၚ်တြးလဝ် ဒၞါဲညာတ်ဂှ်ဂစိုတ် ညးဇိုၚ်တဍိုပ်။
ညးမၞုံကဵုယဲဟွံဒးရး ဝဳဗလးဟွံမာန် ညးပလီုပလာ်ပရိသာတ် ညးကၠက်မွဲလပါ် ညးဇိုၚ်တဲတ္ၚံက် ညးခ္ဍဴဇိုၚ်ဝေန် ညးချိုတ်မွဲဒကုတ် ညးလၟေန် ညးဗျုအိုတ်ဓတ် ညးကၠက်ၜါလပါ် ညးဟအဠဴ ညးကတောဝ်ဍိုၚ် ညးကၠက်တုဲ ဟအ.ဠဴ ညးကၠက်တုဲကတောဝ်ဍိုၚ် ညးဟအ,ဠဴတုဲ ကတောဝ်ဍိုၚ် ညးကၠက်ဟအဠဴကတောဝ်ဍိုၚ် ညးဂမၠိုၚ်ဂှ်တုန် ပိစှော်ၜါတၠဂမၠိုၚ်ရ၊ ယုတ်,လောန် ဟွံမွဲအိုတ်ရ။ ညးဂမၠိုၚ်ပိစှော်ၜါတၠဝွံ သ္ပပယျၚ်တုဲ ဒှ်ကော်ပၠုပ်ဇရေၚ်သၚ်ခိုဟ်ရ၊ ရဴဝွံ ကျာ်တြဲ သ္ပပြာကဋ်လဝ်ရ၊ ယြဴကုခမဳမွဲ အာပတ်မဂပ်ဝ်မၠာ်သ္ၚေဝ် အာပတ်မဂ်ပဝ်ဇအုဲဇဗ ကွေတ်မဂပ်ဝ်သၠး ဟွံမွဲရ၊ ကုခမဳဂမၠိုၚ်ဂှ် ဥက္ခေပနဳယကမ်ဂမၠိုၚ်ထပှ်ပြကာ ဒှ်ကမ်ဟွံဗဗွဲဓရ်ဂမၠိုၚ်ရ။ ဥက္ခေပနဳယကမ်ဂမၠိုၚ်ထပှ်ပြကာ မဂပ်ဝ်သ္ပကဵုခမဳ မဒးအာပတ် ဟွံတးပါဲဗက်အလိုက်တုဲ သီုမဒုၚ်ဝန်ဂှ်လေဝ် ဒှ်ကမ်ဟွံဗဗွဲဓရ်ဂမၠိုၚ်ရ။
ကမ်ဂမၠိုၚ်ထပှ်ပြကာ မဂပ်ဝ်သ္ပကဵုခမဳ မုးအာပတ် မတးပါဲမဟွံဗက်အလိုက်ဂှ် ဒှ်ကမ်ခိုဟ် ဗဗွဲဓရ်ဂမၠိုၚ်ရ၊ သၟာန်ပ္ဍဲဂတမုက်မှ ဒုၚ်ဝန်မှပွမသ္ပ၊ သတိဝိနယ် အမူဠဝိနယ် တဿပါပိယသိကကမ် ဥက္ခေပနဳယကမ် နိယဿကမ်ကီု ပဗ္ဗာဇနဳယကမ် ပဋိသာရဏဳယကမ် ဥက္ခေပနဳယကမ် ပြဝး ပွမတံၚ်ဓဇက်တမ် မာနတ်အဗ္ဘာန် သအာၚ်နူဂှ် ပွမသ္ပပယျၚ် ကုခမဳထေက်ကဵုကမ်သအာၚ်ဂှ် သ္ပကမ်မွဲသအာၚ်ဂှ်မ္ဂး၊ ကမ်ဂမၠိုၚ်စှ်တြဴဂကူဂှ် ဒှ်ကမ်ဟွံဗဗွဲဓရ်ဂမၠိုၚ်ရ။ ခမဳမထေက်ကဵုကမ်ဂှ် သ္ပကမ်ဂှ်ဂှ်မ္ဂး၊ ကမ်ဂမၠိုၚ်စှ်တြဴဂကူဂှ် ဒှ်ကမ်ခိုဟ် ဗဗွဲဓရ်ဂမၠိုၚ်ရ။
ခမဳမထေက်ကဵုကမ်သအာၚ်ဂှ် ပတိုန်ကမ်မွဲသအာၚ်တုဲ သ္ပမ္ဂး၊ ကမ်ဂမၠိုၚ်စှ်တြဴဂကူဂှ် ဒှ်ကမ်ဟွံဗဗွဲဓရ်ဂမၠိုၚ်ရ။ ကုညးမထေက်ကဵုကမ်သအာၚ်ဂှ် မူလကမ်ဂှ်ဂှ်တုန် နွံၜါပိုဒ် ၜါပိုဒ်အိုတ်ရ။ (ကြဴနူဂှ်) ကမ်ဂမၠိုၚ်စှ်တြဴဂကူဂှ်လေဝ် ကမ်မဗဗွဲဓရ်ဂမၠိုၚ်ရ။ ဝါရမဗ္ဂေတ်စက် မၞုံကဵုမွဲပိုဒ် မွဲပိုဒ်ဂှ် ကမ်ဟွံဗဗွဲဓရ် ရဴဝွံ ကျာ်တြဲတွံရ။
