၄.၂.၁.၁။ ပွံက်ကောသိယသိက္ခာပိုဒ်

544) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္တကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ သၞာ မ္ဂးဂှ် သီုဟွံတုတ်ပၠးတုဲ သၞာမဂပ်ဝ်ခၞံလဝ်ရောၚ်။ ကဵုခၞံ မ္ဂးဂှ် ကေုာံတောဝ်သုတ်မွဲဇြေဟ်ကဵုမွဲဇြေဟ် (မွဲတၞုၚ်ကဵုမွဲတၞုၚ်) လေဝ် နှဴလုပ်တုဲခၞံမ္ဂး၊ ကဵုခၞံမ္ဂး၊ ဟိုတ်နူပယောဂ ပွမပတိတ်ဇြဟတ် (ဒးအာပတ်) ဒုက္ကဋ်ရ၊ ဟိုတ်ပွမကလိဂွံမၞုံကဵု (ဝိနယ်ကမ်) ပွမဒးသၠးရ၊ ဂပ်ဝ်သ္ဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုပူဂိုလ်ကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံတဳလပိုဉ်တအ် သၞာသောန်အဲဍိက်ဝွံ နှဴရဴကေုာံတောဝ်သုတ်တုဲ ကဵုခၞံဒးတုဲ မၞုံကဵု (ဝိနယ်ကမ်) ပွမဒးသၠးကၠေံရ၊ သၞာသောန်ဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကလေၚ်ရ ။ ပ ။ ရဴဝွံ ဒးကလေၚ်ကဵုအိုတ်ရ ။ ပ ။ ကလေၚ်ကဵု ကုတဳလပိုဉ်ရ ရဴဝွံ (ဒးကလေၚ်က၆ုရ)။

545) ဇကုခၞံလဝ်ဟွံစိုပ်ဒတုဲဏီဂှ် အလဵုဇကုကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်နိဿဂ္ဂိပါဲစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ် နိဿဂ္ဂိပါဲစိုတ်ရ။ တၞဟ်နသွက်ညးသအာၚ် (အလဵုဇကုလေဝ်) ခၞံမ္ဂး၊ (ညးသအာၚ်ဂမၠိုၚ်လေဝ်) ကဵုခၞံမ္ဂး၊ ဒးအာပတ်ဒက္ကဋ်ရ၊ ညးသအာၚ်ခၞံလဝ်တုဲဂှ် ကလိဂွံတုဲ ပြဘိုဂ်သုၚ်စောဲမ္ဂး၊ ဒးအာပတ်ဒက္ကဋ်ရ။

546) ခၞံတဴသၠဖ္ဍာန်ကီု သၞာလးတိကီု ယာတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ကောသိယသိက္ခာပိုဒ် ပဌမတုဲရ။