၂၈။ ဝတ္ထုကမၠတ်အၚ်္ဂုလိမာလ

၉၁။ ပ္ဍဲကာလမွဲအခိၚ် ကမၠတ်ဇၞော်အၚ်္ဂုလိမာလ သ္ပထပိုဲခမဳ ပ္ဍဲဇရေၚ်ခမဳဂမၠိုၚ်ရ။ မၞိဟ်ဂမၠိုၚ် ညာတ်ဒးအိုတ်မ္ဂး သမ္ၚာတ်လေဝ် သမ္ၚာတ်အိုတ်ရ၊ လကိုတ်လေဝ် လကိုတ်အိုတ်ရ၊ ဂြိပ်လေဝ် ဂြိပ်ပေက်အိုတ်ရ၊ ပါဲတုဲလေဝ်အာအိုတ်ရ၊ ဗလေတ်မုက်တုဲလေဝ် ပဒတဴအိုတ်ရ၊ တြၚ်သ္ၚိလေဝ် ကၟာတ်ဒဝ်ထောံအိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် သ္ပကဵုထပိုဲခမဳ ကမၠတ်ဇၞော်မပြာကဋ် ညံၚ်ပတူစွံအလာံအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟဂပ်ဝ်သ္ပကဵုထပိုဲခမဳ ကမၠတ်ဇၞော်မပြာကဋ် ညံၚ်ပတူစွံအလာံရ၊ ယြဴခမဳမွဲ သ္ပကဵုထပိုဲခမဳမ္ဂး၊ ကုခမဳဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။