၂၇၁။ စၞောန်ထ္ၜးကဵုပွမကတ၆ုဒှ်ကယျာန်ဓဝါတ် ခမဳကောန်ဍုၚ်ကောသမ္ဗဳဂမၠိုၚ်
၃၅၁။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဃောသိတာရာမ် ဇရေၚ်ဍုၚ်ကောသမ္ဗဳဂှ် ခမဳမွဲဇကု ဒးအာပတ်တုဲ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်ရ။ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်အိုတ်ရ။ ခမဳဂှ် ပ္ဍဲကာလကြဴ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်ပၠန်ရ၊ ခမဳသအာၚ်ဂမၠိုၚ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်အိုတ်ပၠန်ရ။
ကြဴနူဂှ် ခမဳဂမၠိုၚ်ဂှ် “ယွံကောန်တၠ အာပတ်တၠအဲဒးဂှ် တၠအဲ ဩဝ်မၠာ်သ္ၚေဝ်ညိ” ရဴဝွံ ဟီုသ္ဂးကဵုခမဳဂှ်ရ၊ (ခမဳဂှ်) ယွံကောန်တၠတအ် အာပတ်မထေက်ကဵုမၠာ်သ္ၚေဝ် ဟွံမွဲကုအဲရ ရဴဝွံ သ္ဂးရ။
ပ္ဍဲအခိၚ်ဂှ် ခမဳဂမၠိုၚ်ဂှ် ကလိဂွံပွမညဳသာသၟဟ်သၟန်တုဲ ဟိုတ်နူပွမဟွံမၠာ်သ္ၚေဝ်အာပတ်ဗက်ပတိတ်ထောံ ခမဳဂှ်ရ။ ခမဳမဒးဒုၚ်ဗက်ပတိတ်ထောံဂှ်လေဝ် လမိၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ။ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ။
ပ္ဍဲအခိၚ်ဂှ် ခမဳဂှ် ပြာပ်အာဇရေၚ် ခမဳမဒှ်သန္ဒိဋ္ဌသမ္ဘတ္တဂမၠိုၚ်တုဲမ္ဂး “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ အဲဟွံဒးအာပတ်ရ၊ အဲဂှ် ညးဒးအာပတ် ဟွံသေၚ်ရ၊ ဟဂပ်ဝ်ဗက်ပတိတ်အဲရ၊ အဲဂှ် ညးဂပ်ဝ်ဗက်ပတိတ်ဟွံသေၚ်ရ၊ ဗက်ပတိတ်အဲ နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ၊ တဳလပိုဉ်တအ်ညးဂမၠိုၚ် ဩဝ်ဒှ်ဗော်သွး အဲဍိက် ဗွဲမဗဗွဲကဵုဓရ် ဗွဲမဗဗွဲကဵုဝိနယ်အိုတ်ညိ” ရဴဝွံ ဟီုသ္ဂးဂှ်ရ ကလိဂွံဗော်သွးခမဳ မဒှ်သန္ဒိဋ္ဌသမ္ဘတ္တရ။
ဇရေၚ်ခမဳသန္ဒိဋ္ဌသမ္ဘတ္တ ပဒတဴပ္ဍဲဇနပိုဒ်ဂမၠိုၚ်လေဝ် “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ အဲဟွံဒးအာပတ်ရ၊ အဲဂှ် ညးဒးအာပတ်ဟွံသေၚ်ရ၊ ဟဂပ်ဝ်ဗက်ပတိတ်အဲရ၊ အဲဂှ် ညးဂပ်ဝ်ဗက်ပတိတ်ဟွံသေၚ်ရ၊ ဗက်ပတိတ်အဲ နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ၊ တဳလပိုဉ်တအ်ညးဂမၠိုၚ် ဩဝ်ဒှ်ဗော်သွး အဲဍိက် ဗွဲမဗဗွဲကဵုဓရ် ဗွဲမဗဗွဲကဵုဝိနယ်အိုတ်ညိ” ရဴဝွံ ဖအောဝ်ဗလးဏာကလုတ်ဂှ်ရ ဗော်သွးခမဳ မဒှ်သန္ဒိဋ္ဌသမ္ဘတ္တ ပဒတဴပ္ဍဲဇနပိုဒ်လေဝ် ကလိဂွံပၠန်ရ။
ပ္ဍဲအခိၚ်ဂှ် ခမဳဗက်လက်ကရဴ ခမဳမဒးဒုၚ်ဗက်ပတိတ်ထောံဂမၠိုၚ်ဂှ် အာဇရေၚ် ခမဳမဗက်ပတိတ်ဂမၠိုၚ်တုဲမ္ဂး “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ ခမဳဂှ် ဟွံဒးအာပတ်ရ၊ ခမဳဂှ် ညးဒးအာပတ်ဟွံသေၚ်ရ၊ ဟဂပ်ဝ်ဗက်ပတိတ် ခမဳဂှ်ရ၊ ခမဳဂှ် ညးဂပ်ဝ်ဗက်ပတိတ် ဟွံသေၚ်ရ၊ ဗက်ပတိတ် နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ” ရဴဝွံ ဟီုသ္ဂးကဵုခမဳမဗက်ပတိတ်ဂမၠိုၚ်အိုတ်ရ။
