၄.၂.၁၀.၁။ ပွံက်ကာယဝိက္ကယသိက္ခာပိုဒ်

595) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ ဍေံမၞုံတၟေၚ်ပကာရတၞဟ်တၞဟ် မ္ဂးဂှ် သ္ၚာပိဏ္ဍပါတ်ဘာဂဥုဲ မဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်ရ၊ ဗွဲတွဵုမယုတ်ကဠောံကြကောတ်ကီု ဆုဒကကီု တောဝ်တသာဲကီုရောၚ်။ အာစိုပ်ပွမသွံရာန် မ္ဂးဂှ် “နဝတ္ထုဝွံ ဩဝ်လှာဲကဵုဝတ္ထုဝွံညိ၊ နဝတ္ထုဝွံ ဩဝ်ရာန်ဝတ္ထုဝွံညိ” ရဴဝွံ ကလိလောန်တုဲ ဒ္ဂေတ်မ္ဂး၊ ဒးအာပတ်ဒုက္ကဋ်ရ။ ယြဴပ္ဍဲအခိၚ်မွဲ ပွမရာန်ကီု ပွမသွံကီု ဒှ်ရ၊ ဂြပ်ဇကုအာစိုပ်တဲညးသအာၚ်ရ၊ ဂြပ်ညးသအာၚ်လေဝ် စိုပ်တဲဇကုမ္ဂး၊ မၞုံကဵု (ဝိနယ်ကမ်) ပွမဒးသၠးရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် အဲဍိက် အာစိုပ်ပွမသွံရာန် မၞုံတၟေၚ်ပကာရတၞဟ်တၞဟ်ရ၊ ဝတ္ထုအဲဍိက်ဝွံ မၞုံကဵု (ဝိနယ်ကမ်) ပွမဒးသၠးကၠေံရ၊ ဝတ္ထုဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵုကုတဳလပိုဉ်ရ ရဴဝွံ (ဒးကလေၚ်ကဵုရ)။

596) ပ္ဍဲအရာဟွံသေၚ်ကဵုသွံရာန် မၞုံကဵုစၟတ်သမ္တီသွံရာန်မ္ဂး၊ ဒးအာပတ်ဒုက္ကဋ်ရ၊ ပ္ဍဲအရာဟွံသေၚ်ကဵုသွံရာန် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲအရာဟွံသေၚ်ကဵုသွံရာန် မၞုံကဵုစၟတ်သမ္တီဟွံသေၚ်ကဵုသွံရာန်မ္ဂး၊ ဟွံဒးအာပတ်ရ။

597) သၟာန်ၚုဟ်မးမ္ဂး၊ ဟီုကဵုကုကပ္ပိယကာရကမ္ဂး၊ ဟွံဒးအာပတ်ရ၊ “ဝတ္ထုဝွံ နွံကုပိုဲညးဂမၠိုၚ်ရ၊ ကုပိုဲညးဂမၠိုၚ်လေဝ် နွံပၟိက် နဝတ္ထုဝွံ ဝတ္ထုဝွံရ” ရဴဝွံ ဟီုသ္ဂးမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဂှ် ဟွံဒးအာပတ်ရ။ ကာယဝိက္ကယသိက္ခာပိုဒ် ဒသမတုဲရ။ ကောသိယဝဂ် ဒုတိယတုဲရ။