၂၇၅။ ပွမက္ညအာဂြိုပ်ပါလိလဲ
၄၆၇။ ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတဳလပိုဉ်အနုရုဒ္ဓ တဳလပိုဉ်နန္ဒိယ တဳလပိုဉ်ကိမိလတအ် တီညာတ်ကေတ် (ဒတုဲဖဵု) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲ ဒၠိုက်ကတဵုနူဒၞာဲတုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ် ဂြိုပ်ပါလိလဲမ္ဂး စိုပ်အာဂြိုပ်ပါလိလဲတုဲ သ္ပဒတဴတန်ဒၟံၚ် ပ္ဍဲဇရေၚ်တၞံအံၚ်ရေၚ်ဗၠာဲ မၞုံအပ္ဍဲသပိုဟ်ဂြိုပ်ရက္ခိတ ဇရေၚ်ကွာန်ပါလိတယျကရ။
ပ္ဍဲအခိၚ်ဂှ် ကုတဳလမၞုံပိုဉ်ကျာ်တြဲ မသတၚ်ဒၟံၚ်ညးမွဲဓဝ် ပ္ဍဲဌာန်လ္ၚုသ္ၚိတ်ဇြဂှ် “အဲကိုပ်ကၠာတေံ တ္ၜန်တ္ၜောဲနှဴရဴတဴ ကေုာံခမဳကောန်ဍုၚ်ကောသမ္ဗဳဂမၠိုၚ် လေပ်သ္ပပွမကယျာန်ဓဝါတ်ကြဴမတ်, ဂတမတ် ပွမဟီုသ္ဂးစှ်ေစး လေပ်သ္ဂးဂလာန်မဂၠိုၚ်တုြ လေပ်သ္ပအဓိကိုရ်ပ္ဍဲသၚ်ဂှ်ဒှ်တုဲ ဟွံဂွံပဒဴ ကၠုၚ်ဗွဲတသိုခ်ရ၊ အဲ ပ္ဍဲအခိၚ်လၟုဟ်တုန် စ္ဍးခြာကေုာံခမဳကောန်ဍုၚ်ကောသမ္ဗဳဂမၠိုၚ် လေပ်သ္ပပွမကယျာန်ဓဝါတ်ကြဴမတ်, ဂတမတ် ပွမဟီုသ္ဂးစှ်ေစး လေပ်သ္ဂးဂလာန်မဂၠိုၚ်တုဲ လေပ်သ္ပအဓိကိုရ် ပ္ဍဲသၚ်ဂှ်ဒှ်တုဲ သီုသကအ်ပွံၚ်ဟွံပါ ညးမွဲဓဝ် ဂွံပဒတဴဗွဲတသိုခ်ရ” ရဴဝွံ ကသပ်ဒှ်ရ။
စိၚ်ဇၟူဇၞော်မွဲလေဝ် တ္ၜန်တ္ၜောဲနှဴရဴတဴ ကေုာံစိၚ်တၟက်ဇၞော် စိၚ်ၝောံဇၞော် စိၚ်ပၠိုၚ်ပၠိုၚ် (စိၚ်ဒံၚ်) ကောန်စိၚ်သၟတ်ဂမၠိုၚ်ဒှ်တုဲ ချောဲတၞုၚ်ကၟဝ်ပိုတ်ဂမၠိုၚ်လေဝ် ဒးစရ၊ စိၚ်ဇၞူဇၞော်ဂှ် ဝးပကဝ်တုဲ ဝးပကဝ်တုဲ တၞာၚ်ဆုတၞးဆုဖျေံလဝ်ဂမၠိုၚ်လေဝ် (စိၚ်သအာၚ်ဂမၠိုၚ်) စထောံအိုတ်ရ၊ (စိၚ်ဇၟူဇၞော်ဂှ်) ဍာ်ကၠိကၠုလေဝ် ဒးသုၚ်ရ၊ စှ်ေသၞေဟ်ဍာ်ကီု တိုန်နူသၞေဟ်ဍာ်ကီု စိၚ်ၝောဴဂမၠိုၚ် ဇီုပေါတ်ၜေတ်ဓရေတ် ဇကုစိၚ်ဇၟူဇၞော်ဂှ်တုဲ အာအိုတ်ရ။
