၅၉။ ဝတ္ထုနိဿယ မပ္တံခမဳကွာ်တရဴဂမၠိုၚ်
၁၂၁။ ပ္ဍဲကာလမွဲအခိၚ် ခမဳမွဲဇကု သွိုန်ဗပိုန်တဴ တရဴအဓာန်မဂၠိၚ်သ္ၚောဲ ပ္ဍဲဇနပိုဒ်ကောသလရးဂမၠိုၚ်ရ၊ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘သိုဟွံကေတ်နိဿယဂှ် ဟဂပ်ဝ်ပဒတဴရ’ ရဴဝွံ ပညပ်လဝ်ရ၊ အဲလေဝ် သီုမၞုံကဵုကိစ္စ ဒးဂိုၚ်ကေတ်နိဿယဏီဂှ် သွိုန်ဗပိုန်တဴတရဴအဓာန်မဂၠိၚ်သ္ၚောဲရ၊ အဲ မုရဴသာ်လဵု ဂွံဒ္ဂေတ်ညိရော?” ရဴဝွံ ကသပ်ဒှ် ကုခမဳဂှ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳမသွိုန်ဗပိုန်တဴ တရဴအဓာန်မဂၠိၚ်သ္ၚောဲ မဟဂွံဂိုၚ်ကေတ်နိဿယဏီဂှ် တၞဟ်နပဒတဴ သီုဟွံဂိုၚ်ကေတ်နိဿယဂှ် ကဵုအခေါၚ်ရ” ရဴဝွံ (သ္ဂးရ)။
ပ္ဍဲကာလမွဲအခိၚ် ခမဳဂမၠိုၚ်ၜါဇကု သွိုန်ဗပိုန်တဴ တရဴအဓာမဂၠိၚ်သ္ၚောဲ ပ္ဍဲဇနပိုဒ်ကောသလရးအိုတ်မ္ဂး စိုပ်အာဘာမွဲအိုတ်ရ။ ပၞောဝ်ၜါဇကုဂမၠိုၚ်ဂှ် ခမဳမွဲဇကုဂှ် ဂိယဲအာရ။ ကုခမဳမဂိယဲဂှ် “တဳလမၞုံပိုဉ်ကျာ်တြဲဂှ် ‘သီုဟွံကေတ်နိဿယဂှ် ဟဂပ်ဝ်ပဒတဴရ’ ရဴဝွံ ပညပ်လဝ်ရ၊ အဲလေဝ် သီုမၞုံကဵုကိစ္စ ဒးဂိုၚ်ကေတ်နိဿယဏီဂှ် ဂိယဲအာရ၊ အဲ မုရဴသာ်လဵု ဂွံဒ္ဂေတ်ညိရော?” ရဴဝွံ ကသပ်ဒှ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ “ယွံခမဳတအ် ခမဳမဂိယဲ မဟဂွံဂိုၚ်ကေတ်နိဿယဏီဂှ် တၞဟ်နပဒတဴ သီုဟွံဂိုၚ်ကေတ်နိဿယဂှ် ကဵုအခေါၚ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ကုခမဳမကၠောန်ၜိုတ် ခမဳဂိယဲဂှ် “တဳလမၞုံပိုဉ်ကျာ်တြဲဂှ် ‘သီုဟွံကေတ်နိဿယဂှ် ဟဂပ်ဝ်ပဒတဴရ’ ရဴဝွံ ပညပ်လဝ်ရ၊ အဲလေဝ် မၞုံကဵုကိစ္စ ဒးဂိုၚ်ကေတ်နိဿယဏီရ၊ ခမဳဝွံလေဝ် ဂိယဲဒၟံၚ်ရ၊ အဲ မုရဴသာ်လဵု ဂွံဒ္ဂေတ်ညိရော?” ရဴဝွံ ကသပ်ဒှ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳမကၠောန်ၜိုတ်ခမဳဂိယဲ မဟဂွံဂိုၚ်ကေတ်နိဿယဏီဂှ် (ခမဳဂိယဲ) ကြက်ကၠောန်ၜိုတ်ဂှ် အာတ်အခေါၚ်မ္ဂး တၞဟ်နပဒတဴ သီုဟွံဂိုၚ်ကေတ်နိဿယဂှ် ကဵုအခေါၚ်ရ” ရဴဝွံ (သ္ဂးရ)။
ပ္ဍဲကာလမွဲအခိၚ်ခမဳမွဲဇကုဂှ် ပဒတဴပ္ဍဲဂြိုပ်ရ၊ ကုခမဳဂှ်လေဝ် ပ္ဍဲဘာဂှ် ဒှ်ဒၟံၚ်တသိုခ်ရ၊ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘သီုဟွံကေတ်နိဿယဂှ် ဟဂပ်ဝ်ပဒတဴရ’ ရဴဝွံ ပညပ်လဝ်ရ၊ အဲလေဝ် မၞုံကဵုကိစ္စ ဒးဂိုၚ်ကေတ်နိဿယဏီဂှ် ပဒတဴပ္ဍဲဂြိုပ်ရ၊ ပ္ဍဲဘာဝွံ ဒှ်လေဝ်ဒှ်တသိုခ်ကုအဲရ၊ အဲ မုရဴသာ်လဵု ဂွံဒ္ဂေတ်ညိရော?” ရဴဝွံ ကသပ်ဒှ် ကုခမဳဂှ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳမပဒတဴပ္ဍဲဂြိုပ် မဟဂွံဂိုၚ်ကေတ်နိဿယဏီဂှ် ပသမ္တီ ပွမပဒတဴ ဗွဲတသိုတ်ဂှ်တုဲ ‘အခိၚ်အ္စာကဵုနိဿယ မဗဗွဲက္ညကၠုၚ်ဂှ် ဂိုၚ်ကေတ်နိဿယတုဲ ကြက်ပဒတဴရ’ ရဴဝွံ (ပၠုပ်စိုတ်တုဲ) တၞဟ်နပဒတဴသီုဟွံဂိုၚ်ကေတ် နိဿယဂှ် ကဵုအခေၚ်ရ’ ရဴဝွံ (သ္ဂးရ)။