အခိၚ်မဟီုသ္ဂးတိုန်ရဴဝွံဂှ် ခမဳမဗက်ပတိတ်ဂမၠိုၚ် “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ ခမဳဂှ် ဒးအာပတ်ရ၊ ခမဳဂှ် ညးဟွံဒးအာပတ်ဟွံသေၚ်ရ၊ ဂပ်ဝ်ဗက်ပတိတ် ခမဳဂှ်ရ၊ ခမဳဂှ် ညးဟဂပ်ဝ်ဗက်ပတိတ် ဟွံသေၚ်ရ၊ ဗက်ပတိတ် နကဵုကမ် မဟွံဗဗွဲဓရ် မဟဂပ်ဝ်ပလီုပလာ် မဟွံထေက်ကုသာသနာရ၊ ယွံတဳလပိုဉ်တအ် တဳလပိုဉ်တအ်ညးဂမၠိုၚ် လ္ပဒှ် ညးဒ္ဂေတ်ဗက်လက်ကရဴ သကအ်တွဳဝါရ ခမဳမဒးဒုၚ်ဗက်ပတိတ်ဝွံအိုတ်ညိ” ရဴဝွံ ဟီုသ္ဂးကဵုခမဳ မဒ္ဂေတ်ဗက်လက်ကရဴ ခမဳမဒးဒုၚ်ဗက်ပတိတ်ဂမၠိုၚ်အိုတ်ရ။ ခမဳမဒ္ဂေတ်ဗက်လက်ကရဴ ခမဳမဒးဒုၚ်ဗက်ပတိတ်ဂမၠိုၚ်ဂှ် ခမဳမဗက်ပတိတ်ဂမၠိုၚ် ၜိုန်ဟီုသ္ဂး ရဴဝွံလေဝ် ဒှ်မဒ္ဂေတ်ဗက်လက်ကရဴ သကအ်တွဳဝါရ ခမဳမဒးဒုၚ်ဗက်ပတိတ်ဂှ် အတိုၚ်ဒှ်လၟိုန်အိုတ်ရ။
၄၅၂။ ပ္ဍဲအခိၚ်ဂှ် ခမဳမွဲဇကု ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂ: သီုမဂဇအ်ဒၟံၚ်ပ္ဍဲဒၞဲါမွဲဂှ်− ယွံတဳလမၞုံပိုဉ် ခမဳမွဲဇကု ဒးအာပတ်တုဲ ပ္ဍဲအာပတ်ဂှ် မၞုံကဳုကေတ်ရဴဝွံမ္ဂး ဒးအာပတ်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကေတ်ရဴဝွံမ္ဂး ဟွံဒးအာပတ်အိုတ်ရ၊ ခမဳဂှ် ပ္ဍဲကာလကြဴ ပ္ဍဲအာပတ်ဂှ် မၞုံကဵုကေတ်ရဴဝွံမ္ဂ: ဟွံဒးအာပတ်ပၠန်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂ: ဒးအာပတ်အိုတ်ပၠန်ရ။ ယွံတဳလမၞုံပိုဉ် ပ္ဍဲအခိၚ်ဂှ် ခမဳဂမၠိုၚ်ဂှ် “ယွံကောန်တၠ အာပတ်တၠအဲဒးဂှ် တၠအဲ ဩဝ်မၠာ်သ္ၚေဝ်ညိ” ရဴဝွံ ဟီုသ္ဂးကဵုခမဳဂှ်ရ (ခမဳဂှ်) ယွံကောန်တၠတအ် အာပတ်မထေက်ကဵုမၠာ်သ္ၚေဝ် ဟွံမွဲကုအဲရ ရဴဝွံ သ္ဂးရ။ ယွံတဳလမၞုံပိုဉ် ပ္ဍဲအခိၚ်ဂှ် ခမဳဂမၠိုၚ်ဂှ် ကလိဂွံပွမညဳသာသၟဟ်သၟန်တုဲ ဟိုတ်နူပွမဟွံမၠာ်သ္ၚေဝ်အာပတ် ဗက်ပတိတ်ထောံခမဳဂှ်ရ။
ယွံတဳလမၞုံပိုဉ် ခမဳမဒးဒုၚ်ဗက်ပတိတ်ထောံဂှ်လေဝ် လမိမၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ၊ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ။ ယွံတဳလမၞုံပိုဉ် ပ္ဍဲအခိၚ်ဂှ် ခမဳဇဂှ် ပြာပ်အာဇရေၚ် ခမဳမဒှ်သန္ဒိဋ္ဌသမ္ဘတ္တဂမၠိုၚ်တုဲမ္ဂး “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ အဲဟွံဒးအာပတ်ရ၊ အဲဂှ် ညးဒးအာပတ် ဟွံသေၚ်ရ၊ ဟဂပ်ဝ်ဗက်ပတိတ်အဲရ၊ အဲဂှ် ညးဂပ်ဝ်ဗက်ပတိတ်ဟွံသေၚ်ရ၊ ဗက်ပတိတ်အဲ နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ၊ တဳလပိုဉ်တအ်ညးဂမၠိုၚ် ဩဝ်ဒှ်ဗော်သွးအဲဍိက် ဗွဲမဗဗွဲကဵုဓရ် ဗွဲမဗဗွဲကဵုဝိနယ်အိုတ်ညိ” ရဴဝွံ ဟီုသ္ဂးရ။
