၄.၂.၈.၁။ ပွံက်ရူပိယသိက္ခာပိုဒ်
584) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးအာစိုပ်ဒဒှ်ခမဳ နဉတ္တစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ ထဝ် မ္ဂးဂှ် သ္ဂးတဴ ဝတ္ထုမၞုံသာ် မတုပ်သၟဟ်ကေုာံသာ်ကျာ်တြဲရ။ သြန် မ္ဂးဂှ် ကသာပ်ကီု ကသာပ်ဗရိုတ်ကီု ကသာပ်ကြက်ဆုကီု ကသာပ်ကြက်ကီု ဝတ္ထုမသွံရာန်မာန်ဖအိုတ်ရောၚ်။ ဒုၚ်ဂိုၚ်ကေတ် မ္ဂးဂှ် အလဵုဇကု ဒုၚ်ဂိုၚ်ကေတ်မ္ဂး၊ ဒးအာပတ် နိဿဂ္ဂိပါဲစိုတ်ရ။ ဖအောဝ်ကဵုဒုၚ်ဂိုၚ်ကေတ် မ္ဂးဂှ် ကဵုညးသအာၚ် ဒုၚ်ဂိုၚ်ကေတ်မ္ဂး၊ ဒးအာပတ် နိဿဂ္ဂိပါဲစိုတ်ရ။ ဂပ်ဝ်ဖျေံစွံလဝ် ပ္ဍဲဇရေၚ်လေဝ် သာယျေန် မ္ဂးဂှ် ထဝ်သြန်ဝွံ ဩဝ်ကဵုဒှ်သွက်တဳလပိုဉ်ညိ ရဴဝွံ သာယျေန်တဴ မဂပ်ဝ်ဖျေံစွံလဝ် ပ္ဍဲဇရေၚ်မ္ဂး၊ မၞုံကဵု (ဝိနယ်ကမ်) ပွမဒးသၠးရ၊ သ္ဒးသၠး ပ္ဍဲလဒေါဝ်သၚ်ရ။ ယွံခမဳတအ် ရဴဝွံ သ္ဒးသၠးရ။ ခမဳ မဒုၚ်ဂိုၚ်ကေတ် ထဝ်သြန်ဂှ် ပြာပ်အာဇရေၚ်သၚ်တုဲ လ္ၜတ်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲ မွဲလ္ပာ်တုဲမ္ဂး လ္ၚောဝ်ဂၠးဇိုၚ် ခမဳထေရ်ဇၞော်ဂမၠိုၚ်တုဲ ဂဇအ်လံက်ဂဇုန် သီုမပၚ်ခၠအ်လဝ်သၟိပ်တဲဂှ်− “ယွံတဳလပိုဉ်တအ် အဲဍိက် ဒုၚ်ဂိုၚ်ကေတ် ဒးထဝ်သြန်ရ၊ ထဝ်သြန်အဲဍိက်ဝွံ မၞုံကဵုဝိနယ်ကမ် ပွမဒးသၠးရ၊ ထဝ်သြန်ဝွံ အဲဍိက် သၠးကဵုကုသၚ်ရ” ရဴဝွံ သ္ဒးသ္ဂးရ။ သၠးကၠေံတုဲ သ္ဒးဒေသနာအာပတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးဒုၚ်ဂိုၚ်ကေတ် အာပတ်ရ၊ ယဝ်ပၟၚ်အာရှာမ်ကီု ဥပးကီု ကၠုၚ်ဌာန်ဂှ်မ္ဂး၊ “ယွံကောန်တၠ ဩဝ်တီကေတ် ထဝ်သြန်ဝွံညိ” ရဴဝွံ သ္ဒးသ္ဂးကဵုညးဂှ်ရ၊ ညးဂှ် “နထဝ်သြန်ဝွံ သ္ဂောံရၚ်တၠုၚ်နၚ် မုမွဲဂှ်ရော?” ရဴဝွံ ယဝ်သ္ဂးမ္ဂး၊ “သြန်ရၚ်တၠုၚ်နၚ် ဝတ္ထုဝွံ ဝတ္ထုဝွံညိ” ရဴဝွံ ဟွံထေက်ကဵုသ္ဂးရ၊ သ္ဒးဟီုတဴ ကၠေၚ်သွဟ်ကီု ကၠေၚ်ကီု ဍာ်သာဲကီု မဂပ်ဝ်ဂှ်ရ၊ ညးဂှ် နကဵုထဝ်သြန်ဂှ် လှာဲဂတးတုဲ ယဝ်ရၚ်တၠုၚ်နၚ် မဂပ်ဝ်ဂှ်မ္ဂး၊ ပါဲကၠေံခမဳ မဒုၚ်ဂိုၚ်ကေတ် ထဝ်သြန်တုဲ ခမဳဂမၠိုၚ်အိုတ်သီု ပြဘိုဂ်ဂပ်ဝ်ရ။ ယဝ်ကလိဂွံ ညး (လှာဲဂတးကဵုထဝ်သြန်) ရဴဝွံမ္ဂး၊ ပွမကလိဂွံသာ်ဝွံ ဆာဲသန်၊ ယဝ်ဟွံကလိဂွံမ္ဂး၊ “ယွံဒကာ ဩဝ်ကၠဟ်ထောံ ထတ်သြန်ဝွံညိ” ရဴဝွံ သ္ဒးသ္ဂးကဵုညးဂှ်ရ၊ ညးဂှ် ယဝ်ကၠဟ်ထောံမ္ဂး၊ ပွမကၠဟ်ထောံရဴဝွံ ခိုဟ်သန်ရ၊ ယဝ်ဟွံကၠဟ်ထောံမ္ဂး၊ ခမဳမဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာဂှ် သ္ဒးသၟိတ်ပတိုန် ရဴဝွံမ္ဂး ခမဳထောံထောံ ထဝ်သြန်ရ၊ ခမဳဂှ် ဟွံဗက်စဆန္ဒာဂတိရ၊ ဟွံဗက်စဒေါသာဂတိရ၊ ဟွံဗက်စမောဟာဂတိရ၊ ဟွံဗက်စဘယာဂတိရ၊ ဂပ်ဝ်ထောံထောံ မဟဂပ်ဝ်ထောံထောံလေဝ် သ္ဒးတီရ။ ယွံခမဳတအ် ရဴဝွံ သ္ဒးသၟိတ်ရ၊ ဗွဲကိုပ်ကၠာ သ္ဒးအာတ်အခေါၚ် ခမဳဂှ်ရ၊ အာတ်အခေါၚ်တုဲ ပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
585) “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်ဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်တဴခမဳမၞုံယၟုဝွံ ရဴဝွံမ္ဂး ခမဳထောံထောံထဝ်သြန်ရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴ ခမဳမၞုံယၟုံဝွံ ရဴဝွံ ခမဳထောံထောံထဝ်သြန်ရ၊ ယြဴကုတဳလိပိုဉ်မွဲ သ္ဍိုက်မၠိုက် ပွမသၟိတ်တဴ ခမဳမၞုံယၟုဝွံ ရဴဝွံမ္ဂးခမဳ ထောံထောံထဝ်သြန်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်သၟိတ်တဴ ခမဳမၞုံယၟုဝွံ ရဴဝွံမ္ဂး ခမဳထောံထောံထဝ်သြန်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်သ္ၚောံသ္ၚိတ်ဇြ ရဴဝွံ ဂွံတီကေတ်ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ခမဳ မကလိဂွံသၟိတ်တုဲဂှ် သီုဟွံသ္ပနိမိတ်သမ္တီဂှ် သ္ဒးကဵုဒတုံစှေ် ‘သ္ဒးကၠဟ်ထောံ’ ရ၊ ယဝ်သ္ပနိမိတ်သမ္တီတုဲ ကဵုဒတုံစှေ် ‘ကၠဟ်ထောံ’ မ္ဂး၊ ဒးအာပတ်ဒုက္ကဋ်ရ။
586) ပ္ဍဲထဝ်သြန် မၞုံကဵုစၟတ်သမ္တီထဝ်သြန်တုဲ ဒုၚ်ဂိုၚ်ကေတ် ထဝ်သြန်မ္ဂး၊ ဒးအာပတ်နိဿဂ္ဂိ ပါဲစိုတ်ရ၊ ပ္ဍဲထဝ်သြန် မၞုံကဵုသၠေဟ်ပၟာတုဲ ဒုၚ်ဂိုၚ်ကေတ် ထဝ်သြန်မ္ဂး၊ ဒးအာပတ်နိဿဂ္ဂိ ပါဲစိုတ်ရ၊ ပ္ဍဲထဝ်သြန် မၞုံကဵုစၟတ်သမ္တီ ဟွံသေၚ်ကဵုထဝ်သြန်တုဲ ဒုၚ်ဂိုၚ်ကေတ်ထဝ်သြန်မ္ဂး၊ ဒးအာပတ် နိဿဂ္ဂိပါဲစိုတ်ရ။ ပ္ဍဲဟွံသေၚ်ကဵုထဝ်သြန် မၞုံကဵုစၟတ်သမ္တီထဝ်သြန်မ္ဂး၊ ဒးအာပတ်ဒုက္ကဋ်ရ၊ ပ္ဍဲဟွံသေၚ်ကဵုထဝ်သြန် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲဟွံသေၚ်ကဵုထဝ်သြန် မၞုံကဵုစၟတ်သမ္တီ ဟွံသေၚ်ကဵုထဝ််သြန်မ္ဂး၊ ဟွံဒးအာပတ်ရ။ ပ္ဍဲအပ္ဍဲအာရှာမ်ကီု ပ္ဍဲအပ္ဍဲဂြပ်ဇူဒီုကီု ဂိုၚ်ကေတ်တုဲကီု ကဵုဂိုၚ်ကေတ်တုဲကီု “တၠဂြပ် ကြက်ရၚ်တၠုၚ်ဏာရ” ရဴဝွံ စွံပတန်လဝ်မ္ဂး၊ ဟွံဒးအာပတ်ရ၊ ကုခမဳကြဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ရူပိယသိက္ခာပိုဒ် အဋ္ဌမတုဲရ။
