၂၇။ ဝတ္ထုညးခစသၟိၚ်
၉၀။ ပ္ဍဲကာလမွဲအခိၚ် တွဵုရးဍုၚ်တၞုၚ်တၞး သၟိၚ်ဗိမ္ဗိသာရ မၞုံယၟုသေနိသ တၠညးမဂဓရး ဒှ်ကၠိုက်ကၟိဵုရုသံၚ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် “ယွံသကအ်တအ် ဩဝ်အာအိုတ်ညိ၊ ဩဝ်သ္ပညံၚ်တွဵုရးဍုၚ်တၞုၚ်တၞး ဂီုကၠီုဍိုပ်ဍဴအိုတ်ညိ” ရဴဝွံ ဗလးဏာအမာတ်ဒကိုပ်ပၞာန်ဇၞော်ဂမၠိုၚ်ရ၊ “ယွံတၠညးသၟိၚ်ဇၞော် ခိုဟ်သန်ရ” ရဴဝွံ အမာတ်ဒကိုပ်ပၞာန်ဇၞော်ဂမၠိုၚ် ဒုၚ်ဝန် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးအိုတ်ရ။
ပ္ဍဲအခိၚ်ဂှ် ကုသရာဲပၞာန် မပြာကဋ်ဒယှ်တှ်လောန်ဂမၠိုၚ် “ပိုဲညးဂမၠိုၚ် မမိက်တဝ်စၞေဟ်ပၞာန်တုဲ အာတဴဂှ် ပွမသရာံပါပ်လေဝ် ဒးသ္ပပတုဲအိုတ်ရ၊ အကုသိုလ်မဂၠိုၚ်လေဝ် ဇၞော်မောဝ်တိုန်အိုတ်ရ၊ နဟိုတ်သာ်လဵု ပိုဲညးဂမၠိုၚ် ဝေၚ်ပါဲကၠေံ နူပွသရာံပါပ်တုဲ သ္ဂောံကၠောန်သ္ပတဴ ပွကုသိုလ်အိုတ်ရော?” ရဴဝွံ ကသပ်ဒှ်ရ။
ပ္ဍဲကြဴနူဂှ် ကုသရာဲပၞာန်ဂမၠိုၚ်ဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မၞုံအလေံဒ္ဂေတ်တဴ ဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သၟန်အိုတ်ရ၊ မၞုံအလေံဒ္ဂေတ်တဴ မပြဲအိုတ်ရ၊ မၞုံအလေံဟီုသ္ဂးဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲအိုတ်ရ၊ ယဝ်ပိုဲညးဂမၠိုၚ် သ္ဂောံပခမဳ ပ္ဍဲဇရေၚ်ခမဳဂမၠိုၚ် မဒှ်တၞောဝ်ကျာကောန်သၟိၚ်သာကျဝၚ်အိုတ်မ္ဂး ပိုဲညးဂမၠိုၚ် နပွသရာပါပ်လေဝ် ဝေၚ်ပါဲကၠေံမာန်အိုတ်ရ၊ ပွကုသိုလ်လေဝ် ကၠောန်သ္ပမာန်အိုတ်ရ” ရဴဝွံ ကသပ်ဒှ်ပၠန်ရ။
ပ္ဍဲအခိၚ်ဂှ် သရာဲပၞာန်ဂမၠိုၚ်ဂှ် ပြာပ်အာဇရေၚ် ခမဳဂမၠိုၚ်အိုတ်တုဲ အာတ်အခေါၚ်ဒဒှ်ခမဳအိုတ်ရ၊ ခမဳဂမၠိုၚ် သ္ပကဵုထပိုဲ သရာဲပၞာန်ဂမၠိုၚ်ဂှ်အိုတ်ရ၊ သ္ပကဵုခမဳပယျၚ်အိုတ်ရ၊ အမာတ်ဒကိုပ်ပၞာန်ဇၞော်ဂမၠိုၚ် “ယွံသကအ်တအ် ပသာ်ရော? ဟဂွံညာတ်ကေတ် သရာဲပၞာန်မၞုံယၟုဝွံ မၞုံယၟုဝွံရသွံ” ရဴဝွံ သၟာန်တြုံသကအ်သၟိၚ်ဂမၠိုၚ်အိုတ်ရ။ ယွံတၠညး သရာဲပၞာန်ဂမၠိုၚ်မၞုံယၟုဝွံ သ္ပဒၟံၚ်ခမဳ ပ္ဍဲဇရေၚ်ခမဳဂမၠိုၚ်အိုတ်ရ ရဴဝွံ (ဟီုသ္ဂးအိုတ်ရ)။
အမာတ်ဒကိုပ်ပၞာန်ဇၞော်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ပကဵုခမဳပယျၚ် တြုံခစသၟိၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ အမာတ်ဒကိုပ်ပၞာန်ဇၞော်ဂမၠိုၚ် ဟီုလဴပတီ ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးအိုတ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရ:ဂှ် “ယွံသကအ်တအ် ယြဴညးမါဲ သ္ပကဵုခမဳပယျၚ် တြုံခစသၟိၚ်ရ၊ ညးဂှ် ထေက်ကဵုဒုဟ်ဒဏ် ဗၞတ်ၜိုတ်လဵုရော?” ရဴဝွံ သၟာန်အမာတ်ဇၞော် မသ္ဂုတ်သွာတ်ဓရ်ဂမၠိုၚ်ရ။ ယွံတၠညးသၟိၚ်ဇၞော် ထေက်ကဵုကုတ်ကၠေံက္ဍိုပ်အ္စာဥပဇ္ၛာယ်ရ၊ ထေက်ကဵုပါဲပတိတ်လတာ် အ္စာကမ္မဝါစ်ရ၊ ထေက်ကဵုဝးပကဝ်ထောံဇုတ်သကဲ သၚ်ဂိုဏ်ဂမၠိုၚ်ကဝက်ရ ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ် ပ္ဍဲဒၞါဲမွဲတုဲ—
“ယွံတဳလမၞုံပိုဉ် သၟိၚ်ဂမၠိုၚ် မဟွံမွဲကဵုဓရ်သဒ္ဓါ မဟွံလျုၚ်ဇြုၚ်သ္ဍိုက်ဂှ် နကဵုဒုဟ်ဗၞတ်ညိနာၚ်လေဝ် ပျဲပျာံရာန်သကိုတ် ခမဳဂမၠိုၚ်အိုတ်ရ၊ ယွံတဳလမၞုံပိုဉ် အာတ်ပါန်အခေါၚ်ရ၊ တဳလပိုဉ်မဆာဲဂမၠိုၚ် လ္ပသ္ပကဵုခမဳပယျၚ် တြုံမခစသၟိၚ်အိုတ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရး တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞါဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး—
“ယွံခမဳတအ် ဟဂပ်ဝ်သ္ပကဵုထပိုဲခမဳ တြုံမခစသၟိၚ်ရ၊ ယြဴခမဳမွဲ သ္ပကဵုထပိုဲခမဳမ္ဂး၊ ကုခမဳဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