ယွံတဳလမၞုံပိုဉ် ခမဳဂှ် ကလိဂွံဗော်သွးခမဳ မဒှ်သန္ဒိဋ္ဌသမ္ဘတ္တရ၊ ဇရေၚ်ခမဳသန္ဒိဋ္ဌသမ္ဘတ္တ ပဒတဴပ္ဍဲဇနပိုဒ်ဂမၠိုၚ်လေဝ် “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ အဲဟွံဒးအာပတ်ရ၊ အဲဂှ် ညးဒးအာပတ် ဟွံသေၚ်ရ၊ ဟဂပ်ဝ်ဗက်ပတိတ်အဲရ၊ အဲဂှ် ညးဂပ်ဝ်ဗက်ပတိတ်ဟွံသေၚ်ရ၊ ဗက်ပတိတ်အဲ နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ၊ တဳလပိုဉ်တအ်ညးဂမၠိုၚ် ဩဝ်ဒှ်ဗော်သွးအဲဍိက် ဗွဲမဗဗွဲကဵုဓရ် ဗွဲမဗဗွဲကဵုဝိနယ်အိုတ်ညိ” ရဴဝွံ ဖအောဝ်ဗလးဏာကလုတ်ဂှ်ရ ဗော်သွးခမဳ မဒှ်သန္ဒိဋ္ဌသမ္ဘတ္တ ပဒတဴပ္ဍဲဇနပိုဒ်လေဝ် ကလိဂွံပၠန်ရ။
ယွံတဳလမၞုံပိုဉ် ပ္ဍဲအခိၚ်ဂှ် ခမဳမဗက်လက်ကရဴ ခမဳမဒးဒုၚ်ဗက်ပတိတ်ထောံဂမၠိုၚ်ဂှ် အာဇရေၚ် ခမဳဗက်ပတိတ်ဂမၠိုၚ်တုဲမ္ဂး “ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ ခမဳဂှ် ဟွံဒးအာပတ်ရ၊ ခမဳဂှ် ညးဒးအာပတ်ဟွံသေၚ်ရ၊ ဟဂပ်ဝ်ဗက်ပတိတ် ခမဳဂှ်ရ၊ ခမဳဂှ် ညးဂပ်ဝ်ဗက်ပတိတ် ဟွံသေၚ်ရ၊ ဗက်ပတိတ် နကဵုကမ် မဟွံဗဗွဲဓရ် မဂပ်ဝ်ပလီုပလာ် မဟွံထေက်ကုသာသနာရ” ရဴဝွံ ဟီုသ္ဂးကဵုခမဳမဗက်ပတိတ်ဂမၠိုၚ်အိုတ်ရ။
ယွံတဳလမၞုံပိုဉ် အခိၚ်မဟီုသ္ဂးတိုန်ရဴဝွံဂှ် ခမဳမဗက်ပတိတ်ဂမၠိုၚ် ““ယွံကောန်တၠတအ် အရာဝွံ ဟွံဒးအာပတ်ရ၊ အရာဝွံ ဒးအာပတ်ဟွံသေၚ်ရ၊ ခမဳဂှ် ဒးအာပတ်ရ၊ ခမဳဂှ် ညးဟွံဒးအာပတ်ဟွံသေၚ်ရ၊ ဂပ်ဝ်ဗက်ပတိတ် ခမဳဂှ်ရ၊ ခမဳဂှ် ညးဟဂပ်ဝ်ဗက်ပတိတ် ဟွံသေၚ်ရ၊ ဗက်ပတိတ် နကဵုကမ် မဟွံဗဗွဲဓရ် မဟဂပ်ဝ်ပလီုပလာ် မဟွံထေက်ကုသာသနာရ၊ ယွံတဳလပိုဉ်တအ် တဳလပိုဉ်တအ် လ္ပဒှ် ညးမဒ္ဂေဗက်လက်ကရဴ သကအ်တွဳဝါရ ခမဳမဒးဒုၚ်ဗက်ပတိတ်ဝွံအိုတ်ညိ” ရဴဝွံ ဟီုသ္ဂးကဵုခမဳ မဒ္ဂေတ်ဗက်လက်ကရဴ ခမဳမဒးဒုၚ်ဗက်ပတိတ်ဂမၠိုၚ်အိုတ်ရ။ ခမဳမဒ္ဂေတ်ဗက်လက်ကရဴ ခမဳမဒးဒုၚ်ဗက်ပတိတ်ဂမၠိုၚ်ဂှ် ခမဳမဗက်ပတိတ်ဂမၠိုၚ် ၜိုန်ဟီုသ္ဂးရဴဝွံလေဝ် ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
၄၅၃။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ဂကောံခမဳဂှ် ပါ်ဒကးရ၊ ဂကောံခမဳဂှ် ပါ်ဒကးရ” ရဴဝွံ ဒၠိုက်ကတဵုနူဒၞဲါတုဲ ပြာပ်အာဇရေၚ် ခမဳမဗက်ပတိတ်ဂမၠိုၚ်တုဲမ္ဂး ဂဇအ်ဖျေံပ္ဍဲသၞာမလးပညပ်လဝ်တုဲ ယွံခမဳတအ် မၞးတအ်ညးဂမၠိုၚ် “အဲတီရ။ အဲလေပ်ရ” ရဴဝွံ ထေၚ်ဇၞော်တုဲ ဟိုတ်နူဟိုတ်ဝတ္ထုသာမညဂှ် ထေက်ကဵုဗက်ပတိတ် ခမဳရ ရဴဝွံ လ္ပသမ္တီကေတ်အိုတ်ညိ ရဴဝွံ သ္ဂးကဵုခမဳမဗက်ပတိတ်ဂမၠိုၚ်ရ။
