၈၉။ မပ္တံကဠောဂမၠိုၚ်ရပ်ကေတ်

၁၆၆။ ပ္ဍဲကာလမွဲအခိၚ် ပ္ဍဲတ္ၚဲဥပေါသ် ကဠောမသဂမၠိုၚ် ရပ်ကတ်ခမဳမွဲဇကုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲတ္ၚဲဥပေါသ် ကဠောမသဂမၠိုၚ် ရပ်ကေတ်ခမဳအိုတ်ရ၊ ခမဳဂမၠိုၚ် “ယွံဒကာတအ် အာတ်ပါန််အခေါၚ်ရ၊ စဵုကဵုသ္ပဥပေါသ်တုဲ မၞးတအ်ညးဂမၠိုၚ် သြဝ်ဗလးကဵုခမဳဝွံ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ဂှ်ရ။ အတိုၚ်အာတ်ပါန်အခေါၚ်ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး ခမဳဂမၠိုၚ် “ယွံဒကာတအ် အာတ်ပါန်အခေါၚ်ရ၊ စဵုကဵုကဵုပါရိသုဒ္ဓိတုဲ မၞးတအ်ညးဂမၠိုၚ် သြဝ်ပဒတဴ ပ္ဍဲဌာန်မဗဗွဲ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ရ။ အတိုၚ်ဟီုသ္ဂးရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံဒကာတအ် အာတ်ပါန်အခေါၚ်ရ၊ စဵုကဵုသ္ပသံဃဥပေါသ်တုဲ မၞးတအ်ညးဂမၠိုၚ် သြဝ်ရၚ်တၠုၚ်ပတိတ် ခမဳဝွံ မ္ၚးသိမ် ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုကဠောမသဂမၠိုၚ်ဂှ်ရ။ အတိုၚ်ဟီုသ္ဂးရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ သၚ်မဒှ်ဝဂ် ‘ဂကောံပါ်ဒကး’ဂှ် ဟဂပ်ဝ်သ္ပဥပေါသ်ဟေၚ်ရ၊ ယဝ်သ္ပမ္ဂး၊ ဒးအာပတ်ဒုက္ကဋ်ရ။

ယွံခမဳတအ် ပ္ဍဲတ္ၚဲဥပေါသ် သၟိၚ်ဂမၠိုၚ် ရပ်ကေတ်ခမဳအိုတ်ရ ။ ပ ။ ကမၠတ်ဒမၠဂမၠိုၚ် ရပ်ကေတ်အိုတ်ရ။ သၟာသၟုၚ်လဗၚ်သုရာဂမၠိုၚ် ရပ်ကေတ်အိုတ်ရ။ ခမဳသၞဂမၠိုၚ် ရပ်ကေတ်အိုတ်ရ။ ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုသ္ပဥပေါသ်တုဲ မၞးတအ်ညးဂမၠိုၚ် သြဝ်ဗလးကဵုခမဳဝွံ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ဂှ်ရ။ အတိုၚ်အာတ်ပါန်အခေါၚ်ရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုကဵုပါရိသုဒ္ဓိတုဲ မၞးတအ်ညးဂမၠိုၚ် သြဝ်ပဒတဴ ပ္ဍဲဌာန်မဗဗွဲ ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ရ။ အတိုၚ်ဟီုသ္ဂးရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ ခမဳဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ စဵုကဵုသ္ပသံဃဥပေါသ်တုဲ မၞးတအ်ညးဂမၠိုၚ် သြဝ်ရၚ်တၠုၚ်ပတိတ် ခမဳဝွံ မ္ၚးသိမ် ဗၞတ်မွဲခဏအိုတ်ညိ” ရဴဝွံ သ္ဒးဟီုကဵုခမဳသၞဂမၠိုၚ်ဂှ်ရ။ အတိုၚ်ဟီုသ္ဂးရဴဝွံ ကလိဂွံမ္ဂး ဆာဲသန်ရ၊ ယဝ်ဟွံကလိဂွံမ္ဂး၊ သၚ်မဒှ်ဝဂ် ‘ဂကောံပါ်ဒကး’ဂှ် ဟဂပ်ဝ်သ္ပဥပေါသ်ဟေၚ်ရ၊ ယဝ်သ္ပမ္ဂး၊ ဒးအာပတ်ဒုက္ကဋ်ရ ရဴဝွံ (သ္ဂးရ)။