၁၀၇။ ကဵုအခေါၚ်ပွမပြာပ်လုပ်ဒဂိုန်
၁၈၄။ ပ္ဍဲကာလမွဲအခိၚ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ဘာဝေဠုဝန် မဒှ်ဒၞာဲကဵုစၞ ကုယန်လ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ဟိုတ်မဟဂွံပညပ် ပြာပ်လုပ်ဒဂိုန် ကုခမဳဂမၠိုၚ်ဏီဂှ်ရ ခမဳဂမၠိုၚ် မုဟ်ကျာ၊ က္ညင်၊ ကသီု သီုဥတုပိပြကာ ဂေတ်ဂ္ၚေၚ်ဒေသစာရိတ်အိုတ်ရ။ မၞိဟ်ဂမၠိုၚ်ဂှ် ‘မုဟိုတ် ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် မုဟ်ကျာ၊ က္ညၚ်၊ ကသီု သီုဥတုပိပြကာ လၞိန်ဗပိန်လိုန်ကဆိုန်တဴ တၞံဆုချောဲမလမ္စံက်ဍိုပ်ဍဴဂမၠိုၚ် ပြိုက်ပျဲတဴဣန္ဒြဳမွဲမတွံဂးလမျီု ကဵုသတ်သၟတ်ဂမၠိုၚ်ဗွဲမဂၠိုၚ် အာစိုပ်ပွမလီုလာ်တုဲ ဂေတ်ဂ္ၚေၚ်ဒေသစာရိတ်အိုတ်ရော? တဳဂမၠိုၚ် မၞုံကဵုကွေတ်မသအာၚ်နူသာသနာ မၞုံကဵုဓရ်မဂပ်ဝ်တွံလဝ် ဗွဲဟွံဒးရးလေဝ် လုကဴဂိတုဗြဴဂမၠိုၚ် သတၚ်တန်တဴမံၚ်ထောံမသက္ကုဂဝိၚ်အိုတ်ဏီရ။ ဂစေမ်ဂမၠိုၚ်လေဝ် ကၠောန်သ္ပသပေါဲ ပ္ဍဲကၞောတ်ဆုဂမၠိုၚ်တုဲ မံၚ်ထောံဗိုန်ဗိုန်ဗတ်ဗတ် ဗွဲမသက္ကုဂဝိၚ်အိုတ်ဏီရ။ ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံတုန် မုဟ်ကျာ၊ က္ညၚ်၊ ကသီု သီုဥတုပိပြကာ လၞိန်ဗပိန်လိုန်ကဆိုန်တဴ တၞံဆုချောဲမလမ္စံက်ဍိုပ်ဍဴဂမၠိုၚ် ပြိုက်ပျဲတဴဣန္ဒြဳမွဲ မတွံဂးလမျီု ကဵုသတ်သၟတ်ဂမၠိုၚ်ဗွဲမဂၠိုၚ် အာစိုပ် ပွမလီုလာ်တုဲ ဂေတ်ဂ္ၚေၚ်ဒေသစာရိတ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် တၞဟ်နပြာပ်လုပ်ဒဂိုန် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် “မုရဴပ္ဍဲအခိၚ်မွဲ ဂပ်ဝ်ပြာပ်လုပ်ဒဂိုန်ရော?” ရဴဝွံ ကသပ်ဒှ်ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် တၞဟ်နပြာပ်လုပ်ဒဂိုန် ပ္ဍဲဥတုဗြဲဂှ် ကဵုအခေါၚ်ရ” ရဴဝွံ သ္ဂးရ။
ပ္ဍဲအခိၚ်ဂှ် “ပွမပြာပ်လုပ်ဒဂိုန်ဂမၠိုၚ် မၞုံဗၞတ်မုစိအိုတ်ရော?” ရဴဝွံ ကသပ်ဒှ်ကုခမဳဂမၠိုၚ်ရ။ ဂရၚ်ပတီ ဟိုန်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ပွမပြာပ်လုပ်ဒဂိုန်ဂမၠိုၚ် ပွမပြာပ်လုပ်ဒဂိုန်ပုရိမဝသ် ပွမပြာပ်လုပ်ဒဂိုန်မစ္ဆိမဝသ် ရဴဝွံ မၞုံၜါပြကာအိုတ်ရ၊ ပ္ဍဲတ္ၚဲဲဂိတုဒဂိုန်မွဲစွေက် သ္ဒးပြာပ်လုပ်ဒဂိုန်ပုရိမဝသ်ရ။ နူဂိတုဒဂိုန်ပေၚ် ပ္ဍဲတ္ၚဲမွဲစွေက် မကလိလောန်မွဲဂိတု ‘ဂိတုခ္ဍဲသဳမွဲစွေက်’ သ္ဒးပြာပ်လုပ်ဒဂိုန်ပစ္ဆိမဝသ်ရ။ ယွံခမဳတအ် ပွမပြာပ်လုပ်ဒဂိုန်ဂမၠိုၚ် ဣဝွံမၞုံၜါဂကူအိုတ်ရ ရဴဝွံ (သ္ဂးရ)။