ယွံခမဳတအ် ခမဳဂှ် ဒးအာပတ်တုဲ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်အိုတ်ရ၊ ယွံခမဳတအ် ခမဳဂမၠိုၚ်ဂှ် “တဳလပိုဉ်ဝွံ လမိၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ၊ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ၊ ပိုဲညးဂမၠိုၚ် ဟိုတ်နူပွမဟွံမၠာ်သ္ၚေဝ်အာပတ် ဗက်ပတိတ်ခမဳဝွံတုဲ သီုဟွံသ္ပဥပေါသ်မွဲစွံကေုာံခမဳဝွံ စာ်စ္ဍးနူကေုာံခမဳဝွံတုဲဟေၚ် သ္ပဥပေါသ်မ္ဂး ပွမကယျာန်ဓဝါတ်သေက်ဇဵုကြဴမတ် ဂတမတ် ပွမဟီုသ္ဂးစှ်ေစး စဵုကဵုဇိုၚ်တဲပါ ဒဒက်တဴသၚ်ကီု သၚ်ပါ်ဒကးကီု စရိတ်သၚ်ကြက်ပါ်ဒကးကီု သၚ်ပါ်ခြာအာတၞဟ်တၞဟ်ကီု သ္ပပါ်ခြာတၞဟ်တၞဟ်ကီု ကြက်ကတဵုဒှ်ရ” ရဴဝွံ ယဝ်တီကေတ် ခမဳဒးအာပတ်ဂှ်အိုတ်မ္ဂ;၊ ယွံခမဳတအ် ခမဳမပအဲပရဲ ကဵုကြက်ပါ်ဒကးဂမၠိုၚ် ဟိုတ်နူပွမဟွံမၠာ်သ္ၚေဝ်အာပတ် ဟွံထေက်ကဵုဗက်ပတိတ် ခမဳဂှ်ရ။
ယွံခမဳတအ် ခမဳဂှ် ဒးအာပတ်တုဲ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်အိုတ်ရ၊ ယွံခမဳတအ် ခမဳဂမၠိုၚ်ဂှ် “တဳလပိုဉ်ဝွံ လမိၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ၊ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ၊ ပိုဲညးဂမၠိုၚ် ဟိုတ်နူပွမဟွံမၠာ်သ္ၚေဝ်အာပတ် ဗက်ပတိတ်ခမဳဝွံတုဲ သီုဟွံသ္ပပဝါရဏာမွဲစွံကေုာံခမဳဝွံ စာ်စ္ဍးနူခမဳဝွံတုဲဟေၚ် သ္ပပဝါရဏာအိုတ်မ္ဂး၊ ပိုဲညးဂမၠိုၚ် သီုဟွံသ္ပကမ်သၚ်မွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် သ္ပကမ်သၚ်အိုတ်မ္ဂ:၊ ပိုဲညးဂမၠိုၚ် သီုဟွံဂဇအ်ပ္ဍဲသၞာမွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် ဂဇအ်တဴပ္ဍဲသၞာအိုတ်မ္ဂး၊ ပိုဲညးဂမၠိုၚ် သီုဟွံဂဇအ်ပ္ဍဲအရာသုၚ်ယာဂုမွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် ဂဇအ်တဴပ္ဍဲအရာသုၚ်ယာဂုအိုတ်မ္ဂး၊ ပိုဲညးဂမၠိုၚ် သီုဟွံဂဇအ်ပ္ဍဲဇြပ်ကဵုပိုဉ်မွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် ဂဇအ်တဴပ္ဍဲဇြပ်ကဵုပိုဉ်အိုတ်မ္ဂး၊ ပိုဲညးဂမၠိုၚ် သီုဟွံပဒတဴပ္ဍဲဘာမၞုံကဵုမွဲစၟဳမွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် ပဒတဴပ္ဍဲဘာမၞုံကဵုမွဲစၟဳအိုတ်မ္ဂး၊ ပိုဲညးဂမၠိုၚ် သီုဟွံသ္ပ ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်ခၟောံတဲ ပွမသ္ပရှ်ေသှ်ေရဴဂဴ ခမဳဇၞော်မွဲစွံကေုာံခမဳဝွံ စာ်စ္ဍးကေုာံခမဳဝွံတုဲဟေၚ် သ္ပတဴပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်ခၟောံတဲ ပွမသ္ပရှ်ေသှ်ေရဴဂဴ ခမဳဇၞော်အိုတ်မ္ဂး ပွမကယျာန်ဓဝါတ်သေက်ဇဵုကြဴမတ် ဂတမတ် ပွမဟီုသ္ဂးစှ်ေစး စဵုကဵုဇိုၚ်တဲပါ ဒဒက်တဴသၚ်ကီု သၚ်ပါ်ဒကးကီု စရိတ်သၚ်ကြက်ပါ်ဒကးကီု သၚ်ပါ်ခြာအာတၞဟ်တၞဟ်ကီု သ္ပပါ်ခြာတၞဟ်တၞဟ်ကီု ကြက်ကတဵုဒှ်ရ” ရဴဝွံ ယဝ်တီကေတ်အိုတ်မ္ဂ;၊ ယွံခမဳတအ် ခမဳမပအဲပရဲ ကဵုကြက်ပါ်ဒကးဂမၠိုၚ် ဟိုတ်နူပွမဟွံမၠာ်သ္ၚေဝ်အာပတ် ဟွံထေက်ကဵုဗက်ပတိတ် ခမဳဂှ်ရ။