ပ္ဍဲအခိၚ်ဂှ် ကုစိၚ်ဇၟူဇၞော်ဂှ် “အဲ တ္ၜန်တ္ၜောဲနှဴရဴတဴ ကေုာံစိၚ်တၟက်ဇၞော် စိၚ်ၝောံဇၞော် စိၚ်ပၠိုၚ်ပၠိုၚ် (စိၚ်ဒံၚ်) ကောန်စိၚ်သၟတ်ဂမၠိုၚ်ဒှ်တုဲ ချောဲတၞုၚ်ကၟဝ်ပိုတ်ဂမၠိုၚ်လေဝ် ဒးစရ၊ အဲဝးပကဝ်တုဲ ဝးပကဝ်တုဲ တၞာၚ်ဆုတၞးဆုဖျေံလဝ်ဂမၠိုၚ်လေဝ် (စိၚ်သအာၚ်ဂမၠိုၚ်) စထောံအိုတ်ရ၊ ဍာ်ကၠိကၠုလေဝ် အဲဒးသုၚ်ရ၊ စှ်ေသၞေဟ်ဍာ်ကီု တိုန်နူသၞေဟ်ဍာ်ကီု စိၚ်ၝောံဂမၠိုၚ် ဇီုပေါတ်ၜေတ်ဓရေတ် ဇကုအဲတုဲ အာအိုတ်ရ၊ အဲညးမွဲဓဝ်ဟေၚ် စာ်စ္ဍးနူဂကောံစိၚ်တုဲ ဂွံပဒတဴမ္ဂး ခိုဟ်ရ” ရဴဝွံ ကသပ်ဒှ်ရ။
ပ္ဍဲအခိၚ်ဂှ် စိၚ်ဇၟူဇၞော်ဂှ် ပါဲစ္ဍးကၠုၚ် နူဂကောံစိၚ်တုဲ ပြာပ်စိုပ်အာဇရေၚ် တဳလမၞုံပိုဉ်ကျာ်တြဲ အပ္ဍဲဇရေၚ်တၞံအံၚ်ရေၚ်ဗၠာဲ မၞုံအပ္ဍဲသပိုဟ်ဂြိုပ်ရက္ခိတ ဇရေၚ်ကွာန်ပါလိလေယျကတုဲမ္ဂး တၞဟ်နသွက်တဳလမၞုံပိုဉ်ကျာ်တြဲ နကဵုလပှ် စွံပတန် ဍာ်သုၚ်ဍာ်ရပ်စပ်ရ၊ တၞံဆုချောဲမလမ္စံက်ဍိုပ်ဍဴဂမၠိုၚ်လေဝ် သောၚ်သအးၚးတးရ။
ပ္ဍဲအခိၚ်ဂှ် ကုစိၚ်ဇၟူဂှ် “အဲ ပ္ဍဲကိုပ်ကၠာတေံ တ္ၜန်တ္ၜောဲနှဴရဴတဴ ကေုာံစိၚ်တၟက်ဇၞော် စိၚ်ၝောံဇၞော် စိၚ်ပၠိုၚ်ပၠိုၚ် (စိၚ်ဒံၚ်) ကောန်စိၚ်သၟတ်ဂမၠိုၚ်ဒှ်တုဲ ဟဂွံပဒတဴဗွဲတသိုခ်ရ၊ ချောဲတၞၚ်ကၟဝ်ပိုတ်ဂမၠိုၚ်လေဝ် ဒးစရ၊ အဲဝးပကဝ်တုဲ ဝးပကဝ်တုဲ တၞာၚ်ဆုတၞးဆုဖျေံလဝ်ဂမၠိုၚ်လေဝ် (စိၚ်သအာၚ်ဂမၠိုၚ်) စထောံအိုတ်ရ၊ ဍာ်ကၠိကၠုလေဝ် အဲ ဒးသုၚ်ရ၊ စှ်ေသၞေဟ်ဍာ်ကီု တိုန်နူသၞေဟ်ဍာ်ကီု စိၚ်ၝောံဂမၠိုၚ် ဇီုပေါတ်ၜေတ်ဓရေတ် ဇကုအဲတုဲ အာအိုတ်ရ၊ အဲဂှ် ပ္ဍဲအခိၚ်လၟုဟ် ဝေၚ်ပါဲကၠေံ စိၚ်တၟက်ဇၞော် စိၚ်ၝောံဇၞော် စိၚ်ပၠိုၚ်ပၠိုၚ် (စိၚ်ဒံၚ်) ကောန်စိၚ်သၟတ်ဂမၠိုၚ်ဒှ်တုဲ သီုသကအ်ပွံၚ်ဟွံပါ ညးမွဲဓဝ်ဟေၚ် ဂွံပဒတဴဗွဲတသိုခ်ရ” ရဴဝွံ ကသပ်စိုတ်ဒှ်ရ။
ကြဴနူဂှ် တဳလမၞုံပိုဉ်ကျာ်တြဲ တီကေတ် စာ်စ္ဍးနူသကအ်ပွံၚ်တုဲ ပွမဂွံပဒတဴဗွဲတသိုခ်ဇကုကီု တီကေတ် ကသပ်စိုတ် စိၚ်ဇၟူဇၞော် နကဵုစိုတ်ဇကုတုဲကီု ပ္ဍဲအထိုက်အတန်ဂှ်−
