၂၁၀။ အာတ်လာဘ်
၃၃၇။ ပ္ဍဲအခိၚ်ဂှ် ဇကုတဳလမၞုံပိုဉ်ကျာ်တြဲ ခြာဟွံလအ်ဟေၚ် ဒှ်အတိုၚ်သဘဴပကတိရ။ ပ္ဍဲအခိၚ်ဂှ် သဝ်ဇဳဝက မၞုံယၟုကောမရဘစ္စ ဂိုၚ်ကေတ်နၚ် ယာတ်လ္ၚတ်မကတဵုဒှ်ပ္ဍဲသိဝိရးဂှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီုမဂဇအ်ဒၟံၚ်ပ္ဍဲဒၞါဲမွဲဂှ် “ယွံတဳလမၞုံပိုဉ် အဲဍိက် မိက်အာတ်လာဘ် တဳလမၞုံပိုဉ်ကျာ်တြဲမွဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ယွံဇဳဝက ကျာ်တြဲဂမၠိုၚ် ကလိလောန်အာ နူပွမကဵုလာဘ်အိုတ်ရ ရဴဝွံ (သ္ဂးတိုန်ဂှ်) ယွံတဳလမၞုံပိုဉ် လာဘ်မအာတ်ဂှ် ဂပ်ဝ်လေဝ်ဂပ်ဝ်ရ၊ ဒုဟ်ဒဏ်လေဝ် ဟွံမွဲရ ရဴဝွံ (ဂရၚ်ပတီရ)။
ယွံဇဳဝက ဩဝ်ဟီုသ္ဂးညိ ရဴဝွံ အခိၚ်မဟီုတိုန်ဂှ် ယွံတဳလမၞုံပိုဉ် တဳလမၞုံပိုဉ်ကျာ်တြဲကီု ခမဳသၚ်ကီု ပကၚ်ရၚ်သ္ၚာပံသကူဟေၚ်ရ၊ ယွံတဳလမၞုံပိုဉ် သၟိၚ်ပဇ္ဇောတ ပလံၚ်နၚ် ယာတ်လ္ၚတ် မကတဵုဒှ်သိဝိရး ဇရေၚ်အဲဍိက်ရ၊ ထေက်တန်ကဵုၚုဟ်မး လတူယာတ်ဂမၠိုၚ်မဂၠိုၚ် လတူယာတ်လ္ၚဝ်ဂမၠိုၚ်မဂၠိုၚ် လတူယာတ်လ္ၚဝ်ကၠံဂမၠိုၚ်မဂၠိုၚ် လလူယာတ်လ္ၚဝ်လ္ၚီဂမၠိုၚ်မဂၠိုၚ် လတူယာတ်လ္ၚဝ်ကိုဋ်ဂမၠိုၚ်မဂၠိုၚ်ရ၊ ဗွဲတၟေၚ်လေဝ် ဂပ်ဝ်ထိုၚ်သးရ၊ ပြဲလောန်လေဝ်ဒှ်ရ၊ ဗွဲတၟေၚ်လေဝ် ဒယှ်တှ်ပြာကဋ်ရ၊ နူပွဳပွူလေဝ် ခိုဟ်ရ။
ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ဒုၚ်ဂိုၚ်ကေတ် ယာတ်လ္ၚဝ်မကတဵုဒှ်သိဝိရးအဲဍိက်ညိ၊ ကုခမဳသၚ်လေဝ် ဩဝ်ကဵုအခေါၚ်သ္ၚာ ဒကာဂမၠိုၚ်ကဵုဒါန်ညိ ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ ဒုၚ်ဂိုၚ်ကေတ် ယာတ်လ္ၚဝ်မကတဵုဒှ်သိဝိရးရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ နကဵုဂလာန်ဓရ် ကဵုသဝ်ဇဳဝက မၞုံယၟုကောမရဘစ္စ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ သဝ်ဇဳဝက မၞုံယၟုကောမရဘစ္စဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ) (သွက်ဂွံဒ္ဂေတ်ဓရ) ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞါဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် သ္ၚာဒကာဂမၠိုၚ်ကဵုဒါန်ရ၊ ခမဳမၞုံပၟိက်တၞဟ်နပကၚ်ရၚ် သ္ၚာပံသကူဂှ် ဩဝ်ပကၚ်ရၚ်ညိ၊ ခမဳမၞုံပၟိက်တၞဟ်နသာယျေန် သ္ၚာဒကာဂမၠိုၚ်ကဵုဒါန်ဂှ် ဩဝ်သာယျေန်ညိ။ ယွံခမဳတအ် ပွမတရိုပ်စိုတ် နသ္ၚာမွဲမွဲဂကူဟေၚ် အဲကျာ်ထိုၚ်သးရ” ရဴဝွံ သ္ဂးကဵုခမဳဂမၠိုၚ်ရ။
မၞိဟ်ဂမၠိုၚ်ပဒတဴပ္ဍဲဍုၚ်ရာဇဂြိုဟ်ဂှ် “တဳလမၞုံပိုဉ်ကျာ်တြဲ ကဵုအခေါၚ် သ္ၚာဒကာဂမၠိုၚ်ကဵုဒါန်ရဂး” ရဴဝွံ ဂွံမိၚ်ကေတ်အိုတ်ရ၊ မၞိဟ်ဂမၠိုၚ်လေဝ် “ဟိုတ်နူတဳလမၞုံပိုဉ်ကျာ်တြဲ ကဵုအခေါၚ်သ္ၚာဒကာဂမၠိုၚ်ကဵုဒါန်ဂှ်ရ ပ္ဍဲအခိၚ်လၟုဟ် ပိုဲညးဂမၠိုၚ် ကြက်ဂွံကဵုတဴ ဒါန်ဂမၠိုၚ်အိုတ်၊ ကြက်ဂွံပတုဲတဴ ကုသိုလ်ဂမၠိုၚ်အိုတ်ရ” ရဴဝွံ မြဟ်မြာအိုတ်ရ၊ စိုတ်တိုန်အိုတ်ရ၊ နမွဲတ္ၚဲဓဝ်ဟေၚ် ပ္ဍဲဍုၚ်ရာဇဂြိုဟ် သ္ၚာဂမၠိုၚ်မဂၠိုၚ်ဟွံကလ္ၚီ ကတဵုဒှ်ကၠုၚ်အိုတ်ရ။
မၞိဟ်ဂမၠိုၚ်မပဒတဴပ္ဍဲဇနပိုဒ်ဂှ် “တဳလမၞုံပိုဉ်ကျာ်တြဲ ကဵုအခေါၚ် သ္ၚာဒကာဂမၠိုၚ် ကဵုဒါန်ရဂး” ရဴဝွံ ဂွံမိၚ်ကေတ်အိုတ်ဟေၚ်ရ၊ မၞိဟ်ဂမၠိုၚ်ဂှ်လေဝ် “ဟိုတ်နူတဳလမၞုံပိုဉ်ကျာ်တြဲ ကဵုအခေါၚ်သ္ၚာဒကာဂမၠိုၚ်ကဵုဒါန်ဂှ်ရ ပ္ဍဲအခိၚ်လၟုဟ် ပိုဲညးဂမၠိုၚ် ကြက်ဂွံကဵုတဴ ဒါန်ဂမၠိုၚ်အိုတ်၊ ကြက်ဂွံပတုဲတဴ ကုသိုလ်ဂမၠိုၚ်အိုတ်ရ” ရဴဝွံ မြဟ်မြာအိုတ်ရ၊ စိုတ်တိုန်အိုတ်ရ၊ နမွဲတ္ၚဲဓဝ်ဟေၚ် ပ္ဍဲဇနပိုဒ်လေဝ် သ္ၚာဂမၠိုၚ်မဂၠိုၚ်ဟွံကလ္ၚီ ကတဵုဒှ်ကၠုၚ်အိုတ်ရ။
ပ္ဍဲအခိၚ်ဂှ် ယာတ်စၞေဟ်ဇမၠိၚ်မလ္ၜက်ကၠေဟ် (ဖ္ဍဳ) ကတဵုဒှ်ကၠုၚ် ကုသၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ယာတ်စၞေဟ်ဇမၠိုၚ် မလ္ၜက်ကၠေဟ် (ဖ္ဍဳ) ရ။ ယာတ်စၞေဟ်မခၞံလဝ်နတောဝ်သုတ် ကတဵုဒှ်ကၠုၚ် ကုသၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ယာတ်စၞေဟ်မခၞံလဝ်နတောဝ်သုတ်ရ။ ခေါဇဴဇၞော် မခၞံလဝ်နတသော်သတ် ကတဵုဒှ်ကပုၚ် ကုသၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ခေါဇဴဇၞော်မခၞံလဝ် နတသော်သတ်ရ ရဴဝွံ (သ္ဂးရ)။
ခဏ်ပဌမတုဲရ။