၄၅၄။ ကြဴနူဂှ် တဳလမၞုံပိုဉ်ကျာ်တြဲ ဟီုတွံကဵုဟိုတ်ပရူပရာဝွံ ကုခမဳမဗက်ပတိတ်ဂမၠိုၚ်တုဲမ္ဂး ဒၠိုက်ကတဵုနူဒၞဲါ ပြာပ်အာဇရေၚ် ခမဳမဒ္ဂေတ်ဗက်လက်ကရဴ ခမဳဒးဒုၚ်ဗက်ပတိတ်ဂမၠိုၚ်ဂဇအ်ဖျေံပ္ဍဲသၞာမလးပညပ်လဝ်တုဲ−
ယွံခမဳတအ် မၞးတအ်ညးဂမၠိုၚ် သီုမဒးအာပတ် “ပိုဲတအ် ဟွံဒးအာပတ်ရ၊ ပိုဲတအ် ဟွံဒးအာပတ်ရ” ရဴဝွံ (ပၠုပ်စိုတ်တုဲ) ဟွံဇအုဲဇဗအာပတ်ရ ရဴဝွံ လ္ပသမ္တီကေတ်အိုတ်ညိ။ ယွံခမဳတအ် ခမဳဂှ် ဒးအာပတ်တုဲ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်ရ။
ယွံခမဳတအ် ခမဳဂှ် “တဳလပိုဉ်ဝွံ လမိၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ၊ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ၊ ဟိုတ်နူသွက်အဲကတဵုဒှ် ဟိုတ်နူသွက်ညးသအာၚ်ကတဵုဒှ် နပွမသ္ဍိုက်ဆာန် ပွမက္ဍုဟ် ပွမဟွံတီ ပွမဖေက်ဂမၠိုၚ် ဟွံထေက်ကဵုတၞဟ်နအာ အရာမဟဂပ်ဝ်အာရ။ ခမဳဂမၠိုၚ်ဝွံ ဟိုတ်နူမၠာ်သ္ၚေဝ်အာပတ် ဗက်ပတိတ်အဲတုဲ သီုဟွံသ္ပဥပေါသ်မွဲစွံကေုာံအဲ စာ်စ္ဍးကေုာံအဲတုဲဟေၚ် သ္ပဥပေါသ်မ္ဂး ပွမကယျာန်ဓဝါတ်သေက်ဇဵုကြဴမတ် ဂတမတ် ပွမဟီုသ္ဂးစှ်ေစး စဵုကဵုဇိုၚ်တဲပါ ဒဒက်တဴသၚ်ကီု သၚ်ပါ်ဒကးကီု စရိတ်သၚ်ကြက်ပါ်ဒကးကီု သၚ်ပါ်ခြာအာတၞဟ်တၞဟ်ကီု သ္ပပါ်ခြာတၞဟ်တၞဟ်ကီု ကြက်ကတဵုဒှ်ရ” ရဴဝွံ ယဝ်တီကေတ်အိုတ်မ္ဂ;၊ ယွံခမဳတအ် ခမဳမပအဲပရဲ ကဵုကြက်ပါ်ဒကးဂမၠိုၚ် ဗွဲအစောံလျုၚ်ပတှ်ေကေတ် ခမဳသအာၚ်ဂမၠိုၚ်လေဝ် ဒးဟီုလၟိၚ်ဒေသနာအာပတ်ရ။
ယွံခမဳတအ် ခမဳဂှ် ဒးအာပတ်တုဲ ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဒးအာပတ်ရ၊ ခမဳသအာၚ်ဂမၠိုၚ်ဂှ်တုန် ပ္ဍဲအာပတ်ဂှ် မၞုံကဵုကွေတ်ရဴဝွံမ္ဂး ဟွံဒးအာပတ်အိုတ်ရ၊ ယွံခမဳတအ် ခမဳဂမၠိုၚ်ဂှ် “တဳလပိုဉ်ဝွံ လမိၚ်လညာတ်ဂၠိုၚ်တုဲ ဂွံလဝ်ပါၚ်တိုက် ပါဠိသၟးဟွံက ဓမ္မဝိနယ ကေုာံပါတိမုက်လေဝ် ပကၚ်ရၚ်လဝ်ရ၊ မၞုံကဵုပညာတုဲ စဳကၠးဆိုက်ဗ္ဒက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ၊ ဟိုတ်နူသွက်အဲကဵုဒှ် ဟိုတ်နူသွက်ညးသအာၚ်ကဵုဒှ် နပွမသ္ဍိုက်ဆာန် ပွမက္ဍုဟ် ပွမဟွံတီ ပွမဖေက်ဂမၠိုၚ် ဟွံထေက်ကဵုတၞဟ်နအာ အရာမဟဂပ်ဝ်အာရ။
ခမဳဂမၠိုၚ်ဝွံ ဟိုတ်နူပွမဟွံမၠာ်သ္ၚေဝ်အာပတ် ဗက်ပတိတ်အဲတုဲ သီုဟွံသ္ပပဝါရဏာမွဲစွံကေုာံအဲ စာ်စ္ဍးနူအဲတုဲဟေၚ် သ္ပပဝါရဏာအိုတ်မ္ဂး၊ သီုဟွံသ္ပကမ်သၚ်မွဲစွံကေုာံအဲ စာ်စ္ဍးကေုာံအဲတုဲဟေၚ် သ္ပကမ်သၚ်အိုတ်မ္ဂ:၊ သီုဟွံဂဇအ်ပ္ဍဲသၞာမွဲစွံကေုာံအဲ စာ်စ္ဍးကေုာံအဲတုဲဟေၚ် ဂဇအ်တဴပ္ဍဲသၞာအိုတ်မ္ဂး၊ သီုဟွံဂဇအ်ပ္ဍဲအရာသုၚ်ယာဂုမွဲစွံကေုာံအဲ စာ်စ္ဍးကေုာံအဲတုဲဟေၚ် ဂဇအ်တဴပ္ဍဲအရာသုၚ်ယာဂုအိုတ်မ္ဂး၊ သီုဟွံဂဇအ်ပ္ဍဲဇြပ်ကဵုပိုဉ်မွဲစွံကေုာံအဲ စာ်စ္ဍးကေုာံအဲတုဲဟေၚ် ဂဇအ်တဴပ္ဍဲဇြပ်ကဵုပိုဉ်အိုတ်မ္ဂး၊ သီုဟွံပဒတဴပ္ဍဲဘာမၞုံကဵုမွဲစၟဳမွဲစွံကေုာံအဲ စာ်စ္ဍးကေုာံအဲတုဲဟေၚ် ပဒတဴပ္ဍဲဘာမၞုံကဵုမွဲစၟဳအိုတ်မ္ဂး၊ သီုဟွံသ္ပ ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်ခၟောံတဲ ပွမသ္ပရှ်ေသှ်ေရဴဂဴ ခမဳဇၞော်မွဲစွံကေုာံအဲ စာ်စ္ဍးကေုာံအဲတုဲဟေၚ် သ္ပတဴပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်ခၟောံတဲ ပွမသ္ပရှ်ေသှ်ေရဴဂဴ ခမဳဇၞော်အိုတ်မ္ဂး ပွမကယျာန်ဓဝါတ်သေက်ဇဵုကြဴမတ် ဂတမတ် ပွမဟီုသ္ဂးစှ်ေစး စဵုကဵုဇိုၚ်တဲပါ ဒဒက်တဴသၚ်ကီု သၚ်ပါ်ဒကးကီု စရိတ်သၚ်ကြက်ပါ်ဒကးကီု သၚ်ပါ်ခြာအာတၞဟ်တၞဟ်ကီု သ္ပပါ်ခြာတၞဟ်တၞဟ်ကီု ကြက်ကတဵုဒှ်ရ” ရဴဝွံ ယဝ်တီကေတ်အိုတ်မ္ဂ;၊ ယွံခမဳတအ် ခမဳမပအဲပရဲ ကဵုကြက်ပါ်ဒကးဂမၠိုၚ် ဗွဲအစောံလျုၚ်ပတှ်ေကေတ် ခမဳသအာၚ်ဂမၠိုၚ်လေဝ် ဒးဟီုလၟိၚ်ဒေသနာအာပတ်ရ ရဴဝွံ သ္ဂးကဵုခမဳမဒ္ဂေတ်ဗက်လက်ကရဴ ခမဳဒးဒုၚ်ဗက်ပတိတ်ရ။
ကြဴနူဂှ် တဳလမၞုံပိုဉ်ကျာ်တြဲ ဟီုတွံကဵုဟိုတ်ပရူပရာဝွံ ကုခမဳမဒ္ဂေတ်ဗက်လက်ကရဴ ခမဳဒးဒၚ်ဗက်ပတိတ်ဂမၠိုၚ်တုဲမ္ဂး ဒၠိုက်ကတဵုနူဒၞဲါ က္ညစ္ဍးအာရ။
၄၅၅။ ပ္ဍဲကာလမွဲအခိၚ် ခမဳမဒ္ဂေတ်ဗက်လက်ကရဴ ခမဳဒးဒုၚ်ဗက်ပတိတ်ဂမၠိုၚ် ပ္ဍဲဘာဂှ်ဟေၚ် ဿ္ပဥပေါသ် ပ္ဍဲအပ္ဍဲသိမ်အိုတ်ရ၊ သ္ပကမ်သၚ်အိုတ်ရ၊ ခမဳမဗက်ပတိတ်ဂမၠိုၚ်တုန် အာမ္ၚးသိမ်တုဲ သ္ပဥပေါသ်အိုတ်ရ၊ သ္ပကမ်သၚ်အိုတ်ရ။
ပ္ဍဲအခိၚ် ခမဳမဗက်ပတိတ်မွဲဇကု ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီမဂဇအ်ဒၟံၚ်ပ္ဍဲဒၞဲါမွဲဂှ် “ယွံတဳလမၞုံပိုဉ် ခမဳမဒ္ဂေတ်ဗက်လက်ကရဴ ခမဳဒးဒုၚ်ဗက်ပတိတ်ဂမၠိုၚ်ဂှ် ပ္ဍဲဘာဂှ်ဟေၚ် သ္ပဥပေါသ် ပ္ဍဲအပ္ဍဲသိမ်အိုတ်ရ၊ သ္ပကမ်သၚ်အိုတ်ရ၊ ပိုဲဍိက်တအ်ညးဂမၠိုၚ် မဒှ်ခမဳဗက်ပတိတ်ဂှ်တုန် အာမ္ၚးသိမ်တုဲ သ္ပဥပေါသ်အိုတ်ရ။ သ္ပကမ်သၚ်အိုတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံခမဳ ခမဳမဒ္ဂေတ်ဗက်လက်ကရဴ ခမဳဒးဒုၚ်ဗက်ပတိတ်ဂမၠိုၚ်ဂှ် ပ္ဍဲဘာဂှ်ဟေၚ် ပ္ဍဲအပ္ဍဲသိမ်ဂှ် အတိုၚ်ဉတ်ကမ္မဝါစ် အဲပညပ်လဝ် ယဝ်သ္ပဥပေါသ်အိုတ်မ္ဂး၊ သ္ပကမ်သၚ်အိုတ်မ္ဂး၊ ကမ် ခမဳဂမၠိုၚ်ဂှ်တုန် ကြက်ဒှ်ကမ် မဗဗွဲကဵုဓရ် မဟဂပ်ဝ်ပလီုပလာ် မထေက်ကုသာသနာအိုတ်ရ။ ယွံခမဳ မၞးတအ်ညးဂမၠိုၚ်မဒှ်ခမဳမဗက်ပတိတ်ဂှ် ပ္ဍဲဘာဂှ်ဟေၚ် ပ္ဍဲအပ္ဍဲသိမ်ဂှ် အတိုၚ်ဉတ်ကမ္မဝါစ် အဲပညပ်လဝ် ယဝ်သ္ပဥပေါသ်အိုတ်မ္ဂး၊ သ္ပကမ်သၚ်အိုတ်မ္ဂး၊ ကမ် မၞးတအ်ညးဂမၠိုၚ်ဂှ် ကြက်ဒှ်ကမ် မဗဗွဲကဵုဓရ် မဟဂပ်ဝ်ပလီုပလာ် မထေက်ကုသာသနာအိုတ်ရ။ မုဟိုတ်ရော ဟီုမ္ဂး ခမဳမဒှ်ဗော်သွး ခမဳမဒးဒုၚ်ဗက်ပတိတ်ဂမၠိုၚ်ဂှ် ပွမပံၚ်ဖက်ဟွံတုပ်သၟဟ်ကေုာံမၞးတအ်ညးဂမၠိုၚ်တုဲ မၞးတအ်ညးဂမၠိုၚ်လေဝ် ဟိုတ်ပွမပံၚ်ဖက်ဟွံတုပ်သၟဟ်ကေုာံခမဳဂမၠိုၚ်ဂှ်ရောၚ်။
