၄.၂.၈။ ရူပိယသိက္ခာပိုဒ်
582) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇာဂြိုဟ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် ဒှ်ခမဳ မပြာပ်စဴသ္ၚိဂကူမွဲတၠ မၞုံကဵုဝတ်ပိဏ္ဍပါတ်လၟိုန်ရ၊ ပ္ဍဲဂကူဂှ် ယြဴစၞသ္ၚာဲစမွဲကီု ဘောဇိုန်မွဲကီု ကတဵုဒှ်ကၠုၚ်မ္ဂး၊ နူစၞသ္ၚာဲစဘောဇိုန်ဂှ် သ္ဒးပါဲဘိုအ်စွံလဝ် သွက်တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် အခိၚ်သဝ်တ္ၚဲ ပ္ဍဲသ္ၚိဂကူဂှ် အမာဲသွဖျုန်ဂၠဴကတဵုဒှ်ရ၊ နူအမာဲသွဖျုန်ဂၠဴဂှ် ပါဲဘိုအ်စွံလဝ္ သွက်တဳလပိုဉ်ဥပနန္ဒ ကောန်သၟိၚ်သာကျဝၚ်ရ၊ သၟတ်ကောန်ၚာ်သ္ၚိဂကူဂှ် ကတဵုနူဂယးပြဟ်တုဲ “ဩဝ်ကဵုအမာဲသွဖျုန်ဂၠဴ ကုအဲအိုတ်ညိ” ရဴဝွံ လရိုအ်ယာံဒၟံၚ်ရ၊ ပ္ဍဲအခိၚ်ဂှ် တြုံဂှ် “ဘိုအ်သွက်ကောန်ၚာ်ဂှ် ဩဝ်ကဵုထောံ ကုသၟတ်ကောန်ၚာ်ညိ၊ ရာန်ကေတ်အမာဲသအာၚ်တုဲ ကြက်ကဵုဒါန် ကုကောန်နာဲအိုတ်ရ” ရဴဝွံ ဟီုသ္ဂးကဵုသမ္ဘာရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာ ပြာပ်စဴအာသ္ၚိဂကူဂှ်တုဲ ဂဇအ်ဒၟံၚ်ပ္ဍဲသၞာ မလးပညပ်လဝ်ရ၊ ပ္ဍဲအခိၚ်ဂှ် တြုံဂှ် ပြာပ်အာဇရေၚ် တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ် ပ္ဍဲဒၞါဲမွဲဂှ် “ယွံတဳပိုဉ် နူတနေံဏအ် ပ္ဍဲအခိၚ်သဝ်တ္ၚဲ အမာဲသွဖျုန်ဂၠဴ ကတဵုဒှ်ကၠုၚ်ရ၊ နူအမာဲသွဖျုန်ဂၠဴဂှ် ပါဲဘိုအ်စွံလဝ် သွက်တဳလပိုဉ်ရ၊ ယွံတဳလပိုဉ် သၟတ်ကောန်ၚာ်ဝွံ ကတဵုနူဂယးပြဟ်တုဲ ‘ဩဝ်ကဵုအမာဲသွဖျုန်ဂၠဴ ကုအဲအိုတ်ညိ’ ရဴဝွံ လရိုအ်ယာံဒၟံၚ်ရ၊ ဘိုအ်သွက်တဳလပိုဉ်ဂှ် ဒးကဵုထောံ ကုသၟတ်ကောန်ၚာ်ရ၊ ယွံတဳလပိုဉ် နကဵုကသပ်ဂှ် သ္ဂောံရၚ်တၠုၚ်နၚ် မုမွဲဂှ်ရော?” ရဴဝွံ ဂရၚ်ပတီရ။ ယွံဒကာ ကသာပ်ဂှ် သၠးပွးကဵုဒါန် ကုအဲတုဲဒှ်ရဟာ ရဴဝွံ (သၟာန်ရ)။ ဍာံပြရ ယွံတဳလပိုဉ် သၠးပွးကဵုဒါန် ကုတဳလပိုဉ်တုဲဒှ်ရ ရဴဝွံ (ဂရၚ်ပတီရ)။ ယွဒကာ ကသာပ်ဂှ်ဟေၚ် ဩဝ်ကဵုကုအဲညိ ရဴဝွံ (သ္ဂးရ)။ ပ္ဍဲအခိၚ်ဂှ် တြုံဂှ် ကဵုဒါန်ကသာပ် ကုတဳလပိုဉ်ဥပနန္ဒ ကောန်သၟိၚ်သာကျဝၚ်တုဲဒှ်ပ္ဍဲကြဴ “သၟဟ်ညံၚ်ပိုဲညးဂမၠိုၚ် ဒုၚ်ဂိုၚ်ကေတ် ထဝ်သြန်ကီု တုပ်သၟဟ်သာ်ဝွံဟေၚ် ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံ ဒုၚ်ဂိုၚ်ကေတ် ထဝ်သြန်အိုတ်ရ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်တြုံဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် မုဟိုတ် ဒုၚ်ဂိုၚ်ကေတ်ထဝ်သြန်ဂှ်ရောဂှ်? ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ ဒုၚ်ဂိုၚ်ကေတ် ထဝ်သြန်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုတၟး (နူမဂ်ဖိုလ်) မုဟိုတ်တၠအဲ ဒုၚ်ဂိုၚ်ကေတ် ထဝ်သြန်ဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတအဲ သ္ပဒး) ဝွံ ကုညးဟွံလျုၚ် ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
583) ယြဴခမဳမွဲ (အလဵုဇကုလေဝ်) ဒုၚ်ဂိုၚ်ကေတ် ထဝ်သြန်မ္ဂး၊ (ညးသအာၚ်လေဝ်) ဖအောဝ်ကဵု ဒုၚ်ဂိုၚ်ကေတ်မ္ဂး၊ ဂပ်ဝ်ဖျေံစွံလဝ် ပ္ဍဲဇရေၚ်လေဝ် သာယျေန်မ္ဂ၊ (ကုခမဳ) ဂှ် ဒးအာပတ် နိဿဂ္ဂပါဲစိုတ်ရ ရဴဝွံ (ဩဝ်စၞောန်ထ်ၜးအိုတ်ညိ ရဴဝွံ သ္ဂးရ)။
