၁၀၈။ ပါဲကၠေံ ပွမဂေတ်ၚ္ၚေၚ်ဒေသစာရိတ်ပ္ဍဲအပ္ဍဲဒဂိုန်
၁၈၅။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပြာပ်လုပ်ဒဂိုန်တုဲ ပ္ဍဲအပ္ဍဲဒဂိုန် ဂေတ်ဂ္ၚေၚ်ဒေသစာရိတ်အိုတ်ရ။ မၞိဟ်ဂမၠိုၚ် တုပ်သၟဟ်ကိုပ်ကၠာတေံဟေၚ် “ မုဟိုတ် ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် မုဟ်ကျာ၊ က္ညၚ်၊ ကသီု သီုဥတုပိပြကာ လၞိန်ဗပိန်လိုန်ကဆိုန်တဴ တၞံဆုချောဲမလမ္စံက်ဍိုပ်ဍဴဂမၠိုၚ် ပြိုက်ပျဲတဴဣန္ဒြဳမွဲမတွံဂးလမျီု ကဵုသတ်သၟတ်ဂမၠိုၚ်ဗွဲမဂၠိုၚ် အာစိုပ်ပွမလီုလာ်တုဲ ဂေတ်ဂ္ၚေၚ်ဒေသစာရိတ်အိုတ်ရော? တဳဂမၠိုၚ် မၞုံကဵုကွေတ်မသအာၚ်နူသာသနာ မၞုံကဵုဓရ်မဂပ်ဝ်တွံလဝ် ဗွဲဟွံဒးရးလေဝ် လုကဴဂိတုဗြဴဂမၠိုၚ် သတၚ်တန်တဴမံၚ်ထောံမသက္ကုဂဝိၚ်အိုတ်ဏီရ။ ဂစေမ်ဂမၠိုၚ်လေဝ် ကၠောန်သ္ပသပေါဲ ပ္ဍဲကၞောတ်ဆုဂမၠိုၚ်တုဲ မံၚ်ထောံဗိုန်ဗိုန်ဗတ်ဗတ် ဗွဲမသက္ကုဂဝိၚ်အိုတ်ဏီရ။ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံတုန် မုဟ်ကျာ၊ က္ညၚ်၊ ကသီု သီုဥတုပိပြကာ လၞိန်ဗပိန်လိုန်ကဆိုန်တဴ တၞံဆုချောဲမလမ္စံက်ဍိုပ်ဍဴဂမၠိုၚ် ပြိုက်ပျဲတဴဣန္ဒြဳမွဲ မတွံဂးလမျီု ကဵုသတ်သၟတ်ဂမၠိုၚ်ဗွဲမဂၠိုၚ် အာစိုပ် ပွမလီုလာ်တုဲ ဂေတ်ဂ္ၚေၚ်ဒေသစာရိတ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပြာပ်လုပ်ဒဂိုန်တုဲ ပ္ဍဲအပ္ဍဲဒဂိုန် ဂေတ်ဂ္ၚေၚ်ဒေသစာရိတ် အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ပြာပ်လုပ်ဒဂိုန်တုဲ လုကဴပုရိမဝသ်ပိဂိတုကီု လုကဴပစ္ဆိမဝသ်ပိဂိတုကီု ဟွံပဒတဴတုဲ ဟဂပ်ဝ်ဂေတ်ဂ္ၚေၚ်အာကၠုၚ်ရ။ ကုခမဳမအာကၠုၚ်ဂှ် ဒးအာပတ်ဒုက္ကဋ်ရ” သ္ဂးကဵုခမဳဂမၠိုၚ်ရ။
၁၈၆။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဟွံမွဲပၟိက် တၞဟ်နပြာပ်လုပ်ဒဂိုန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဒးပြာပ်လုပ်ဒဂိုန်ဟေၚ်ရ။ ကုခမဳ မဟွံပြာပ်လုပ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲတ္ၚဲပြာပ်လုပ်ဒဂိုန်ဂှ် ဟွံမွဲပၟိက် တၞဟ်န်ပြာပ်လုပ်ဒဂိုန်ဒှ်တုဲ နကဵုစေတနာ ဟွံမိက်ပြာပ်လုပ်ဒဂိုန်ဂှ် ကလိလောန်ထောံဘာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲတ္ၚဲပြာပ်လုပ်ဒဂိုန်ဂှ် ဟွံမွဲပၟိက် တၞဟ်နပြာပ်လုပ်ဒဂိုန်ဒှ်တုဲ ကဵုစေတနာဟွံမိက်ပြာပ်လုပ်ဒဂိုန်ဂှ် ဟဂပ်ဝ်ကဵုကလိလောန်ဘာရ။ ကုခမဳ မကဵုကလိလောန်အာဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မိက်ဂွံတံၚ်ဓဇက်ဒဂိုန်ဒှ်တုဲ “တဳလပိုဉ်ဂမၠိုၚ် ပ္ဍဲဂိတုကြက်ကၠုၚ်စိုပ်ဂတတေံ ယဝ်ပြာပ်လုပ်ဒဂိုန်အိုတ်မ္ဂး ခိုဟ်သန်ရ” ရဴဝွံ ဖအောဝ်ဗလးဏာကလုတ် ဇရေၚ်ခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် တၞဟ်နဒ္ဂေတ်ဗက် ပၟိက်သၟိၚ်ဂမၠိုၚ်ဂှ် ကဵုအခေါၚ်ရ” ရဴဝွံ (သ္ဂးရ)။