ယွံခမဳ အရာကြက်ဒှ် ‘နာနာသံဝါသက’ ညးပွမပံၚ်ဖက်ဟွံတုပ်သၟဟ်ဂမၠိုၚ်တုန် မၞုံၜါဂကူအိုတ်ရ။ ဇကုဇကုလေဝ် ပွမပံၚ်ဖက်ဟွံတုပ်သၟဟ်ရ၊ သၚ်မညဳသာသၟဟ်သၟန်လေဝ် ဟိုတ်ပွမဟွံမၠာ်သ္ၚေဝ်အာပတ်ကီု ဟိုတ်ပွမဟွံဇအုဲဇဗအာပတ်ကီု ဟိုတ်ပွမဟွံသၠးကၠေံကွေတ်ကီု ဗက်ပတိတ်ခမဳဂှ်ရ၊ ယွံခမဳ အရာကြက်ဒှ် ‘နာနာသံဝါသက’ ညးပွမပံၚ်ဖက်ဟွံတုပ်သၟဟ်ဂမၠိုၚ်တုန် ဣဝွံမၞုံၜါဂကူအိုတ်ရ။ ယွံခမဳ အရာကြက်ဒှ် ‘သမာနသံဝါသက’ ညးမၞုံပွမပံၚ်ဖက်တုပ်သၟဟ်ဂမၠိုၚ်တုန် မၞုံၜါဂကူအိုတ်ရ၊ ဇကုဇကုလေဝ် သ္ပတဴဇကုဇကု ပွမပံၚ်ဖက်တုပ်သၟဟ်ရ၊ သၚ်မညဳသာသၟဟ်သၟန်လေဝ် ကော်ပၠုပ်(ဇရေၚ်သၚ်) ခမဳမဒးဒုၚ်ဗက်ပတိတ် ဟိုတ်ပွမဟွံမၠာ်သ္ၚေဝ်အာပတ်ကီု ဟိုတ်ပွမဟွံဇအုဲဇဗအာပတ်ကီု ဟိုတ်ပွမဟွံသၠးကၠေံကွေတ်ကီုရ၊ ယွံခမဳ အရာကြက်ဒှ် ‘သမာနသံဝါသက’ ညးမၞုံပွမပံၚ်ဖက်တုပ်သၟဟ်ဂမၠိုၚ်တုန် ဣဝွံ မၞုံၜါဂကူအိုတ်ရ ရဴဝွံ (သ္ဂးရ)။
၄၅၆။ ပ္ဍဲကာလမွဲအခိၚ် ခမဳဂမၠိုၚ် ပ္ဍဲဇြပ်ကဵုပိုဉ်အပ္ဍဲကွာန် ကယျာန်ဓဝါတ်အိုတ်ရ၊ ကတဵုဒှ်သေက်ဇဵုအိုတ်ရ၊ ဟီုသ္ဂးဂလာန်စှ်ေစးအိုတ်ရ၊ ထ္ၜးတဴ ကာယကမ်ကီု ဝစဳကမ်ကီုမဟွံဗဗွဲ ကေုာံရၚ်သကအ်အိုတ်ရ၊ ပွမကလိလောန်ကဵုတဲလေဝ် သ္ပအိုတ်ရ။
မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သကျဝၚ် ပ္ဍဲဇြပ်ကဵုပိုဉ် အပ္ဍဲကွာန် ကယျာန်ဓဝါတ်အိုတ်ရော? ကတဵုဒှ်သေက်ဇဵုအိုတ်ရော? ဟီုသ္ဂးဂလာန်စှ်ေစးအိုတ်ရော? ထ္ၜးတဴ ကာယကမ်ကီု ဝစဳကမ်ကီု မဟွံဗဗွဲ ကေုာံရၚ်သကအ်အိုတ်ရော? ပွမကလိလောန်ကဵုတဲလေဝ် သ္ပအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂဂိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် ပ္ဍဲဇြပ်ကဵုပိုဉ် အပ္ဍဲကွာန် ကယျာန်ဓဝါတ်အိုတ်ရော? ကတဵုဒှ်သေက်ဇဵုအိုတ်ရော? ဟီုသ္ဂးဂလာန်စှ်ေစးအိုတ်ရော? ထ္ၜးတဴ ကာယကမ်ကီု ဝစဳကမ်ကီု မဟွံဗဗွဲ ကေုာံရၚ်သကအ်အိုတ်ရော? သ္ပတဴ ပွမကလိလောန်ကဵုတဲလေဝ် သ္ပအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ကြဴနူဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံခမဳတအ် ခမဳဂမၠိုၚ် ပ္ဍဲဇြပ်ကဵုပိုဉ် အပ္ဍဲကွာန် ကယျာန်ဓဝါတ်အိုတ်ရ ။ ပ ။ သ္ပတဴ ပွမကလိလောန်ကဵုတဲအိုတ်ရ ဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် သၚ်ပါ်ဒကးမ္ဂး သ္ပတဴကမၠောန်ဟွံဗဗွဲဓရ်မ္ဂး ဟွံဒှ်အိုဟ်တၟိုဟ်စိုတ်မ္ဂး ‘နဗၞတ်ဝွံ ကြက်ဟွံထ္ၜးတဴ ကာမကမ်ကီု ဝစဳကမ်ကီု မဟွံဗဗွဲကေုာံရၚ်သကအ်အိုတ်ရ၊ ပွမကလိလောန်ကဵုတဲလေဝ် ကြက်ဟွံသ္ပအိုတ်ရ’ ရဴဝွံ သ္ဒးဂဇအ်ပ္ဍဲသၞာရ၊ ယွံခမဳတအ် သၚ်ပါ်ဒကးမ္ဂး သ္ပတဴကမၠောန် မဗဗွဲဓရ်မ္ဂး ဒှ်အိုဟ်တၟိုဟ်စိုတ်မ္ဂး ခြာသၞာမွဲတုဲ သ္ဒးဂဇအ်ရ” ရဴဝွံ သ္ဂးကဵုခမဳဂမၠိုၚ်ရ။