ယြဴခမဳမွဲ သ္ပပွမကယျာန်ဓဝါတ်ကြဴမတ်၊ သီုမဒှ်ဂကောံပါ်ဒကး နဟွံဗဗွဲဓရ် သၚ်သ္ပတဇ္ဇနဳယကမ် ကုခမဳဂှ်ရ။ ခမဳဂှ် အာဘာသအာၚ်ရ။
ပ္ဍဲဘာဂှ် သၚ်မညဳသာသၟဟ်သၟန်ဂှ် သ္ပတဇ္ဇနဳယကမ် ကုခမဳဂှ် နဟွံဗဗွဲဓရ်ရ၊ ပ္ဍဲဘာမွဲသအာၚ် သီုမဒှ်ဂကောံပါ်ဒကး နဗဗွဲဓရ် သ္ပတဇ္ဇနဳယကမ် ကုခမဳဂှ်ရ၊ ခမဳဂမၠိုၚ် မဒှ်ဂကောံပါ်ဒကးလေဝ် သ္ပတဴနဓရ်ပတောံအိုတ်ရ၊ တုပ်သၟဟ်သာ်ဂှ် ခမဳဂမၠိုၚ် မညဳသာသၟဟ်သၟန်လေဝ် သ္ပတဇ္ဇနဳယကမ် နဓရ်ပတောံအိုတ်ရ၊ ခမဳဂမၠိုၚ် မညဳသာသၟဟ်သၟန်လေဝ် နဓရ်ပတောံ ကမ်မဒှ်ဂကောံပါ်ဒကး နဗဗွဲဓရ်ကီု ခမဳဂမၠိုၚ် မဒှ်ဂကောံပါ်ဒကး နဓရ်ပတောံကီု သ္ပတဇ္ဇနဳယကမ် နဓရ်ပတောံအိုတ်ရ၊ ပိုဒ်ဂမၠိုၚ်မသုန်ဂကူဝွံ သ္ပတန်စွံလဝ် မွဲပိုဒ် မွဲပိုဒ်တုဲ တၠပညာ ဗန်ဒက်စက်ရ။
သ္ပနိယဿကမ် ကုခမဳဗာလ ခမဳအဗျတ္တရ၊ ဗက်ပတိတထောံ ခမဳကုလဒူသက နူဘာမတန်တဴရ၊ သ္ပပဋိသာရဏဳယကမ် ကုခမဳတ္ၜေဟ်လက် မၞိဟ်ဒကာဂမၠိုၚ်ရ။
ယြဴခမဳမါဲလေဝ် ဟွံမၠာ်သ္ၚေဝ်အာပတ် ဟွံဇအုဲဇဗအာပတ် ဟွံသၠးကၠေံကွေတ်မှာရာရ၊ ကုခမဳဂမၠိုၚ်ဂှ် ကျာ်တြဲ ဂပ်ဝ်တွံလဝ် ဥက္ခေပနဳယကမ်ရ။
နယ်မပ္တံဥက္ခေပနဳယမ်ဂှ် တၠပညာ ဒးတီကေတ် နနယ်မကၠုၚ် ပ္ဍဲတဇ္ဇနဳယကမ်ရ၊ ပွမဒ္ဂေတ်ဗွဲမ္ဒးရး မဗဗွဲကဵုကမ်ဂမၠိုၚ်ဂှ် အာတ်အခေါၚ် တၞဟ်နလလမ်ကမ်မ္ဂး နနဲမသ္ပကမ် ပ္ဍဲသၟဝ်ဂှ် ပွမကဵုလလမ်ကၠေံ ကမ်ဂမၠိုၚ် ပ္ဍဲကမ်ဂမၠိုၚ်ဂှ်ဂှ် သၚ်မတန်တဴပ္ဍဲဘာဂမၠိုၚ်ဂှ်ဂှ်လေဝ် ကယျာန်ဓဝါတ်ရ။
ပ္ဍဲပွမကဵုလမ်ကၠေံကမ်လေဝ် ကမ်ဟွံထေက်ကဵုသ္ပရ ကမ်မသ္ပဗွဲဟွံဒးရးရ ကမ်မထေက်ကဵုသ္ပမွဲလှ်ေပၠန်ရ ရဴဝွံ ယြဴခမဳဂမၠိုၚ် ဟီုသ္ဂးအိုတ်ရ၊ ခမဳဂမၠိုၚ်ဂှ် ဟီုသ္ဂးဗဗွဲကဵုဓရ်အိုတ်ရ။
ညာတ်ဒး ခမဳဂမၠိုၚ် မဒးဒုၚ်ပ္ဍဵုပ္ဍိုက် နယဲမတွံဂးသဳလလီုလာ် မအာစိုပ်ကမ်တုဲ အ္စာသဝ် မလေပ်ဝဳယဲ သၟဟ်ညံၚ်ရဴဟီုလဴကဵုဂဥုဲကီု ကျာ်တြဲတွံကဵုဓရ် မလေပ်ကဵုလလမ်ကမ်ရ။ ဣဝွံ စိုပ်ဒတုဲရ။
ပ္ဍဲစမ္ပေယျက္ခန္ဓကဝွံ ဝတ္ထုဂမၠိုၚ် မၞုံပိစှော်တြဴဝတ္ထုအိုတ်ရ။
စမ္ပေယျက္ခန္ဓကတုဲရ။
