၄.၃.၄.၁။ ပွံက်ဝဿိကသာဋိကသိက္ခာပိုဒ်
631) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် “ယွံကောန်တၠ ဩဝ်ကၠုၚ်ညိ၊ ကြက်ဂေတ်ဂ္ၚေၚ် ဇနပိုဒ်အိုတ်ရ” ရဴဝွံ ဟီုသ္ဂးကဵုခမဳကွးပဒတဴမွဲစွံ ကေုာံဇကုရ။ ယွံတဳလပိုဉ် အဲဍိက် ဗက်အာဟွံမာန်ရ၊ မၞုံကဵုသ္ၚာကၠိၚေတ်ရ ရဴဝွံ (ဂရၚ်ပတီရ)။ ယွံကောန်တၠ ဩဝ်ကၠုၚ်ညိ၊ အဲ ကြက်ကဵုသ္ၚာ ကုတၠအဲရ ရဴဝွံ (သ္ဂးတုဲ) ကဵုတဴသ္ၚာကုခမဳဂှ်ရ။ “တဳလမၞုံပိုဉ်ကျာ်တြဲ ကြက်က္ညဂေတ်ဂ္ၚေၚ် ပ္ဍဲဇနပိုဒ်ရ” ရဴဝွံ ခမဳဂှ် မိၚ်ဒးဟေၚ်ရ၊ ပ္ဍဲအခိၚ်ဂှ် လၟုဟ် အဲကြက်ဟွံအာဂေတ်ဂ္ၚေၚ် ပ္ဍဲဇနပိုဒ် ကေုာံတဳလပိုဉ်ဥပနန္ဒ ကောန်သၟိၚ်သာကျဝၚ်မွဲစွံရ၊ ကြက်အာဂေတ်ဂ္ၚေၚ် ပ္ဍဲဇနပိုဒ် ကေုာံတဳလပိုဉ်ကျာ်တြဲမွဲစွံဟေၚ်ရ” ရဴဝွံ ကသပ်ဒှ်ကၠုၚ် ကုခမဳဂှ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် “ယွံကောန်တၠ ဩဝ်ကၠုၚ်ညိ၊ လၟုဟ် ကြက်အာဂေတ်ဂ္ၚေၚ် ပ္ဍဲဇနပိုဒ်အိုတ်ရ” ရဴဝွံ ဟီုသ္ဂးကဵုခမဳဂှ်ရ။ ယွံတဳလပိုဉ် အဲဍိက် ကြက်ဟွံအာဂေတ်ဂ္ၚေၚ် ပ္ဍဲဇနပိုဒ် ကေုာံတဳလပိုဉ်မွဲစွံရ၊ ကြက်အာဂေတ်ဂ္ၚေၚ် ပ္ဍဲဇနပိုဒ် ကေုာံတဳလမၞုံပိုဉ်ကျာ်တြဲမွဲစွံရ ရဴဝွံ (ဂရၚ်ပတီရ)။ ယွံကောန်တၠ အဲဂှ် တၠအဲ ကြက်အာဂေတ်ဂ္ၚေၚ် ပ္ဍဲဇနပိုဒ် ကေုာံအဲမွဲစွံရ ရဴဝွံ ကဵုဒးသ္ၚာ ကုတၠအဲရ ရဴဝွံ (သ္ဂးတုဲ) ထေဲပၞတ် ဟွံမိပ်စိုတ်ဒှ်တုဲ ပၠံၚ်ၜးကေတ်ရ၊ ပ္ဍဲအခိၚ်ဂှ် ခမဳဂှ် ဂရၚ်ပတီ ဟိုတ်ပရူပရာဝွံ ကုခမဳဂမၠိုၚ်ရ၊ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် အလဵုဇကု ကဵုတဴသ္ၚာ ကုခမဳတုဲ ထေဲပၞတ် ဟွံမိပ်စိုတ်ဒှ်တုဲ မုဟိုတ် ပၠံၚ်ၜးကေတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရုပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ အလဵုဇကု ကဵုတဴသ္ၚာ ကုခမဳတုဲ ထေဲပၞတ် ဟွံမိပ်စိုတ်ဒှ်တုဲ ပၠံၚ်ၜးကေတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ) ။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ အလဵုဇကု ကဵုတဴသ္ၚာ ကုခမဳတုဲ ထေဲပၞတ် ဟွံမိပ်စိုတ်ဒှ်တုဲ မုဟိုတ် သ္ဂောံပၠံၚ်ၜးကေတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
632) ယြဴခမဳမွဲ အလဵုဇကု ကဵုတဴသ္ၚာ ကုခမဳတုဲ ထေဲပၞတ် ဟွံမိပ်စိုတ်ဒှ်တုဲ (အလဵုဇကုလေဝ်) ပၠံၚ်ၜးကေတ်မ္ဂး၊ (ညးသအာၚ်ဂမၠိုၚ်လေဝ်) ဖအောဝ်ကဵုပၠံၚ်ၜးကေတ်မ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