၄၅၇။ ပ္ဍဲကာလမွဲအခိၚ် ခမဳဂမၠိုၚ် ပ္ဍဲလဒေါဝ်သၚ် ကယျာန်ဓဝါတ်အိုတ်ရ၊ ကတဵုဒှ်သေက်ဇဵုအိုတ်ရ၊ ဟီုသ္ဂးဂလာန်စှ်ေစးအိုတ်ရ၊ သီုမထပက်ခၠၚ်ဗၞုတ်ပါၚ်ကေုာံရၚ်သကအ်ဂှ် ပဒတဴအိုတ်ရ၊ ခမဳဂမၠိုၚ်ဂှ် ဟွံသၟဟ်ရထ တၞဟ်နကဵုလလမ်ကၠေံ အဓိကိုရ်ဂှ်အိုတ်ရ။ ပ္ဍဲအခိၚ်ဂှ် ခမဳမွဲဇကု ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞဲါမဗဗွဲမွဲဂှ်− “ယွံကျာ်မၞုံပိုဉ် ခမဳဂမၠိုၚ် ပ္ဍဲလဒေါဝ်သၚ် ကယျာန်ဓဝါတ်အိုတ်ရ၊ ကတဵုဒှ်သေက်ဇဵုအိုတ်ရ၊ ဟီုသ္ဂးဂလာန်စှ်ေစးအိုတ်ရ၊ သီုမထပက်ခၠၚ်ဗၞုတ်ပါၚ်ကေုာံရၚ်သကအ်ဂှ် ပဒတဴအိုတ်ရ၊ ခမဳဂမၠိုၚ်ဂှ် ဟွံသၟဟ်ရထ တၞဟ်နကဵုလလမ်ကၠေံ အဓိကိုရ်ဂှ်အိုတ်ရ။ ယွံကျာ်မၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ သ္ပဟိုတ်ကဵုဓရ်ဇြဟာန်ဆာန်ဍူတုဲ ဩဝ်က္ညပြာပ်အာဇရေၚ်ခမဳဂမၠိုၚ်ဂှ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ နမဒၟံၚ်ထောံသ္ၚိတ်သ္ၚိတ်ဂှ် ဒုၚ်ကေတ်တဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ က္ညပြာပ်အာဇရေၚ် ခမဳဂမၠိုၚ်ဂှ်တုဲမ္ဂး ဂဇအ်ဖျေံပ္ဍဲသၞာမလးပညပ်လဝ်တုဲ “ယွံခမဳတအ် ဟွံဗဗွဲရ၊ လ္ပကယျာန်ဓဝါတ်အိုတ်ညိ၊ လ္ပကတဵုဒှ်သေက်ဇဵုအိုတ်ညိ၊ လ္ပပွမစှ်ေစးကဵုဇိုၚ်တဲအိုတ်ညိ” ရဴဝွံ ဟီုသ္ဂးကဵု ခမဳဂမၠိုၚ်ဂှ်ရ။
ဟီုသ္ဂး ရဴသာ်ဝွံမ္ဂး ခမဳ ‘အဓမ္မဝါဒဳ’ မလေပ်သ္ဂးဟွံဓရ်မွဲဇကုဂှ် “ယွံကျာ်မၞုံပိုဉ် တဳလမၞုံပိုဉ်ကျာ်တြဲမဒှ်တၠဓရ်ဂှ် ဩဝ်လၟတ်မၚ်ဒၟံၚ်ညိကၠာ၊ ယွံကျာ်မၞုံပိုဉ် တဳလမၞုံပိုဉ်ကျာ်တြဲဂှ် ဗွဲမသက္ကုဂဝိၚ် သီုမပတိတ်ဇြဟတ် ပွမပဒတဴဗွဲတသိုခ် ပ္ဍဲဂတမတ်ဂှ် ဩဝ်ပဒတဴညိ၊ ပိုဲဍိက်တအ်ညးဂမၠိုၚ် နပွမကယျာန်ဓဝါတ် ပွမကတဵုဒှ်သေက်ဇဵု ပွမစှ်ေစးကဵုဇိုၚ်တဲဂှ် ကြက်ပြာကဋ်အိုတ်ပၠန်ရ” ရဴဝွံ ဂရၚ်ပတီတဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲဂှ် “ယွံခမဳတအ် ဟွံဗဗွဲရ၊ လ္ပကယျာန်ဓဝါတ်အိုတ်ညိ၊ လ္ပကတဵုဒှ်သေက်ဇဵုအိုတ်ညိ၊ လ္ပပွမစှ်ေစးကဵုဇိုၚ်တဲအိုတ်ညိ” ရဴဝွံ မရနုက်ကဵုၜါဝါလေဝ် ဟီုသ္ဂးကဵု ခမဳဂမၠိုၚ်ဂှ်ရ။ ခမဳအဓမ္မဝါဒဳဂှ်လေဝ် “ယွံကျာ်မၞုံပိုဉ် တဳလမၞုံပိုဉ်ကျာ်တြဲမဒှ်တၠဓရ်ဂှ် ဩဝ်လၟတ်မၚ်ဒၟံၚ်ညိကၠာ၊ ယွံကျာ်မၞုံပိုဉ် တဳလမၞုံပိုဉ်ကျာ်တြဲဂှ် ဗွဲမသက္ကုဂဝိၚ် သီုမပတိတ်ဇြဟတ် ပွမပဒတဴဗွဲတသိုခ် ပ္ဍဲဂတမတ်ဂှ် ဩဝ်ပဒတဴညိ၊ ပိုဲဍိက်တအ်ညးဂမၠိုၚ် နပွမကယျာန်ဓဝါတ် ပွမကတဵုဒှ်သေက်ဇဵု ပွမစှ်ေစးကဵုဇိုၚ်တဲဂှ် ကြက်ပြာကဋ်အိုတ်ပၠန်ရ” ရဴဝွံ မရနုက်ကဵုၜါဝါလေဝ် ဂရၚ်ပတီတဳလမၞုံပိုဉ်ကျာ်တြဲရ။
