၄.၂.၁၀။ ကာယဝိက္ကယသိက္ခာပိုဒ်

593) ပ္ဍဲအခိၚ်တဳလပိုဥ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ဒှ်ညးသၟဟ်စောံ တၞဟ်နသ္ပကမၠောန်ဇိၚ်သ္ၚာရ၊ တဳလပိုဉ်ဥပနန္ဒဂှ် ဇိၚ်ကၠေံသကိုပ်ယာတ်မှာတ်စာ်စာ်တုဲမ္ဂး ဖျောန်ကၠေံဗွဲမဒးရး သ္ပကလိတ်ကလောတ် ဗွဲမဒးရးတုဲ ရုၚ်လတက်ရ၊ ပ္ဍဲအခိၚ်ဂှ် ပြဘာဇ်မွဲတၠ ရုၚ်လတက်ယာတ်မထေက်ကဵုၚုဟ်မးမဂၠိုၚ်တုဲ ပြာပ်ကၠုၚ်ဇရေၚ် တဳလပိုဉ်ဥပနန္ဒ ကောန်သၟိၚ်သာကျဝၚ်တုဲမ္ဂး “ယွံကောန်တၠ သကိုပ်တၠအဲဂှ် ခိုဟ်ကွေံရောၚ်သွံ၊ လှာဲဂတးကေုာံယာတ်အဲဟာ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ယွံကောန်တၠ ဩဝ်တီကေတ်ညိ ရဴဝွံ (သ္ဂးရ) ။ ဨ ယွံကောန်တၠ အဲတီရ ရဴဝွံ (ကလေၚ်သ္ဂးရ) ။ ယွံကောန်တၠ ဩဝ်ကေတ်ညိ ရဴဝွံ ကဵုဏာရ။ ပ္ဍဲအခိၚ်ဂှ် ပြဘာဇ်ဂှ် ရုၚ်လတက်ဏာသကိုပ်ဂှ်တုဲ အာ အာရှာမ်ပြဘာဇ်ရ၊ ပြဘာဇ်ဂမၠိုၚ် “ယွံကောန်တၠ သကိုပ်တၠအဲဝွံ ခိုဟ်ကွေံရောၚ်သွံ၊ မုရဴနူဌာန်မွဲ တၠအဲ ကလိဂွံနၚ်ဂှ်ရော?” ရဴဝွံ ဟီုသ္ဂးကဵုပြဘာဇ်ဂှ်အိုတ်ရ။ ယွံကောန်တၠတအ် လှာဲဂတးနၚ် ကေုာံယာတ်အဲဂှ်ရ ရဴဝွံ (သ္ဂးရ) ။ ယွံကောန်တၠ သကိုပ်တၠအဲဝွံ မုစိတ္ၚဲဒုၚ်ဂှ်ရော? ယာတ်တၠအဲဂှ်ဟေၚ် ခိုဟ်ရ ရဴဝွံ (ဟီုသ္ဂးအိုတ်ရ)။ ပ္ဍဲအခိၚ်ဂှ် ပြဘာဇ်ဂှ် “ပြဘာဇ်ဂမၠိုၚ် ဟီုဍာံအိုတ်ရ၊ သကိုပ်အဲဝွံ မုစိတ္ၚဲဒုၚ်ဂှ်ရော? ယာတ်အဲဂှ်ဟေၚ် ခိုဟ်ရ” ရဴဝွံ ပြာပ်အာဇရေၚ် တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ “ယွံကောန်တၠ ဩဝ်ကလေၚ်ကေတ် သကိုပ်တၠအဲညိ၊ ဩဝ်ကလေၚ်ကဵုယာတ်အဲညိ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ယွံကောန်တၠ အဲဂှ် “ယွံကောန်တၠ ဩဝ်တီကေတ်ညိ” ရဴဝွံ ဟီုသ္ဂးကၠုၚ်ကဵုတၠအဲရဟွံသေၚ်ဟာ၊ အဲ ကြက်ကလေၚ်ကဵုဟွံသေၚ်ရ ရဴဝွံ သ္ဂးရ။ ပ္ဍဲအခိၚ်ဂှ် ပြဘာဇ်ဂှ် “ခရှ်မှ ကလေၚ်ကဵုဒၟံၚ် ကုညးသၠိုက်သ္ၚောံစိုတ်ဏီရ၊ ခမဳဂှ် မုဟိုတ် ကလေၚ်ကဵုကုခမဳ ဟွံမာန်ဂှ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်ပြဘာဇ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် မုဟိုတ် အာစိုပ်ပွမသွံရာန် ကေုာံပြဘာဇ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမပိုၚ် ဟီုဂရိုဟ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ ။ ပ ။ “ယွံဥပနန္ဒ တၠအဲ အာစိုပ်ပွမသွံရာန် ကေုာံပြဘာဇ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် အာစိုပ်ပွမသွံရာန် ကေုာံပြဘာဇ်ဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

594) ယြဴခမဳမွဲ အာစိုပ်ပွမသွံရာန် မၞုံတၟေၚ်ပကာရတၞဟ်တၞဟ်မ္ဂး၊ (ကုခမဳ) ဒးအာပတ်နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။