“အဲ ညးမွဲဇကုဓဝ် သၟဟ်ညံၚ်ရဴမိပ်လဟိၚ် ပ္ဍဲဂြိုပ်ကီု စိၚ်ဇၟူဇၞော်လေဝ် ညးမွဲဓဝ် မိပ်လဟိၚ်မံၚ်ဂှ် စိုတ်စိၚ်ဇၟူဇၞော် မၞုံဂၞေဟ်၊ ဒြၚ် မတုပ်သၟဟ်ကေုာံတိုၚ်တဝ်စၞပ်ကွဳဂှ် တုပ်သၟဟ်ကဵု စိုတ်အဲရ” ရဴဝွံ ကြီုဂအောတ်တိုန်ဥဒါန်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲကွာန်ပါလိလေယျက ဗွဲမမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်တုဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။
ပ္ဍဲအခိၚ်ဂှ် ဥပးကောန်ဍုၚ်ကောသမ္ဗဳဂမၠိုၚ် “ခမဳဂမၠိုၚ်မပဒတဴ ပ္ဍဲဍုၚ်ကောသမ္ဗဳဝွံ သ္ပကဵုလလေၚ်ဖဵုပိုဲညးဂမၠိုၚ်မဂၠိုၚ်အိုတ်ရ၊ ဟိုတ်နူခမဳဂမၠိုၚ်ဝွံ ပ္ဍဵုပ္ဍိုက်ရာန်သကိုတ်ဂှ်ရ တဳလမၞုံပိုဉ်ကျာ်တြဲ က္ညစ္ဍးအာရ၊ လၟုဟ် ပိုဲညးဂမၠိုၚ် ဟွံလ္ၚောဝ် တဳလပိုဉ်ခမဳဂမၠိုၚ် မပဒတဴပ္ဍဲဍုၚ်ကောသမ္ဗဳဝွံမ္ဂး၊ ဟွံဒစးဒုၚ်တၠုၚ်တရဴမ္ဂး၊ ဟွံသ္ပပွမပၚ်ခၠအ်သၟိပ်တဲ ပွမရှ်ေသှ်ေရဴဂဴမ္ဂး၊ ဟွံသ္ပပူဇဴသကာမ္ဂး၊ ဟွံသ္ပ အဲပရဲမ္ဂး၊ ဟွံသၞေံသၞဴမ္ဂး၊ ဟွံပြာပ်ခမမ္ဂး၊ ဟွံပူဇဴမ္ဂး၊ ၜိုန်ကၠုၚ်ဂ္ၚေၚ်ပိဏ္ဍပါတ်လေဝ် ဟွံလံၚ်ကဵုပိဏ္ဍပါတ်မ္ဂး၊ တဳလပိုဉ်ဂမၠိုၚ်ဝွံ ဌာန်သအာၚ်လေဝ် ကြက်စ္ဍးအာအိုတ်ရ၊ ခရှ်လေဝ် ကြက်ရာံတိတ်အိုတ်ရ၊ တဳလမၞုံပိုဉ်ကျာ်တြဲလေဝ် ကြက်ကဵုပြေစိုတ်အိုတ်ရ” ရဴဝွံ ဟီုဓရီုသဳကၠဳတုဲ ဟွံလ္ၚောဝ် ခမဳဂမၠိုၚ်အိုတ်ရ၊ ဟွံဒစးဒုၚ်တၠုၚ်တရဴအိုတ်ရ၊ ဟွံသ္ပပွမပၚ်ခၠအ်သၟိပ်တဲ ပွမရှ်ေသှ်ေရဴဂဴအိုတ်ရ၊ ဟွံသ္ပပူဇဴသကာအိုတ်ရ၊ ဟွံသ္ပအဲပရဲအိုတ်ရ၊ ဟွံသၞေံသၞဴအိုတ်ရ၊ ဟွံပြာပ်ခစအိုတ်ရ၊ ဟွံပူဇဴအိုတ်ရ၊ ၜိုန်ကၠုၚ်ဂ္ၚေၚ်ပိဏ္ဍပါတ်လေဝ် ဟွံလံၚ်ကဵုပိဏ္ဍပါတ်အိုတ်ရ။
ပ္ဍဲအခိၚ်ဂှ် ခမဳပဒတဴပ္ဍဲဍုၚ်ကောသမ္ဗဳဂမၠိုၚ် ဥပးကောန်ဍုၚ်ကောသမ္ဗဳဂမၠိုၚ် ဟွံသ္ပမပ္တံပွမပူဇဴအိုတ်မ္ဂး “ယွံဒကာတအ် ပိုဲညးဂမၠိုၚ် လၟုဟ်ဟေၚ် အာဍုၚ်သာရဝှ်တုဲမ္ဂး ကြက်ကဵုလလမ်ကၠေံအဓိကိုရ် ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ” ရဴဝွံ သ္ဂးအိုတ်ရ။
