၁၅၇။ ဝတ္ထုသောဏကုဋိကဏ္ဏ
၂၅၇။ ပ္ဍဲအခိၚ်ဂှ် တဳလပိုဉ်မဟာကစ္စာယ် သ္ပဒတဴတန်ဒၟံၚ် ပ္ဍဲဒဵုပပတက ဇရေၚ်ဍုၚ်ကုရရဃရ လုပ်လၟိဟ်အဝန္တိရးရ။ ပ္ဍဲအခိၚ်ဂှ် ဥပးမၞုံယၟုသောဏ မဝက်လဝ် ကယျိုၚ်ကယျဝ်ကတောဝ် မထေက်တန်ၚုဟ်မွဲကိုဋ်ဂှ် ဒှ်ညးကၠောန်ၜိုတ်ဥပကာ တဳလပိုဉ်မဟာကစ္စာယ်ရ။
ပ္ဍဲအခိၚ်ဂှ် ဥပးမၞုံယၟုသောဏ မဝက်လဝ် ကယျိုၚ်ကယျဝ်ကတောဝ် မထေက်တန်ၚုဟ်မွဲကိုဋ်ဂှ် ပြာပ်အာဇရေၚ် တဳလပိုဉ်မဟာကစ္စာယ်တုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞါဲမွဲတုဲ “ယွံတဳလပိုဉ် ဓရ်တဳလပိုဉ် ဟီုတွံလဝ်ဂှ် ဗွဲမထေက်ကြိုက် အဲဍိက် ဂွံတီကေတ်ရ၊ (အတိုၚ်ဂွံတီကေတ်လဝ်ဂှ်) ညးပဒတဴ ပ္ဍဲအဝေါၚ်ဘဝခရှ်ဂှ် တၞဟ်နဂွံဒ္ဂေတ်လ္ၚတ် ဒ္ဂေတ်မပြဲ မဍိုက်ပေၚ်သအးဇ္ၚးစၟတ် မတုပ်သၟဟ်ကဵုကၞုသၚ်ပေါတ်လဝ်တၟိဝွံ ဟွံလောဲသွာရ၊ ယွံတဳလပိုဉ် အဲဍိက်ကးပါဲကၠေံ သော်က္ဍိုပ်သော်သၟိပ်တုဲမ္ဂး သၠောံလတက်ကေတ် ယာတ်ဂမၠိုၚ် မဖျောန်လဝ်ဍာ်လွံက်တုဲ နူအဝေါၚ်ဘဝခရှ်ဂှ် မိက်ဂွံလုပ်စိုပ် အဝေါၚ်ဘဝခမဳရ၊ ယွံတဳလပိုဉ် တဳလပိုဉ်ဂှ် ဩဝ်သ္ပကဵုအဲဍိက် ထပိုဲခမဳညိ” ရဴဝွံ ဂရၚ်ပတီ တဳလပိုဉ်မဟာကစ္စာယ်ရ။
ယွံသောဏ စဵုကဵုလအိတ်လမျီု တၞဟ်နဂွံဒ္ဂေတ်လ္ၚတ် ဒ္ဂေတ်မပြဲ မ္ဒးတိက်ညးမွဲဓဝ်ဟေၚ် မ္ဒးမမွဲဗဂါပ်ဓဝ်ဟေၚ်ဂှ် ဇြိုၚ်သန်ရ၊ ယွံသောဏ ဗတိုက်ဖအောဝ်ရ၊ တၠအဲ ပ္ဍဲအဝေါၚ်ခရှ်ဂှ်ဟေၚ် ဒှ်မၞိဟ်တုဲ ဗွဲမဗဗွဲကဵုအခိၚ်အခါ (မပ္တံတ္ၚဲဥပေါသ်) ဩဝ်ဒ္ဂေတ်လ္ၚတ် ဒ္ဂေတ်မပြဲ မတွံဂး ဒၠောံဗတောန်ကျာ် မဒးတိက်ညးမွဲဓဝ်ဟေၚ် မ္ဒးစမွဲဗဂါပ်ဓဝ်ဟေၚ်ညိ ရဴဝွံ ဟီုသ္ဂးရ။ ပ္ဍဲအခိၚ်ဂှ် ပွမပတိတ်ဇြဟတ် ရဴဝွံမ္ဂး သ္ပခမဳရ ဒဒက်တဴဥပးမၞုံယၟုသောဏ မတက်လဝ် ကယျိုၚ်ကယျဝ်ကတောဝ် မထေက်တန်ၚုဟ်မွဲကိုဋ်ဂှ် လလမ်အာရ။
