၂၁၁။ ကဵုအခေါၚ်ယာတ်ကၟဝ်

၃၃၈။ ပ္ဍဲကာလမွဲအခိၚ်တေံ သၟိၚ်ကာသိ ဖအောဝ်ပလံၚ်နၚ် ယာတ်ကၟဝ်မထေက်တန်ၚုဟ်မးမသုန်ကၠံ ဇရေၚ်သဝ်ဇဳဝက မၞုံယၟုံကောမရဘစ္စရ။ ပ္ဍဲအခိၚ်ဂှ် သဝ်ဇဳဝက မၞုံယၟုံကောမရဘစ္စ ဂိုၚ်ကေတ်နၚ် ယာတ်ကၟဝ်မထေက်တန်ၚုဟ်မး မသုန်ကၠံဂှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞါဲမွဲရ၊ ဂဇအ်ဒၟံၚ်ပ္ဍဲဒၞါဲမွဲတုဲမ္ဂး သဝ်ဇဳဝက မၞုံယၟုံကောမရဘစ္စဂှ် “ယွံတဳလမၞုံပိုဉ် ယာတ်ကၟဝ်မထေက်တန်ၚုဟ်မးမသုန်ကၠံဝွံ သၟိၚ်ကာသိ ဖအောဝ်ပလံၚ်နၚ် ကုအဲဍိက်ရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ဒုၚ်ဂိုၚ်ကေတ် ယာတ်ကၟဝ်အဲဍိက်ညိ၊ ပွမဒုၚ်ဂိုၚ်ကေတ်သာ်ဂှ် လုကဴကာလဗ္တံတ္ၚဲမဂၠိၚ်သ္ၚောဲ ကြက်ဒှ်တၞဟ်နဒတုဲမြမောဝ်တသိုခ် ကုအဲဍိက်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ ဒုၚ်ဂိုၚ်ကေတ်ယာတ်ကၟဝ်ရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုသဝ်ဇဳဝက မၞုံယၟုံကောမရဘစ္စ တီညာတ်ကေတ် (ဒတုဲဖဵုမြမောဝ်) ။ ပ ။ သ္ပရှ်ေသှ်ရဴဂဴတုဲမ္ဂး ပါဲစ္ဍးအာရ။ ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် ယာတ်ကၟဝ်ရ” ရဴဝွံ သ္ဂးကဵုခမဳဂမၠိုၚ်ရ။

၃၃၉။ ပ္ဍဲကာလမွဲအခိၚ် သ္ၚာဂမၠိုၚ် မဒှ်ခိုဟ်ခိုဟ်ပရေအ်ပရေအ် ကတဵုဒှ်ကုသၚ်အိုတ်ရ၊ ပ္ဍဲကြဴနူဂှ် “တဳလမၞုံပိုဉ်ကျာ်တြဲ ကဵုအခေါၚ် သ္ၚာသ်လဵုရော? ဟွံကဵုအခေါၚ် သ္ၚာသာ်လဵုရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ကဵုအခေါၚ် သ္ၚာဂမၠိုၚ်တြဴသာ်မတွံဂး သ္ၚာတောဝ်ခါမ သ္ၚာတောဝ် သ္ၚာတောဝ်သုတ် သ္ၚာကၟဝ် သ္ၚာတောဝ်ကာန် သ္ၚာနှဴလဝ်တောဝ်မသုန်သာ်တုဲ တုတ်လဝ်ရ ရဴဝွံ (သ္ဂးရ)။

၃၄၀။ ပ္ဍဲကာလမွဲအခိၚ် ယြဴခမဳဂမၠိုၚ် သာယျေန်တဴ သ္ၚာဒကာဂမၠိုၚ်ကဵုဒါန်အိုတ်ရ၊ ခမဳဂမၠိုၚ်ဂှ် တဳလမၞုံပိုဉ်ကျာ်တြဲ ကဵုအခေါၚ် သ္ၚာမွဲဂကူဟေၚ်ရ၊ ဟွံကဵုအခေါၚ် သ္ၚာၜါဂကူရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံသာယျေန် သ္ၚာပံသုကူဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမသာယျေန် သ္ၚာဒကာဂမၠိုၚ် ကဵုဒါန်ဂှ် သ္ၚာပံသုကူလေဝ် တၞဟ်နသာယျေန်ဂှ် ကဵုအခေါၚ်ရ၊ ယွံခမဳတအ် ပွမတရိုပ်စိုတ် နကဵုသီုၜါဂကူဂှ်လေဝ် အဲထိုၚ်သးရ ရဴဝွံ (သ္ဂးရ)။