၃၅။ ဝတ္ထုကမ္မာရဘဏ္ဍု

၉၈။ ပ္ဍဲကာလမွဲအခိၚ်တေံ ကမ္မာရဘဏ္ဍုမွဲဂှ် ကယျာန်ဓဝါတ် ကေုာံမိမဂမၠိုၚ်တုဲ အာ အာရှာမ်ဘာတုဲမ္ဂး သ္ပခမဳ ပ္ဍဲဇရေၚ်ခမဳဂမၠိုၚ်ရ။ ပ္ဍဲအခိၚ်ဂှ် မိမညးတေံဂမၠိုၚ် မဂၠာဲသ္ၚေဝ်ဒၟံၚ်ကမ္မာရဘဏ္ဍုဂှ် အာ အာရှာမ်ဘာတုဲ “ယွံတဳလပိုဉ်တအ် ညာတ်ကောန်ၚာ်မၞုံသဘဴရဴဝွံအိုတ်ကီုဟာ” ရဴဝွံ သၟာန်ခမဳဂမၠိုၚ်အိုတ်ရ။ ခမဳဂမၠိုၚ် ဟွံတီဂှ်ဒှ်တုဲ “ပိုဲတအ်ဟွံတီရ” ဟွံညာတ်ဂှ်ဒှ်တုဲ “ပိုဲတအ်ဟွံညာတ်ရ” ရဴဝွံ ဟီုသ္ဂးအိုတ်ရ။

ပ္ဍဲအခိၚ်ဂှ် မိမကမ္မာရဘဏ္ဍုဂမၠိုၚ် ဂၠာဲသ္ၚေဝ်ကမ္မာရဘဏ္ဍုမ္ဂး ဆဵုညာတ်ဒး သ္ပဒၟံၚ်ခမဳ ပ္ဍဲဇရေၚ်ခမဳဂမၠိုၚ်တုဲ “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဂွဂလေံဟွံမွဲအိုတ်ရ၊ သဳလဟွံမွဲအိုတ်ရ၊ မၞုံအလေံဟီုဂလာန်ကၞိက်ဗ္ဒန် ဟွံဍာံစၟတ်အိုတ်ရ၊ သီုကဵုတီတဴဂှ် “ပိုဲတအ်ဟွံတီရ” သီုကဵုမညာတ်တဴဂှ် “ပိုဲတအ်ဟွံညာတ်ရ” ရဴဝွံ ဟီုသ္ဂးအိုတ်ရ။ ကောန်ၚာ်ဝွံ သ္ပဒၟံၚ်ခမဳ ပ္ဍဲဇရေၚ်ခမဳဂမၠိုၚ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မိမကမ္မာရဘဏ္ဍုဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

“ယွံခမဳတအ် ကဵုအခေါၚ် သွက်ဂွံဟီုလဴပတီသၚ် ပ္ဍဲအရာကးက္ဍိုပ်ရ” ရဴဝွံ (သ္ဂးရ)။