မရနုက်ကဵုၜါဝါလေဝ် ဥပးမၞုံယၟုသောဏ မဝက်လဝ် ကယျိုၚ်ကယျဝ်ကတောဝ်ထေက်တန်ၚုဟ်မးမွဲကိုဋ်ဂှ် ။ ပ ။ မရနုက်ကဵုပိဝါလေဝ် ဥပးမၞုံယၟုသောဏ မဝက်လဝ်ကယျိုၚ်ကယျဝ်ကတောဝ် မထေက်တန်ၚုဟ်မွဲကိုဋ်ဂှ် ပြာပ်အာဇရေၚ်တဳလပိုဉ်မဟာကစ္စာယ်တုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞါဲမွဲတုဲ “ယွံတဳလပိုဉ် ဓရ်တဳလပိုဉ်ဟီုတွံလဝ်ဂှ် ဗွဲမထေက်ကြိုက် အဲဍိက်ဂွံတီကေတ်ရ၊ (အတိုၚ်ဂွံတီကေတ်လဝ်ဂှ်) ညးမပဒတဴပ္ဍဲအဝေါၚ်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေၚ်သအးဇ္ၚးစၟတ် မတုပ်သၟဟ်ကဵုကၞုသၚ်ပေါတ်လဝ်တၟိဝွံ ဟွံလောဲသွာရ၊ ယွံတဳလပိုဉ် အဲဍိက်ကးပါဲကၠေံ သော်က္ဍိုပ်သော်သၟိပ်တုဲမ္ဂး သၠောံလတက်ကေတ် ယာတ်ဂမၠိုၚ်မဖျောန်လဝ်ဍာ်လွံက်တုဲ နူအဝေါၚ်ဘဝခရှ်ဂှ် မိက်ဂွံလုပ်စိုပ် အဝေါၚ်ဘဝခမဳရ၊ ယွံတဳလပိုဉ် တဳလပိုဉ်ဂှ် ဩဝ်သ္ပကဵုအဲဍိက် ထပိုဲခမဳညိ” ရဴဝွံ ဂရၚ်ပတီ တဳလပိုဉ်မဟာကစ္စာဲရ။
ပ္ဍဲအခိၚ်ဂှ် တဳလပိုဉ်မဟာကစ္စာဲ သ္ပကဵုထပိုဲ ဥပးမၞုံယၟုသောဏ မဝက်လဝ် ကယျိုၚ်ကယျဝ်ကတောဝ် မထေက်တန်ကဵုၚုဟ်မွဲကိုဋ်ရ။ ပ္ဍဲအခိၚ်ဂှ် အဝန္တိရးဇနပိုဒ်ဒက္ခိဏာပထဂှ် ခမဳအောန်တဴရ၊ ပ္ဍဲအခိၚ်ဂှ် တဳလပိုဉ်မဟာကစ္စာယ် နမကလိလောန်ပိသၞာံ ဗွဲမဒှ်လၟောၚ်ဍောၚ်ၜိုတ်ကဵုဂကောံခမဳ မၞုံဂကောံစှ်ဇကု နူဌာန်ဂှ်ဂှ် ကောံဓရီုတုဲမ္ဂး ပကဵုခမဳပယျၚ် တဳလပိုဉ်သောဏရ။
