၅၈။ ဝတ္ထုအလဇ္ဇဳနိဿယဂမၠိုၚ်

၁၂၀။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် ကဵုနိဿယ ကုခမဳအလဇ္ဇဳဂမၠိုၚ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ကဵုနိဿယ ကုခမဳအလဇ္ဇဳဂမၠိုၚ်ရ၊ ကုခမဳကဵုဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲကာလမွဲအခိၚ် ခမဳဂမၠိုၚ် သ္ပဗ္ဒာဲနိဿဲကဵု ခမဳအလဇ္ဇဳဂမၠိုၚ်တုဲ ပဒတဴအိုတ်ရ၊ ခမဳဂမၠိုၚ်ဂှ်လေဝ် ခြာဟွံလအ်ဟေၚ် ဒှ်အာခမဳအလဇ္ဇဳ ယုတ်သဝ်ပရေအ်ဇအိုတ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သ္ပဗ္ဒာဲနိဿဲကဵု ခမဳအလဇ္ဇဳဂမၠိုၚ်တုဲ ဟဂပ်ဝ်ပဒတဴရ၊ ကုခမဳပဒတဴဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲကာလမွဲအခိၚ် “တဳလမၞုံပိုဉ်ကျာ်တြဲဂှ် ‘ဟဂပ်ဝ်ကဵုနိဿယ ကုခမဳအလဇ္ဇဳဂမၠိုၚ်ရ၊ သ္ပဗ္ဒာဲနိဿဲကဵု ခမဳအလဇ္ဇဳဂမၠိုၚ်တုဲ ဟဂပ်ဝ်ပဒတဴရ’ ရဴဝွံ ပညပ်လဝ်ရ၊ ပိုဲညးဂမၠိုၚ် မုရဴသာ်လဵု ဂွံပါ်ပါဲတီကေတ် လဇ္ဇဳ, အလဇ္ဇဳမာန်အိုတ်ရော?” ရဴဝွံ ကသပ်ဒှ် ကုခမဳဂမၠိုၚ်တုဲ ဂရၚ်ပတတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကြက်သ္ပစဵုကဵုမတီ ဒဒှ်သဘဴမတုပ်သၟဟ် ကေုာံခမဳခိုဟ်ဆာဲဂမၠိုၚ်ရ ရဴဝွံ တၞဟ်နလၟတ်မၚ်ဗၞတ်ပန်တ္ၚဲမသုန်တ္ၚဲဂှ် ကဵုအခေါၚ်ရ ရဴဝွံ (သ္ဂးရ)။