၄.၃.၄။ ဝဿိကသဋိကသိက္ခာပိုဒ်
628) ဂိတုက္ညၚ်ဂမၠိုၚ် သှေ်သၟေဟ်ဒၟံၚ်မွဲဂိတုဏီရ ရဴဝွံ သ္ဒးဂၠာဲသ္ၚေဝ်သ္ၚာသၞုက်ဗြဲရ မ္ဂးဂှ် ယြဴမၞိဟ်ဂမၠိုၚ် ပ္ဍဲကိုပ်ကၠာတေံလေဝ် ကဵုတဴဒါန် သ္ၚာသၞုက်ဗြဲအိုတ်ရ၊ ပြာပ်အာဇရေၚ် မၞိဟ်ဂမၠိုၚ်ဂှ်တုဲ “အခါသ္ၚာသၞုက်ဗြဲရ၊ အခိၚ်သ္ၚာသၞုက်ဗြဲရ၊ မၞိဟ်သအာၚ်ဂမၠိုၚ်လေဝ် ကဵုတဴဒါန် သ္ၚာသၞုက်ဗြဲရ” ရဴဝွံ သ္ဒးသ္ဂးရ၊ “ဩဝ်ကဵုဒါန်သ္ၚာသၞုက်ဗြဲကုအဲအိုတ်ညိ၊ ဩဝ်ရၚ်တၠုၚ်နၚ် သ္ၚာသၞုက်ဗြဲ သွက်အဲအိုတ်ညိ၊ ဩဝ်လှာဲဂတးကဵုသ္ၚာသၞုက်ဗြဲ သွက်အဲအိုတ်ညိ၊ ဩဝ်ရာန်ကဵု သ္ၚာသၞုက်ဗြဲ သွက်အဲအိုတ်ညိ” ဟွံထေက်ကဵုသ္ဂးရ။ ဂိတုက္ညၚ်ဂမၠိုၚ် သှေ်သၟေဟ်ဒၟံၚ်လ္ပာ်ဂိတုဏီရ ရဴဝွံ ဇိၚ်ဖျောန်တုဲ သ္ဒးဗိုက်လတက်ရ မ္ဂးဂှ် ပ္ဍဲရာသဳက္ညၚ် သှေ်သၟေဟ်ဒၟံၚ်လ္ပာ်ဂိတုဂှ် ဇိၚ်ဖျောန်တုဲ သ္ဒးဗိုက်လတက်ရ။ ဂိတုက္ညၚ်ဂမၠိုၚ် သှေ်သၟေဟ်ဒၟံၚ်မွဲဂိတုဏီရ ရဴဝွံ ပ္ဍဲအရာလ္ပာ်ဝွံ မ္ဂးဂှ် ပ္ဍဲရာသဳက္ညၚ် သှေ်သၟေဟ်ဒၟံၚ်လောန်မွဲဂိတုဂှ် ဂၠာဲသ္ၚေဝ်သ္ၚာသၞုက်ဗြဲမ္ဂး၊ ဒးအာပတ် နိဿဂ္ဂိပါဲစိုတ်ရ။ ဂိတုက္ညၚ်ဂမၠိုၚ် သှေ်သၟဟ်ဒၟံၚ်လ္ပာ်ဂိတုဏီရ ရဴဝွံ ပ္ဍဲအပ္ဍဲလ္ပာ်ဝွံ မ္ဂးဂှ် ပ္ဍဲရာသဳက္ညၚ် သှေ်သၟေဟ်ဒၟံၚ်လောန်လ္ပာ်ဂိတုဂှ် ဗီုက်လတက်သ္ၚာသၞုက်ဗြဲမ္ဂး၊ ဒးအာပတ် နိဿဂ္ဂပါဲစိုတ်ရ။ မၞုံကဵု (ဝိနယ်ကမ်) ပွမဒးသၠးရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သ္ၚာသၞုက်ဗြဲအဲဍိက်ဝွံ ပ္ဍဲရာသဳက္ညၚ် သှေ်သၟေဟ်ဒၟံၚ်လောန်မွဲဂိတုဂှ် ဂၠာဲသ္ၚေဝ်ဒးတုဲ ပ္ဍဲရာသဳက္ညၚ် သှေ်သၟေဟ်ဒၟံၚ်လ္ပာ်ဂိတုဂှ် ဇိၚ်ဖျောန်တုဲ ဗိုက်လတက်ဒးဒှ်တုဲ မၞုံကဵု (ဝိနယ်ကမ်) ပွမဒးသၠးရ၊ သ္ၚာသၞုက်ဗြဲဝွံ အဲဍိက်သၠးကဵု ကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵု ကုတဳလပိုဉ်ရ ရဴဝွံ (ဒးကလေၚ်ကဵုရ)။
629) ပ္ဍဲဂိတုက္ညၚ် သှေ်သၟေဟ်ဒၟံၚ်လောန်မွဲဂိတုဂှ် မၞုံကဵုစၟတ်သမ္တီလောန်တုဲ ဂၠာဲသ္ၚေဝ်သ္ၚာသၞုက်ဗြဲမ္ဂး၊ ဒးအာပတ် နိဿဂ္ဂိပါဲစိုတ်ရ။ ပ္ဍဲဂိတုက္ညၚ် သှေ်သၟေဟ်ဒၟံၚ်လောန်မွဲဂိတုဂှ် မၞုံကဵုသၠေဟ်ပၟာတုဲ ဂၠာဲသ္ၚေဝ်သ္ၚာသၞုက်ဗြဲမ္ဂး၊ ဒးအာပတ် နိဿဂ္ဂိပါဲစိုတ်ရ ပ္ဍဲဂိတုက္ညၚ် သှေ်သၟေဟ်ဒၟံၚ်လောန်မွဲဂိတုဂှ် မၞုံကဵုစၟတ်သမ္တီဟွံလောန်တုဲ ဂၠာဲသ္ၚေဝ်သ္ၚာသၞုက်ဗြဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ပ္ဍဲဂိတုက္ညၚ် သှေ်သၟေဟ်ဒၟံၚ်လောန်လ္ပာ်ဂိတုဂှ် မၞုံကဵုစၟတ်သမ္တီလောန်တုဲ ဇိၚ်ဖျောန်တုဲ ဗိုက်လတက်မ္ဂး၊ ဒးအာပတ် နိဿဂ္ဂိပါဲစိုတ်ရ။ ပ္ဍဲဂိတုက္ညၚ် သှေ်သၟေဟ်ဒၟံၚ်လောန်လ္ပာ်ဂိတုဂှ် မၞုံကဵုသၠေဟ်ပၟာတုဲ ဇိၚ်ဖျောန်တုဲဗိုက်လတက်မ္ဂး၊ ဒးအာပတ် နိဿဂ္ဂိပါဲစိုတ်ရ။ ပ္ဍဲဂိတုက္ညၚ်သှေ်သၟေဟ်ဒၟံၚ်လောန်လ္ပာ်ဂိတုဂှ် မၞုံကဵုစၟတ်သမ္တီဟွံလောန်တုဲ ဇိၚ်ဖျောန်တုဲဗိုက်လတက်မ္ဂး၊ ဒးအာပတ် နိဿဂ္ဂိပါဲစိုတ်ရ။ သီုမၞုံကဵုသ္ၚာသၞုက်ဗြဲ ဂၞံၚ်ဂၞါတ်လဝ်တုဲ ကဵုဇကုဍုက်ဍာ်ဗြဲမ္ဂး၊ ဒးအာပတ် ဒုက္ကဋ်ရ၊ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်မွဲဂိတုဂှ် မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ၊ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်မွဲဂိတုဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်မွဲဂိတုဂှ် မၞုံကဵုစၟတ်သမ္တီ ယုတ်ဒေက်မ္ဂး၊ ဟွံဒးအာပတ်ရ။ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်လ္ပာ်ဂိတုဂှ် မၞုံကဵုစၟတ်သမ္တီလောန်မ္ဂး၊ ဒးအာပတ် ဒုက္ကဋ်ရ၊ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်လ္ပာ်ဂိတုဂှ် မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ၊ ပ္ဍဲဂိတုက္ညၚ် သှေ်သၟေဟ်ဒၟံၚ်ယုတ်ဒေက်သၟဝ်လ္ပာ်ဂိတုဂှ် မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။
630) ဂိတုက္ညၚ်ဂမၠိုၚ် သှေ်သၟေဟ်ဒၟံၚ်မွဲဂိတုဏီရ ရဴဝွံ ဂၠာဲသ္ၚေဝ် သ္ၚာသၞုက်ဗြဲမ္ဂး၊ ဂိတုက္ညၚ်ဂမၠိုၚ် သှေ်သၟေဟ်ဒၟံၚ်လ္ပာ်ဂိတုဏီရ ရဴဝွံ ဇိၚ်ဖျောန်တုဲ ဗိုက်လတက်မ္ဂး၊ ဂိတုက္ညၚ်ဂမၠိုၚ် သှေ်သၟေဟ်ဒၟံၚ် ယုတ်ဒေက်သၟတ်မွဲဂိတုဏီရ ရဴဝွံ ဂၠာဲသ္ၚေဝ် သ္ၚာသၞုက်ဗြဲမ္ဂး၊ ဂိတုက္ညၚ်ဂမၠိုၚ် သှေ်သၟေဟ်ဒၟံၚ် ယုတ်ဒေက်သၟတ်မွဲဂိတုဏီရ ရဴဝွံ ဇိၚ်ဖျောန်တုဲ ဗိုက်လတက်မ္ဂး ဟွံဒးအာပတ်ရ။ ဃောဂၠာဲသ္ၚေဝ် ဒၟံၚ်သ္ၚာသၞုက်ဗြဲ တံၚ်ဓဇက်တ္ၚဲထပ်ဒဂိုန်မ္ဂး၊ ဃောဗိုက်လတက်ဒၟံၚ်သ္ၚာသၞုက်ဗြဲ တံၚ်ဓဇက်တ္ၚဲ ထပ်ဒဂိုန်မ္ဂး၊ လပိုက်ကြာတ်ကြဴတုဲ သ္ဒးစွံပတန်လဝ်ရ၊ ပ္ဍဲအခိၚ်ဂှ် သ္ဒးဗိုက်လတက်ရ၊ ကုခမဳ ဒးဒုၚ်ပၠံၚ်ၜးဏာသ္ၚာကီု ကုခမဳသ္ၚာကၠေံလေၚ်အာကီု ဟိုတ်နူပရိုက်ဘဲကီု ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ဝဿိကသာဋိကသိက္ခာပိုဒ် စတုတ္ထတုဲ။
